Otadele 8 - The Holy Bible in Moru (BAIBOLO ALOKADO) (MB)

Wari se Kado Urune ana

1 “Mìro ota se cini mozobe ämiri ondro ono 'diriro, tana mìri robe lidriidriro, nyìliti robe amba, ago nyòyi mìru wari se OPI ko'ba tana be zutui amiro ri ono robe. 2 Miyi ta vose ozwaekye se OPI kelepe ami be kigyesi ndroa na 'butesu vo cowa yasi ana ro, se nda logo ami te vuru mäyuro, anjioko ta amiro ojozana tana nda kuni tase ya amiro ya robe, kode nyätina ota cini ndaro gindi kode ko. 3 Ago nda logo ami te vuru mäyuro ago 'ba ami te a'done täbiri ro, ago ozo mana te ämiri onyane, ŋgaonya se ca ami ca zutui amiro minya kätina kote alona. Nda ye tase ono te ami embaza unine anjioko lidri ri ko toto ŋgaonya si ayani, oko tase cini OPI kabe atana si ayani. 4 Boŋgo amiro lewa kote, ago pa amiro ga kote ndroa se cini 'butesu kai ya. 5 Ämiri tana unine anjioko OPI Lu amiro ka drî amiro lotana oso manoaza se kabe ŋgwa ndaro drina lotona ronye. 6 Ka'do inye, miye ota se OPI Lu amiro kota ami be sina 'do: miri ota ndaro voro ago miro nda. 7 OPI Lu amiro ka ami ugu wari kado ya wari se goloŋwà be, ago koroŋwà be ana ya, ago gyi legwalegwaŋwà be ni gyini zelesi se gyi kabe uti vodeleŋwà ro ndi lutuŋwà be yasi; 8 wari se kyifo ndi kaaza be, doŋgo kono ro, kyi'du ro, gäṛä'bu ro, ice ido ro ro ndi epe be orivoya nyalakpa kigye. 9 Wari ana ya mìnina ko a'done täbiri ro alona kode lemeri ro. Luutuŋwà na orivoya logo be, ago mìnina ndi mo'di u'dine ni luutuŋwà na yasi. 10 Nyà'dona 'da ŋgase cini milebe onyane be, ago nyozona aro'boya 'da OPI Lu amiro ri ta wari se kado nda kozobe ämiri ono rota.

Miomba Ozo ta OPI ro Ijena rota

11 “Mìni kado ko ämiri ta OPI Lu amiro ro ijene; ko ämiri orine ota ndaro se mabe ozona ämiri ondro ono oroakona. 12 Ondro nyà'dote ŋgase cini milebe onyane be ago mibe zoi te liŋgyiekye nyàte ori kigyesi 13 ago ondro ti ndi timele amiro be kilitite ago, mo'di ndi logo läguläguro amiro be, ndi làkaza cini azaka amiro be ilitite amba oko, 14 'dooko ko ämiri a'done driuŋgyi be ago nyìje ta OPI Lu amiro se kolofo ami be ni Ezipeto yasi, ni vose nyà'dobe iyeäṛi ro kigye ana yasi 'do tana ko. 15 Nda lepe ami te vocowa ndräläkäkä turi amba be se ini äṛi be ndi kitoni amba be ana yasi. Ni vose forokotiro gyi ako ana yasi nda lofo gyi te ämiri ni luutu ṛatararo yasi. 16 Nda se ozo mana te ämiri onyane vo cowa ya, ŋgaonya se zutui amiro nya kätina ko ana. Nda ezite driuŋgyi amiro onaza ago ta amiro ojozana, tana äduro oko nda käṛu ami robe ŋga kado amba si. 17 Ka'do inye, beṛo ko ämiri tausune mikye: ‘Mà'ba andivo amaro ni mbara ndi aṛi amaro be si a'done ŋgadriamba ono be.’ 18 Mìyi tana anjioko OPI Lu amiro ni se kozo mbara be ämiri a'doza ŋgaamba be owo. Nda ko'debe oyene inye tana nda ka ta tao'baro se nda ko'babe zutui amiro be ana ätina oso ondro ono ronye. 19 Ondro ka'do njije ta Opi Lu amiro rote ago mìza mi te lui azaka mätune ago ruindune ànyari, ma miomba ozo ämiri ṛo ondro anjioko endaro utufuna ami ndi. 20 Ondro ka'do miro OPI kote, 'dooko utufuna ami ndi oso tu'dei se nda ka oyebe tufune ta oci amiro rota 'do ronye.