1 “Mi ŋgwa lidri ro ono, miŋga kuru. Male atane miri.” 2 Ondro nda kadri ugu ata se ana atana oko, tori Lu ro cite maya ago eŋga mate pa dri kuru, ago meri nda ugu atate ekye: 3 “Ŋgwa lidri ro, ma mi ozo lidri Yisaraele ro re tu'de se ogbo'bai ono. Ànya ogboyite ma be; ànya ndi zutui ànyaro yibe yeyi takozi te malomvo, madale tu ono si ono. 4 Ànya orivoya taeriako ago taoroako, ta'doro ma mi ozo ta itine ànyari anjioko ma, OPI Mbarapara ma ni ata ànyari. 5 Kode ànya uninayi ndi ta miro erine kode uninayi ko erine (tana ànya orivoya ogbo'bai), ànya uninayi 'da anjioko nebi aza te orivoya ànya lako.
6 “Oko mi, ŋgwa lidri ro ono, nya'do ko turiro ni ànyari kode tase ànya kayibe atana ri. Ànya oŋganayi 'da kyilaro ago mawonayi mi 'da, labana 'da osoago miri kyitoni lako. Caoko, nya'do ko turiro ni ata ànyaro ri kode ni voondre ànyaro ri, tana ànya orivoya ogbo'bai. 7 Nyiti tase cini mabe atana miri ono ànyari, ondro ànya keriyi tana ca kode keriyi ca ko owo, tana ànya orivoya ogbo'bai.
8 “Ŋgwa lidri ro, nyeri tase mabe atana miri ono. Nya'do ko ogbo'ba ro ànya ronye. Mipi kala miro ago minya ŋgase mabe ozona miri ono.” 9 'Dooko mandre drì aza te ozote mare ro, ru buku roṛoroṛo ro yi. 10 Drí se ana pere buku roṛoroṛo ro ana yana te, ago mandrete egyitate kigye kpa lama telesina yasi, egyi liyi tusu ro tana te kigye lau, ndi ta ruṛu ago leri robe.
© The Holy Bible in Moru © The Bible Society in the Sudan, 2000