Yesaya 22 - The Holy Bible in Moru (BAIBOLO ALOKADO) (MB)

Lazo ta Yerusalema rota

1 Lazo ono orivoya ta Vodelero Rulofo ro rota, ekye nyusu ta e'diro utune kuru niya? Tana e'di lidri cini 'bakici ro ka gwo ori drî zoi ro yasi niya? 2 'Bakici te kpeye amoamo ro, te twi kporo be ago riyä ro.

Lidri amiro se kotodrabe kyila ono ya ono äfu kote ufu ago todrayi kote kyila oyevoya. 3 Dri'bai cini amiro muyite ago äru ànya te teinye ätu alodi aza u'boako. Ami se cini ami be noŋwa ono sedri nyòjote umune teinye dri kyila'baazii ri esa ako. 4 Ka'do inye nyè'be ma tedri iṛe mì'ba milivute liyi be ta lidri maro se kotodrabe kwoi rota. Nyòjo ko ma i'dwene. 5 Tana OPI, Lu Mbaraekye ezi tu likyii ro, ŋgaopeṛe ro ago ŋgagburu ro te Vodelero Rulofo ro ono ya, Epere tiṛii 'bakici amaro rote riya vuru, ago kporo liyi ro kate oye wayaa lutui lakosi.

6 Kyila'bai ni wari Elama ro yasi kayi eziimu farasii si, arabia kyila ro si kusui be ndi ätui be. Kyila'bai ni wari Kira ro yasi edeyi ŋgaruotaro ànyaro te nja. 7 Arabia kyila ro gate twi vodelero se gyini kado be ana ya; kyila'bai se farasi'bai ro iyi edreyite mile dereŋwai Yerusalema ro ro kalasi. 8 Tiṛi cini Yuda gaga ro otogate vuru.

Tu ana si mìndrena vo te làkaza kyila oyero se zo'desi miri ro Vocowa ya ana dri. 9 Mìndre vose tiṛi Yerusalema ro ya togabe ŋbeŋbe ana te ago nyòkoto kala gyi se cece vurule ya ro ana te. 10 Nyä̀täkyi zo se cini Yerusalema ya iyi te ago nyèpere rukäna te riya vuru ago mìru kuni na te ogone tiṛi 'bakici ro edeza. Mìbe vo aza te lakole tiṛi ritu iyi roya 'bakici ya, 11 gyi ri edreza ukyi gyi udi 'da tesi ni cece uku yasi. Oko nyùsu ta Lu, se kora tase cini kwoi ni ṛo kyeno ago ko'ba tase ono ni a'done ono ro kote.

12 OPI Mbarapara se Mbaraekye ono a'dote ami uzivoya tu ana si liyine ago ruṛu o'bene, drî amiro uvune ago boŋgo guniya ro osone. 13 Caoko mìri ṛo ugune ago mìri ṛo karama amiro oyene ayani. Nyùtufu timele ndi tii be te onyane, ago mìmvu vino te. Nyàtate mìkye: “Mì'de manya ŋga ago mämvu ŋga! Tana ondo 'do mà oye ṛo odrane.”

14 OPI Mbarapara se Mbaraekye ono andivona ititate märi ekye: “Endaro änina ko ànya e'bene cu ta takozi se ono rota, madale ànya odrana gwo. Ma OPI Mbarapara se Mbaraekye ono, matani.”

Miomba ozo Sebena ri

15 OPI Mbarapara se Mbaraekye ono, atate märi oyine Sebena, voondre'ba 'desi, làkaza 'di katidri 'bädri'ba ro ro re, atane ndäri ekye: 16 “Nya e'di oye noŋwa ya? A'di ozo ta ni miri 'budri ogane andivo miro ri noŋwa ya? Tana e'di nya 'budri oga miri kuru noŋwa ni ya? Nya 'budri oga miri lama lutu ro ya noŋwa tana e'diya? 17 Nya'dona gica mano 'desi ro, oko Lu uruna mi 'da mbarasi ago ovona mi 'da lozo. 18 Nda wiṛi na mi 'da ago ovona mi 'da oso koro ronye le 'bädri 'desipara aza ya. Midrana 'da lau loto arabia kyilaro miro se liŋgyiekye iyi lomvo. Mi orivoya driupi 'desi yi 'di katidri 'desi miro roya ri. 19 OPI anana mi 'da ni vo losi ro yasi ago logona mi 'da vuru ni a'do 'desi miro yasi.”

20 OPI atate Sebena ri ekye: “Tu ana kesate oko, mazona lazo 'da ruindu'ba maro Eliakima ŋgwa Ilekia ro vo. 21 Masona boŋgo runduṛuro miro ndi nda lomvo, ago membena kyini kunduro miro be 'da nda kundu ago mozona drikaca se cini nya'dobe sina ana 'da ndäri. Nda a'dona 'da oso täpi ronye lidri Yerusalema ro ndi Yuda robe ri. 22 Mozona drikaca 'bädri'baro, se zelevo Dawidi ro ro 'da ndäri. Ndäri ni a'done ŋga ŋgaupiro zo losi oyero robe, vose nda kabe upina, 'diaza unina ko osene, ago vose nda kabe osena, 'diaza unina ko upine. 23 Motona nda 'da ŋgärä vo ndaro ya oso losomari ronye, ago nda a'dona 'da eto'ba taoro ro katidri cini ndaro ri.

24 “Caoko 'didiri cini ndaro ndi ànya se kayibe ruäti nda lomvo iyi be a'donayi 'da ŋgaläŋgyi ro ndäri. Ànya leyinayi 'da nda lomvosi oso abe lakaza ndi deŋbele be toyina ce lomvosi 'do ronye! 25 Tu ana si lusi se otobe ŋgärä vo ndaro ya 'do a'dona 'da kotokotoro ago o'dena 'da. Ago 'do anjioko ŋgase cini otoyibe lomvoigyesi iyi äduna okyena gwo.” OPI atani inye.