Ofo 10 - The Holy Bible in Moru (BAIBOLO ALOKADO) (MB)

Taezaro Tombi si

1 'Dooko OPI atate Musa ri ekye: “Nyoyi ago mindre 'bädri'ba. Ma'ba ya ndaro te uŋgyine, ndi ya dri'bai losi ro ndaro robe, tana maka'da rubä maro kwoi robe ànya lako, 2 tana nyìti tana robe erine ŋgwai amiro ri ndi kwozoi amiro be anjioko meza Ezipeto'bai te. Ago nyìti ta rubä se maye be ànya lako ono ro, tana ami cini mìni robe anjioko ma ni OPI owo.”

3 'Dooko Musa ndi Arona be oyiyite 'bädri'ba re, ago atayite ndäri ekye: “OPI Lu Ebere'bai ro kani ata nonye ekye: ‘Miganazo andivo miro logone vuru märi tuna mu'du eŋgwanyeya? Mi'ba lidri maro koyi; tana ànya kämätuyi ma robe. 4 Ondro ka'do migatezo ànya o'bane oyine, mindre, ondo 'do mezina tombi 'da 'bädri miro ya. 5 Ànya takonayi 'bädri ṛo takyi ago 'diaza alo unina ko 'bädri ondrene. Ago ŋgase ke'bebe miri 'busiya vosi ànya onyana 'da, ànya onyana ice cini se kabe omba ämvui amiro yasi iyi 'da. 6 Ago ànya ogana 'da twi zo'desi miri ro miro ya ago kpa zoi cini dri'bai losi ro miro ro ndi Ezipeto'bai robe yasi, se ca zutui amiro ndreyi kätina kote, ṛoni tuse äti ànya be 'bädri ya si le tu ondro ono ya.’ ” 'Dooko Musa zamite ago oyite ni 'bädri'ba resi.

7 Ago dri'bai losi ro 'bädri'ba ro atayite ndäri ekye: “Mano ono kaoye rriti ozone ämäri tuna mu'du eŋwanyeya? Mi'ba Yisaraele'bai koyi tana ànya kämätuyi OPI Lu ànyaro robe. Inye'do mini ko anjioko epere Ezipeto te ya?”

8 'Dooko ologo Musa ndi Arona be te kovole 'bädri'ba re; ago nda atate ànyari ekye: “Nyòyina ndi OPI, Lu amiro mätune oko a'diyi ri ni oyine ya?”

9 Ago Musa zatadrite ekye: “Mòyina ṛo kpeye ŋgagaŋwai ndi lidri 'desi amaro be. Mä̀runa ŋgwàagoro ndi ndiriŋwa amaro be, mä̀runa timele amaro indrii ndi tii amaro be kpa, tana be ämäri karama oyene OPI oroza.”

10 'Bädri'ba atate ànyari ekye: “Ma ruäṛu OPI si märi ami o'bane oyine 'ditoko amiro ndi ŋgwai amiro yibe i'do. Ṛo orivoya endaro nyà taäyi ogbone. 11 Hwa! Mànoago oyina toto ni OPI mätune, tana 'do ṛoni ŋgase nyàbe taeji ta ro owo.” Ago anja Musa ndi Arona be teni 'bädri'ba kandra si.

12 'Dooko OPI atate Musa ri ekye: “Nyeŋga drí miro kuru 'bädri Ezipeto ro dri tombi eziza, ànya kikyiyi robe 'bädri Ezipeto ro dri, ago konyayi ŋgase cini kabe ombaomba ago ŋgase cini 'busiya ke'bebe ana robe.” 13 'Dooko Musa eŋga dofo ndaro te, ago OPI 'ba oli ni 'buzelesi te usine 'bädri dri tu ana si zwi ago ŋgäkyi ana si raa. Ago ondro vokiwite oko oli se ana ezi tombi te. 14 Ànya ikyite lowa ro, ago riyite 'bädri cini Ezipeto ro dri. Omvo lowa tombi ro ro oso ana ronye andre kätina ko alona, se ca ogo ondrene i'do oso nanye. 15 Ànya tako dri gyini rote kpurukuṛu madale a'dote uniro ni ànya ri. Ago ànya nya ŋgase cini 'busiya ke'bebe kai te, ndi tro doŋgoi se cini ice drisi be. Ŋgaluru aza e'be kote ce aza dri ca ŋga kyikyi'di ro aza wari cini Ezipeto ro yasi.

16 'Dooko 'bädri'ba zi Musa ndi Arona be te ndrindri ago atate ekye: “Maye takozi te OPI Lu amiro lomvo, ago ami lomvo. 17 Ka'do inye, molo'baru ämiri, nyè'be ma takozi maro ta, toto pere alo ono si. Nyä̀mätu OPI Lu amiro ri taezaro gi ka 'di ufuufu ono onane ni mädrisi.” 18 Ago Musa fote tesi ni 'bädri'ba resi, ago mätute OPI ri. 19 Ago OPI läpi oli 'buzele rote oli mbaraekye aŋgoyasi ro ro ago ŋgyi tombii te ago da ànya te le Gyi'desi Okaro ya. Tombi aza alona e'be kote 'bädri Ezipeto roya. 20 Oko OPI 'ba ya 'bädri'ba rote a'done 'du uŋgyiuŋgyi ro ago nda lekote Yisaraele'bai o'bane oyine.

Taezaro Ŋgätini si

21 'Dooko OPI atate Musa ri ekye: “Nyeŋga drí miro vokuru yaro tana ŋgätini gbiṛikyiri ro katako 'bädri Ezipeto ro robe, ŋgätini se oye tämbine.” 22 Ndi Musa eŋga drí iro te kuru vokuru yaro, ago ŋgätini gbiṛikyiri ro a'dote 'bädri cini Ezipeto ro yasi u'duna nätu. 23 Ezipeto'bai niyi kote azi ànyaro ondrene, ca 'diaza ŋga kote ni vo iro yasi u'duna nätu. Oko lidri cini Yisaraele ro a'doyite ŋgaeyi be vose ànya koriyibe kigye ana ya.

24 'Dooko 'bädri'ba zi Musa te ago atate ekye: “Nyòyi OPI mätune; ca ŋgwai amiro ndi 'ditoko amiro koyiyi ami yibe. Oko timele amiro, indrii ndi tii be beṛo orine noŋwa.”

25 Oko Musa zatadrite ekye: “Ka'do inye mi andivo nyozo koronyai 'ba ro ämäri olone torii oloro ro ago ŋgapäṛi ozaro ro OPI Lu amaro ri. 26 Beṛo ämäri koronyai 'ba ro amaro urune ama yibe ko aza alona e'bene kovole. Tana andivo amaro beṛo ni koronyai 'ba ro se OPI Lu amaro mätune sina onjine. Ago mä̀nina ko unine kode moye koronyai eŋgwani olone ayani ndäri tori ro, madale màsana lutu lau.”

27 Oko OPI 'ba ya 'bädri'ba rote uŋgyiuŋgyi ro, ago nda lekote ànya o'bane oyine. 28 'Dooko 'bädri'ba atate Musa ri ekye: “Minaru ni mare si! Mi'ba mago mandre mi ko tona! Tuse moyebe mi ondrene sina si midrana ndi!”

29 Ago Musa zatadrite ekye: “Oso nyatabe 'do ronye, miri ogone ma ondrene i'do tona.”