Ŋgaoparo 'Desi
1 Ta'doro beṛo ämäri taŋgye se cini mèri tana te ana ätine anda, ukyi mà'do'da ruonaonaro ni kigyesi. 2 Lazo se ozote zutui amaro ri malaikai si aka'date endaro, ago 'diaza se koso kote voigye kode koro anya kote usuna taezaro se sindi usune ndäri ndi. 3 Ka'do inye, màpanavo 'bo eŋwanye ondro ka'do màgabi kote ŋgaoparo se para ono tana erine ya? Opi andivo ndaro ayota ŋgaoparo se para ono rote ṛo käti, ago ànya se keriyi nda te ka'dayite ämäri anjioko ànya orivoya endaro. 4 Ago tuna gialo ono ya Lu loci tazevoedre ndaro ànyari ya te ugu talaro ro amba ndi rubä be oye si ago ugu ŋgapäṛi Tori Alokado ro ozo si oso ole ndaro ronye.
Nda se Kabe ni Ama Ugu Ŋgaoparo re
5 Lu 'ba malaikai kote 'dimiri'bai ro 'bädri se to'di kabe ikyi ana dri, 'bädri se mabe tana opena ono. 6 Oko, oso atate orivoya vo aza ya taegyi ya ronye ekye:
“Lidri 'bo e'diyi ya, Äye Lu, miri ta ndaro usune;
se toto lidri yi ono miri tana otine ya?
7 Mi'ba nda te giṛiŋwa tipari ni malaikai ri;
miso 'desi te nda dri ndi taoro be,
8 mi'ba nda te dri'ba ŋga cini ro.”
Atate ekye Lu 'ba lidri ni, “ŋgacini miri'ba ro”, ono ṛo orivoya ŋbelero dro'be vona cini. Caoko, màndre lidri kote ugu ŋgacini miri voya yau. 9 Oko màndre Yesu ndi se ologote giṛiŋwa ondro a'bate pari vuru tipari ni malaikai ri owo, tana tai'dwero Lu rosi nda kodra robe 'dicini ta. Màndre be yauono aso 'desi ndi taoro be te nda dri ta odra se nda kezarube ana rosi. 10 Lu toto ni ŋgye, se kani ŋga o'ba ago kani ŋga cini äti, 'ba Yesu ni ŋgye ugu rueza si, tana ŋgwà amba eziza 'desi ndaro la'done. Tana Yesu ni 'dise kabe ànya ugu ŋgaopa re owo.
11 Yesu kani lidri wäṛi ni takozii ànyaro risi, ago nda ndi riti ànya se a'bate wäṛiro be vona cini te Täpi alo be. 'Do ni tase Yesu 'debe kote a'done driupiro ànya uzine ädrupii ndaro owo. 12 Nda ka ata Lu ri ekye:
“Mitina tase miyebe ono tana 'da ädrupii maro ri;
märäṛuna mi 'da kalakoto ànyaro ya.”
13 Nda ka kpa ata ekye: “Mayina ta maro 'da Lu ya.” Ago nda ka kpa ata ekye: “Noŋwa ono ma orivoya ŋgwai se Lu kozobe märi be.”
14 Tana ànya ṛote ŋgwai oso Lu kabe ànya uzi ronye, ànya orivoya lidri iza be yi ndi kari be, Yesu andivo a'dote ànya ronye ago la'do a'do lidri ro ànyaro te. Nda ye ta ono te tana odra ndaro si nda kepere Kicu'ba, se mbara odra ro robe ro, 15 ago oyena inye si nda 'ba ànya se orivoya iyeäṛi ro ori cini ànyaro ya ta turi ànyaro rosi ni odra ri te dritai ro. 16 Tana ṛo orivoya ŋbelero anjioko nda ka ko malaikai opana ayani. Oko, oso Taegyi kabe ata ronye ekye: “Nda kani zelevoi Abarayama ro opana.” 17 'Do takacina anjioko nda a'dote oso ädrupii ndaro ronye liti cini yasi, tana nda ka'do robe Kohani Fopara ànyaro ro 'diri ndi yauni be ruindu ndaro Lu ri ya, tana takozii lidri ro ka'do robe e'bee'be ro. 18 Ago yauono nda unina ndi ànya se ojo tana te opane, tana nda andivona ojo tana te ago ezarute.
© The Holy Bible in Moru © The Bible Society in the Sudan, 2000