Egyi Ota Lu ro ro Kuniŋwà drisi
1 'Dooko Musa, ndi dri'bai Yisaraele robe, atayite lidri ri ekye: “Nyä̀ti ota se cini mozobe ämiri ondro ono. 2 Tuse nyàte drî Golo Yaradene ro oza sina ocine wari se OPI Lu amiro kabe ozona ämiri ana ya ana si, be ämiri kuniŋwà 'desiro edrene kuru, ago mindru lomvo ànyaro undru, 3 Nyègyi ota cini ndi ŋgaemba se cini kwoi be driigyesi. Ondro mizàte ocine wari kado ŋgaamba be se OPI, Lu zutui amiro ro ko'ba tana be ozone ämiri ana ya owo. 4 Ago ondro mìzadri Golo Yaradene rote oko, be ämiri kuniŋwà kwoi edrene 'Bereŋwa Ebala dri, oso mabe ami emba ondro ono ronye, ago mìndru lomvona undru. 5 Ago be ämiri vo tori oloro obene lau kuni si OPI Lu amiro ri, kuniŋwà na ko opane logo si. 6 Beṛo ämiri vo tori oloro obene OPI Lu amiro ri kuniŋwà se opaako 'do si, ago ämiri ŋgapäṛi ozaro ozane driigye lau OPI Lu amiro ri, 7 ago ämiri ŋgapäṛi rumora ro olone ago onyane ago ämiri riyä oyene OPI Lu amiro kandra lau. 8 Ago ämiri ota se cini Lu ro 'do egyine kadoro käṛäbä kuniŋwà se iyi drisi.”
9 'Dooko Musa ndi kohanii se Lewe'bai ro 'do be, atayite lidri cini Yisaraele ro ri ekye: “Ami lidri Yisaraele ro, mìdri titiro ago nyèri. Ondro ono ami te lidri OPI Lu amiro ro; 10 ka'do inye be ämiri nda orone ago ota cini ndaro se mabe ozona ämiri ondro ono ätine.”
Latri Taoroako ro
11 'Dooko Musa atate lidri Yisaraele ro ri tu ana si ekye: 12 “Ondro mizadri Golo Yaradene rote oko, 'bakalai gi kwoi ri edrene 'Bereŋwa Gerizima dri ondro ate lidri äṛu owo: anjioko 'bakalai Simeona, Lewe, Yuda, Yisakara, Yosepa ndi Benjamina robe. 13 Ago 'bakalai gi kwoi ri edrene 'Bereŋwa Ebala dri ondro ate lidri otri owo, anjioko 'bakalai Rubena, Gada, Asera, Zebuluna, Dana ndi Nafatali robe. 14 'Dooko Lewe'bai ri ta kwoi atane ṛeṛe lidri cini Yisaraele ro ri ekye:
15 “ ‘Latri ka'do 'dise kabe lu awi aza edena kuni ro, ce ro, kode logo alaalaro si, ago kabe mätuna ndrwiro 'do dri; tana ya OPI ro orivoya osoro lu awi lomvo.’ Ago lidri cini ozana tadri gwo ekye: ‘Amen!’
16 “ ‘Latri ka'do 'dise koro täpi ndaro ndi endre ndaro be ko 'do dri.’ Ago lidri cini ozana tadri gwo ekye: ‘Amen!’
17 “ ‘Latri ka'do 'dise kabe kishwe se asibe oriazi ndaro be 'do läpina 'do dri.’ Ago lidri cini ozana tadri gwo ekye: ‘Amen!’
18 “ ‘Latri ka'do 'dise kabe miako'ba odi ni liti drisi 'do dri.’ Ago lidri cini ozana tadri gwo ekye: ‘Amen!’
19 “ ‘Latri ka'do 'dise kabe kandrakado 'diatraro, kenvoi, ndi ävuzii robe lagana 'do dri.’ Ago lidri cini ozana tadri gwo ekye: ‘Amen!’
20 “ ‘Latri ka'do 'dise kabe taoye toko täpi ndaro ro azana be 'do dri, tana nda ezi driupi te täpi ndaro dri.’ Ago lidri cini ozana tadri gwo ekye: ‘Amen!’
21 “ ‘Latri ka'do 'dise kabe taoye koronya aza be 'do dri.’ Ago lidri cini ozana tadri gwo ekye: ‘Amen!’
22 “ ‘Latri ka'do 'dise kabe taoye endreŋwa ndaro be kode ŋwa täpi ndaro ro kode ŋgwa endre ndaro robe 'do dri.’ Ago lidri cini ozana tadri gwo ekye: ‘Amen!’
23 “ ‘Latri ka'do 'dise kabe taoye adraŋwa ndaro be 'do dri.’ Ago lidri cini ozana tadri gwo ekye: ‘Amen!’
24 “ ‘Latri ka'do 'dise kabe oriazi ndaro ufuna ndrwi 'do dri.’ Ago lidri cini ozana tadri gwo ekye: ‘Amen!’
25 “ ‘Latri ka'do 'dise kabe parata miogyero uruna 'dise taŋgye'ba ro ufuza 'do dri.’ Ago lidri cini ozana tadri gwo ekye: ‘Amen!’
26 “ ‘Latri ka'do 'dise käti ago koro ota ŋgaemba ono ro ko 'do dri.’ Ago lidri cini ozana tadri gwo ekye: ‘Amen!’
© The Holy Bible in Moru © The Bible Society in the Sudan, 2000