Ofo 35 - The Holy Bible in Moru (BAIBOLO ALOKADO) (MB)

Taorà ta Sabata rota

1 Musa otokala lowa cini lidri Yisaraele ro rote, atate ànyari ekye: “Ono ni ŋgase OPI kota ami be oyene owo. 2 Mìye losi u'du njidrialo si, oko u'du njidrieri a'done Sabata alokado loli ro adite OPI ri, 'dise aza kabe losi oye tu 'do ya äfuna ndi; 3 Nyede asi ko 'bai amiro ya Sabata si.”

Ŋgapäṛi Ozo tana Mutuguṛi Alokado

(Ofo 25:1-9)

4 Musa atate lowa cini lidri Yisaraele ro ro ri ekye: “Ono ni ŋgase OPI kata tana be owo. 5 Mìru ŋgapäṛi nyòzo OPI ri, nda se ŋgalu be ya ndaro ya ŋgapäṛi ozone, mì'ba nda kezi OPI ri, logo läguläguro, mo'di kode atala, 6 boŋgo 'bilindriro, lu'buliro, lärimiro, kodo walawalaro, ago boŋgo liŋgyiekye edeedero ni 'bi indri ro yasi: 7 kyini oŋgaoŋgaro timelegogoi ro ndi kyini indrii robe; ice weri ro, 8 ido lamba ro, ŋgutruro ido 'diäṛu ro ro ndi ŋga 'bolotoro tägyi be ro. 9 Kuniŋwà sadonuki ro ndi kuniŋwà oraro gyeree robe, ta boŋgo gajuṛuŋwa ro ndi boŋgoŋwa kätätidri ro rota.

Ŋgà Mutuguṛi A'do Lototi OPI ro Edero

(Ofo 39:32-43)

10 “'Dise cini orivoya mbara ro ami lako tauni ŋgaedero be mì'ba kikyi ago kede ŋgase cini OPI kata tana be ono. 11 Mutuguṛi, boŋgo takona ro ndi ŋga lomvona tesi si takona robe, moŋgoŋwà na, ndi joce na yibe, lorona lala ro drî nai yasi be, jocei ndi unjuvona yibe, 12 Sänduku Tao'baro, ice caricari na ndi drina yibe; ndi boŋgo oyiro be 13 tara'biza ndi ice caricari na be ndi lakazà cini losi na robe, ago ambata alokado se abe ozona ondoalo Lu ri 'do, 14 ŋga lamba edrero kpa tana asi eyiza ndi lakazà ànyaro ndi lamba ànyaro yibe, ago ido tana asi eyizana. 15 Ago vo tori oloro ŋga tägyi ŋgutruro be ro ice caricari na yibe, ago ido 'diäṛu ro ndi ŋga tägyi ndeṛindeṛiro robe, boŋgo oyiro käläsi Mutuguṛi ro kala, 16 vo tori oloro ŋgapäṛi ozaro ndi atala to'dito'diro robe, ice caricari ndi lakaza nabe kagyi ndi jopena be, 17 boŋgo toyiro goko lomvosi, joce nai ndi unjuvona be; boŋgo oyiro ecivo goko roya; 18 ŋga Mutuguṛi ndi goko be otoro ndi iba ànyaro yibe, 19 boŋgo loselosero liŋgyiekye ugu ruinduzana vo alokado ya, boŋgo alokado Arona kohani ri, ago boŋgo ŋgwàagoro ndaro ri losi ànyaro kohani ro oyezana.”

Lidri Ezi Ŋgapäṛi Ànyaro te

20 'Dooko lidri cini Yisaraele ro oyiyite ni Musa kandrasi. 21 Ànya se cini yana koleyibe ŋga ozone 'do eziyi ŋgapäṛi te OPI ri losi oyezana sina Mutuguṛi a'do lototi OPI ro ya ago ta mätuna oyero ta, ago ta boŋgo alokado ro o'dina rota. 22 Ànya se cini koleyibe, manoàgo ndi 'ditoko be; vonai cini ole ya ànyaro rosi eziyi ŋgyiṛiŋwà ruegaro te, iŋgyi bi ro, mäŋgusi osoro driŋgwa ya, beji osoro kufu ya ndi logo cini läguläguro dritoto robe te, ago ozoyi ŋgapäṛi logo läguläguro rote OPI ri. 23 Manoàgo se cini orivoya ŋga lu'buliro, lärimiro, walawalaro, kode kodo liŋgyiekye 'bilindriro, kode boŋgo ni 'bi indri ro yasi; kyini oŋgaoŋgaro timelegogoi ro, kode indrii robe eziyi ànya te. 24 'Dicini se ni ndi ŋgapäṛi mo'di ro kode atala ro ozone eziyite ŋgapäṛi ro OPI ri, ago 'dicini se ice weri robe se 'de ndi ree losi oyero 'do eziyite. 25 Ago 'ditoko se tauni kodo opiro drisi be, eziyi kodo se ànya kopiyibe lu'buliro, lärimiro ndi walawalaro liŋgyiekye opaoparo 'bilindriro 'do be te, 26 'ditoko cini se tauni be ago ya ànyaro kolebe piyi 'bi indri rote. 27 Ago dri'bai eziyi kuniŋwà sadonuki rote ndi kuniŋwà be orane gyereero loselosero boŋgo gajuṛuŋwa ndi boŋgo kätätidri robe yasi; 28 ŋga ŋgutruro ndi ido asi eyiro be, ido 'diäṛu ro ndi ŋga 'bolotoro ndeṛindeṛiro be. 29 Lidri cini Yisaraele ro, se kolebe ŋga aza ezine ta losi se OPI kota Musa be oyene ana rota, eziyite oso ole ànyaro ronye OPI ri.

Losioye'bai Tauni si tana Mutuguṛi A'do Lototi OPI ro rota

(Ofo 31:1-11)

30 Musa atate lidri Yisaraele ro ri ekye: “OPI nji Bezalela ŋgwa Uri ro kwozo Uru rote, ni 'bakala Yuda ro yasi. 31 Lu so tori te twi ya ndaro ya, ozo mbara tavouni ndi tauni ŋga dritoto edero be te ndäri; 32 tavo orane tauni si beti ŋgase edene ro wuräne, losi oyene logo läguläguro, mo'di ndi atala be si. 33 Kuniŋwà losero ogana ya, ede ice ro golo'doro roya, ago tauni losi ŋga cini edero roya. 34 OPI tomba nda te azi embane nda ndi riti Oliaba ŋgwa Aisamaka ro ni 'bakala Dana ro yasi be. 35 Nda ozo tauni te ànya riti ri losi drì ro se cini ŋgaedero se lidri kabe oyena, kode losi ŋga wuräro, ŋga tira ro ŋga lu'buliro, lärimiro ndi ŋga walawalaro be si, boŋgo liŋgyiliŋgyiro 'bilindriro o'dina, ndi boŋgo dritoto azaka se lidri kabe oyena tauni ŋgawurä'bai rosi 'do be.