Otadele 17 - The Holy Bible in Moru (BAIBOLO ALOKADO) (MB)

1 “Ko ämiri ti kode timele se mämbi be togboṛo ro iyi olone tori ro OPI Lu amiro ri; tana ya OPI ro orivoya osoro ŋga inye 'do lomvo.

2 “Aba ondro ka'do manoaza kode toko aza ni alo aza 'ba'desii amiro se Opi LU amiro kozobe ämiri 'do yasi ye takozi te OPI ri tao'ba ndaro peresi, 3 lu azaka mätuna si ago ruindu si rigye kode kitu yi kode imba yi kode 'bi'bi yi; se ko ota OPI ro voro 'do. 4 Ondro ka'do itite ämiri kode nyeri ta inye 'do bete, 'dooko nyeji tavona ti'deti'de. Ondro ka'do tana 'do ka'dote taŋgyero anjioko tase undiro inye 'do a'dote Yisaraele ya, 5 'dooko ämiri manona kode tokona 'do urune lofone tesi ni 'ba'desi na 'do yasi ago nda ovone ṛi kuni si. 6 Caoko, toto ondro ka'do tazevoedre'bai ka'dote ritu kode nätu oko a'dena gwo nda ufune; oko ko nda ufune ondro ka'do tazevoedre'ba ka'dote toto alodi owo. 7 Tazevoedre'bai ri ni kuni ovone käti 'dina 'do lomvo, 'dooko anjoko lidri ro o'dena gwo 'dina 'do ovone kuni si; mìnana ta undiro nonye ono liti 'do yasi.

8 “Ondro vure aza ka'dote rritiro oyene ämiri, oso ta drimbi ro kode ta lomvo ogaro äträ kode tase lakole 'dise äfube ndi 'dise kufu 'di be roya 'do be, kode vure azaka se mitiro 'ba 'desii amiro yasi, 'dooko ämiri oyine vose mätu ro OPI ka oyebe onjine 'do ya, 9 ago nyìti kohanii se Lewe'bai ro 'do ri ago vureope'ba se kama ya tuna 'do si 'do ri, ago mì'ba ànya katayi tase oyene tana ro 'do ämiri. 10 'Dooko ànya itinayi tana 'da ämiri ni lau, ago ämiri oyene oso se ànya kayibe itina ämiri 'do ronye. 11 Mìletadri tavousu ànyaro ro, ago mìso ŋgaemba ànyaro voro. Mìkuko ni tase cini ànya kata tana be oyene yasi. 12 'Dise koro ta vureope'ba kode kohani se kama ya 'do ro kote, ndi nda ufune, tana mìnana tase undiro nonye ono ni Yisaraele yasi liti 'do yasi. 13 'Dooko lidri cini erina tana 'da, ago a'donayi 'da turiro, ago 'diaza unina kote ta oyene taoroako si tona.

Ŋgaemba ta 'Bädri'ba rota

14 “Ondro mikyi miru wari se OPI Lu amiro kabe ozona ämiri 'do te ago mirite kigye lau oko, 'dooko mi'dena gwo tausune mikye: ‘Màle 'bädri'ba ämäri oso tu'dei se cini gbikyi ama lomvosi iyi ronye.’ 15 Ämiri 'dise Opi Lu amiro kabe onjina o'bane ayani 'bädri'ba ro ämidri. Beṛo ndäri a'done ni lidri modo amiro lakosi; mì'ba 'diatra ko 'bädri'ba ro ämidri. 16 Ko 'bädri'ba ri a'done farasii be amba kyila'bai ndaro ri, ago ko ndäri lidri ozone Ezipeto ya farasii ogyene, tana OPI ata ṛote ämiri ekye: ‘Ko ämiri ogone lau alona.’ 17 Ko 'bädri'ba ri a'done 'ditoko be amba, tana 'do o'bana nda ndi ruodine ni OPI resi; ago ko ndäri a'done mo'di ndi logo läguläguro be amba andivo ndaro ri. 18 Ondro nda ka'dote 'bädri'ba ro oko, ndäri gyere buku ota ro OPI ro egyine iri, buku se ṛo kyeno kohanii Lewe'ba ro kombabe drigye 'do. 19 Ndäri buku 'do o'bane lototi ndare ago uzine tu cini ori ndaro rosi, 'dooko nda unina ta OPI Lu ndaro ro turi ro ndi ago orona ota se cini kigye 'do ndi 'diriro. 20 'Do lagana nda zo ni tausuvoya ekye yi ni kadopara ndrani Yisaraele'bai azi ndaro ri ago ni ota OPI ro oroakona yasi liti cini yasi. 'Dooko nda mirina 'di ndi ndroa na amba, ago zelevoi ndaro mirina 'da ndroa na amba Yisaraele ya.