Ofo 31 - The Holy Bible in Moru (BAIBOLO ALOKADO) (MB)

Lidri Ŋgatira'bai ri Mutuguṛi A'do Lototi OPI ro edene

1 OPI atate Musa ri ekye: 2 “Manji Bezalela ŋgwa Uri ro, kwozo Uru ro te, ni 'bakala Yuda ro yasi. 3 Maso tori ma Lu rote twi nda ya ago mozo tavouni te ndäri ndi tauni cini lidri ro losi oyero ŋgaedero robe, 4 tavo orane tauni si beti ŋgase edene ro wurane, losi oyene logo läguläguro, mo'di ndi atala be si, 5 kuniŋwà oraro gbikyi togana ya, ice epa golo'doro ya, ago losi ŋgaedero cini yasi. 6 Ago manji Oliaba, ŋgwa Aisamaka rote, losi oyene nda be, ni 'bakala Dana ro yasi ago mozo tauni te lidri cini se mbara be losi oyene iyi ri, tana ànya kedeyi ŋgase cini mata mìbe oyene 'do robe; 7 Mutuguṛi a'do maro lototi ro, Sänduku Tao'baro ndi drina be, ndi ŋgase cini oraro Mutuguṛi ya be, 8 tara'biza ndi lakazà cini losi na robe, ago ŋga wäṛiro lamba edrero ndi lakazà cini losi na robe, vo ŋga tägyi be ozaro ro, 9 vo tori oloro ŋgapäṛi ozaro ndi lakazà cini losi na robe, kagyi ndi jopena be, 10 boŋgo liŋgyiekye o'dio'diro, boŋgo alokado tana kohani Arona ndi boŋgoi ŋgwàagoro ndaro ri yibe, ta ruindu ànyaro kohanii ro rota, 11 ido 'diäṛu ro ndi ŋga 'bolotoro ndi ŋga tägyi be be tana vo alokado. Ànyari oyene oso se mata mibe oyene ronye.”

Sabata Tu Loli ro

12 OPI atate Musa ri ekye: 13 “Nyata lidri Yisaraele ro ri mikye: ‘Ämiri Sabata, maro ätine, tana 'do ni taka'daro yi lakole maro ami yibe ya le tuse cini kabe ikyi mileya ya ka'daza anjioko ma ni OPI owo, ma'ba ami ni a'done wäṛi ro. 14 Beṛo ämiri tu Sabata ro ätine, tana ni orivoya alokado, 'dise cini kabe enjina a'bana ndi odrane, 'dise koye losi aza te kigye 'dina 'do ndi ufune. 15 Miye losi u'du njidrialo ya, oko u'du njidrieri ni Sabata alokado loliro yi adite ma Opi ri, 'dise aza kabe losi oye tu ono si äfuna ndi. 16 Ta'dota lidri Yisaraele ro ri tu Sabata ro ätine taka'da tao'baro ro rriro. 17 Tana Sabata orivoya taka'daro rriro yi lakole maro lidri Yisaraele robe ya anjioko u'du njidrialo ya ma OPI ma'ba vo'buyakuru ni ndi 'bädri be, ago mololite u'du njidrieri ya.’ ”

18 Ondro Lu konde ädu ata ro Musa be te 'bereŋwa Sinai dri oko, nda ozo kuniŋwà ritu kalakparo te musa rigye se Lu andivona egyi otà te driigye driŋgwa ndaro si.