Ofo 24 - The Holy Bible in Moru (BAIBOLO ALOKADO) (MB)

Tadriole Tao'baro

1 Lu atate Musa ri ekye: “Nyitu kuru 'bereŋwa dri mare, mi ndi Arona be, Nadaba, Abihu ndi dri'bai 'butenjidrieri Yisaraele robe, ago nyä̀mätu pere lozo si. 2 Toto mi nyikyi ni lototi mare oko ko azi iyi. Ago kpa ko lidri ri utune kuru mibe 'bereŋwa dri.”

3 Musa oyite ago iti ta OPI rote lidri cini ri ndi ota na cini be, ago lidri cini zatadrina te troalo ekye: “Tase cini OPI katabe ono mayena ndi.” 4 Musa egyi ta cini OPI rote vuru. Ago nda ŋgate kyenoŋboci, ago be vo tori oloro te 'bereŋwa pa, ago edre kuni 'butealo foritu te, oso a'do oti 'bakalai 'butealo foritu Yisaraele ro ronye. 5 'Dooko nda zo agoanjii azaka teni Yisaraele'bai lakosi ago ànya zayi tori oloro te OPI ri ago loyi 'daŋgoi te tori ro ŋgapäṛi rumora ro ro. 6 Ago Musa ru telesi kari koronyai rote ago sote deŋbelei yasi, ago telesi kari ro nda luvute vo tori oloro dri. 7 'Dooko nda ru buku tao'baro te ago zite lidri ri erine; ago ànya atayite ekye: “Tase cini OPI kata be ono màyena ndi, ago mà'dona ndi taoro be.”

8 'Dooko Musa ru kari se deŋbelei yasi ana te ago luvute lidri drisi. Ago atate ekye: “Ono ni kari tao'baro se OPI kabe o'bana yau ami yibe ta ota se cini nda kozobe kwoi rota owo.”

9 'Dooko Musa, Arona, Nadaba, Abihu ndi dri'bai 'butenjidrieri Yisaraele robe tuyite kuru 'bereŋwa dri, 10 ago ànya ndreyi Lu Yisaraele rote. Pa ndaro zele ŋga aza oso liti ede kuni safire rosi ronye, betina lu'buliro oso vukuru ronye. 11 Lu ye dri'bai lidri Yisaraele ro ro kote koziro, ànya ndreyi Lu te, ago ànya nyayi ŋgate ago mvuyi ŋgate.

Musa 'Bereŋwa Sinai dri

12 OPI atate Musa ri ekye: “Nyitu mare kuru 'bereŋwa dri, ago ondro mi drigba noŋwa oko mozona kuni kalakparo ritu 'da miri se orivoya otà be driigye, se megyite lidri embazana sina.” 13 Musa ndi kundueŋga'ba ndaro Yosua be ŋgate ago Musa eto utute kuru 'bereŋwa alokado dri. 14 Nda atate dri'bai ri ekye: “Mìri gawa ya noŋwa ama kwotene, madale màgo mègona ni amire. Arona ndi Uru be ni amire wo, 'diaza ka'dote ta kaladiṛiro aza be edene koyi ànyare.”

15 'Dooko Musa tute 'bereŋwa Sinai dri, ago 'dikolo tako 'bereŋwa te. 16 Ago lägu ŋgaeyi A'do Lototi OPI ro eyivote 'bereŋwa Sinai dri, ago 'dikolo tako 'bereŋwa te u'duna njidrialo. Ago u'du njidrieri si oko OPI zi Musa teni 'dikolo yasi. 17 Lägu Ŋgaeyi OPI ro landrete Yisaraele'bai ri oso asi lindi ro ronye 'bereŋwa dri. 18 Musa cite 'dikolo ya, ago tute kuru 'bereŋwa dri. Ago Musa rite 'bereŋwa dri lau kituna 'butesu ago ŋgäkyina 'butesu.