Yesaya 19 - The Holy Bible in Moru (BAIBOLO ALOKADO) (MB)

Lu Ezana Ezipeto 'da

1 Lazo ono ta Ezipeto rota ekye: OPI ka eziikyi 'dikolo umuekye si ka oyi Ezipeto ya. Lui edeedero Ezipeto'bai ro lä'bina 'da nda mile, ago agoago lidri Ezipeto ro ro okyena 'da. 2 OPI ekye: “Meŋgana ya lidri Ezipeto ro ro 'da kyila oyene kakalaka ro Ezipeto ya ago motozana ädrupi 'da a'done kyilaro ädrupi ndaro be ago oriazi a'dona 'da kyilaro oriazi ndaro be. 'Bakicii oyenayi kyila 'da 'bakicii azi be, ago 'bädri'bai utrirunayi 'da ta mbara rota 'bädri'bai ezi be. 3 Ma oye tori tauni Ezipeto'bai ro perene ago tavoora ànyaro gburune. Ànya ejinayi lui edeedero ànyaro 'da ànya opane, ago ànya oyinayi 'da tetedri'bai re, ata'ba tori avo ro be re ago kozoi re ta azaka vona edrene. 4 Mozona Ezipeto'bai 'da 'di drikyitri'ba aza rigye, ago 'bädri'ba ago se siomba be 'do ri ni ànya mirine. Ma, OPI Mbaraekye, matani.”

5 Gyi Naile ro osena 'da, ago golo uguna ose 'da liyaro gbe. 6 Gwoṛiŋwà Golo Naile ro a'dona 'da uŋguuŋguro ondro ànya kate ugu ose liyaro gbe owo. Äjääyi na ndi dradra na be ludina 'da, 7 Vo a'dona 'da ni rri Naile kalasi ago ŋgaluru se cini aribe Naile kalasi iyi owina 'da ago oli onjana 'da zwi. 8 Ti'bi uru'bayi liyinayi 'da ago a'donayi 'da tusu ro, ànya se kabe ti'bi evo ni Naile yasi ndi ànya se kayibe kyimba ovo golo ya iyi be a'donayi 'da tusu ro. 9 Ànya se kayibe boŋgo 'bilindriro ede iyi a'donayi 'da tusuro ago ànya se kayibe boŋgo kodo ro o'di iyi a'donayi 'da mio'ba ako; 10 boŋgo o'di'bai a'donayi 'da märäyiro ago ànya se kayibe losi oye päläti dri iyi a'donayi 'da tusuro.

11 Dri'bai 'bakici Zoana ro orivoya amamai! Lidri tavouniekye Ezipeto ro kayi tavoata tauniakosi! Ànya uninayi atane 'bädri'ba ri ekye yìru vo tauni'bai ndi 'bädri'bai se kyeno kai ro ni eŋwanyeya? 12 'Bädri'ba Ezipeto ro, ànya se tavoata'bai tauniekye miro kwoi eŋwaroya? Mi'ba ànya kitiyi tase OPI Mbaraekye korabe ta Ezipeto rota ono tana miri. 13 Dri'bai Zoana ro a'doyite amama ro, ago odo dri'bai mamefi ro te. Ànya ni dri'bai lidri ànyaro ro ono wiriyi Ezipeto te. 14 OPI 'ba ànya te tavoata 'diwiriro ozone ayani. Ta'doro, ànya 'ba Ezipeto'bai te ŋga cini oyena koziro oso mano se wa fute oko ka aba parapara kabe o'de u'dwe modo ndaro ya 'do ronye. 15 'Diaza i'do Ezipeto ya, ŋgaamba be, kode ati'ba ro, 'desiro kode uniako, ŋgaopa oyene.

Ezipeto'bai Mätuna OPI 'da

16 Tu kabe esa ana si lidri Ezipeto ro a'dona 'da turituriro oso 'ditoko ronye. Ànya lä'binayi 'da turi si ondro ànya kondreyi OPI Mbaraekye keŋga drì ndaro te kuru ànya ezaza owo. 17 Lidri Ezipeto ro a'dona 'da turiro ni lidri Yuda ro ri; 'dicini se keri ta kandrakozi se OPI Mbaraekye kedebe ànya lomvo ana tana te a'donayi ndi turiro.

18 Tu ana si atana 'da kala Ebere rosi 'bakicii nji Ezipeto ro yasi. Lidri se lau kai äṛuruna 'da ävuru OPI Mbaraekye rosi. Alodi aza 'bakicii kai ro äzina ävuruna 'da, “'Bakici Kitu ro.”

19 Tu ana si, vo tori oloro a'dona 'da OPI ri kitoriya wari Ezipeto ro roya ago äṛuna kuni cariro aza 'da ndäri kishwedri Ezipeto be ya. 20 A'dona 'da taka'daro ago tazevoedre ro OPI Mbaraekye ri wari Ezipeto roya. Ondro ate lidri se lau ana ezana ago kayoyi drite OPI ri oko, nda ezona 'diaza 'da ànya gagane ago opane. 21 OPI ka'dana andivo ndaro 'da lidri Ezipeto ro ri, 'dooko ànya uninayi OPI 'da tu ana si ago mätunayi nda 'da, ago ànya ezinayi tori oloro ndi ŋgapäṛi ozaro be 'da ndäri. Ànya o'banayi tao'ba lämu'du azaka 'da ndäri ago oyenayi tase ànya ko'bayi tana be 'do 'da. 22 OPI ezana Ezipeto'bai 'da, oko nda ogo edena ànya 'da. Ànya egonayi 'da ndare, ago nda erina mätu ànyaro 'da ago edena ànya 'da.

23 Ondro tu ana kesate oko, liti a'dona 'da ŋbokoloko lakole Ezipeto ro Siria be ya. Lidri Ezipeto ro ndi Siria ro be abanayi 'da lakole yasi, ago tu'dei se ritu ono mätunayi 'da voaloya. 24 Tu ana si a'do 'desi Yisaraele ro ojona ndi ojo Ezipeto ndi Siria be robe, ago tu'dei se kwoi a'donayi 'da äṛuäṛuro vo 'bädri cini ro ri. 25 OPI Mbaraekye äṛuna ànya 'da ago atana 'da ekye: “Mäṛuna ami 'da, Ezipeto'bai, ami lidri maro; ami, Asaria'bai, se ma'bani, ago ami, Yisaraele'bai lidri onjionji maro.”