Musa go Usu Ota te Kpa To'di
(Ofo 34:1-10)1 “'Dooko OPI go ata kpate märi tu ana si ekye: ‘Mipa kuniŋwà kalakparo ritu oso se käti ana ronye ago nyede sänduku ce ro, 'dooko nyitu mare kuru 'bereŋwa dri. 2 Megyina ta 'da kuniŋwà kalakparo kwoi dri oso se megyibe kuniŋwà kalakparo käti se mifube ana dri ana ronye, 'dooko miri ànya o'bane sänduku ya.’
3 “Ta'dota mede sänduku te ni ce weri ro yasi, ago mapa kuniŋwà kalakparo ritu te oso se käti ana ronye ago moyite ànya be 'bereŋwa dri. 4 'Dooko OPI egyitate kuniŋwà kalakparo ritu kwoi dri kpa oso se nda kegyibe käti ana ronye, Ota 'Bute se nda kozobe ämiri ni asi yasi tuse mìmbikalabe 'bereŋwa pa ana si ana. OPI ozo ànya te märigye, 5 ago mefote vuru ni 'bereŋwa drisi. 'Dooko ma'ba ànya te sänduku se medebe ana ya oso OPI kozo ota na be ronye, ago ànya riyite 'du lau.”
6 (Lidri Yisaraele ro eto oyite ni koro se lidri Jaakana ro ro ana yasi, ago oyiyite Mosera ya. Arona drate lau ago asete lau, ago ŋgwa ndaro Eleazara go a'dote kohani ro vo ndaro ya. 7 Ni nasi ànya oyite le Gudegoda ya ago le Jotebata ya, vose orivoya goloŋwà gyi robe ana ya. 8 Ago tu ana si OPI di lidri 'bakala Lewe ro rote Sänduku Tao'baro ro uŋgyine, ruindune ndäri kohanii ro ago 'di äṛune ävuru ndaro ya oso. Tu kwoi ya ono ronye. 9 Ta'dota 'bakala Lewe ro a'dote teinye vo ako ago drimbi ako oso 'bakalai azi ka'dobe sina ronye; Oko drimbi ànyaro teni a'do ro kohanii ro OPI ro 'do, oso OPI ko'ba tana be ronye.)
10 “Marite 'bereŋwa dri oso se tu käti ana si ronye, kituna 'butesu ago ŋgäkyina kpa 'butesu. Ago OPI go eri ta maro kpate ago letadrite ko ami tufune. 11 'Dooko Opi atate märi ekye: ‘Nyugu lidri ono lepena, tana ànya kuruyi wari se ma'ba tana be ozone zutui anyaro ri ana robe.’
Ŋgase Lu Kolebe
12 “Ka'do inye, lidri Yisaraele ro, nyèri ta ŋgase OPI Lu amiro kolebe ni ämirigyesi ono ro: Anjioko mìro OPI Lu amiro ago mìye tase cini nda kota ami be sina 'do. Nyùlu nda, nyìnduru Opi Lu amiro ri ya cini amiro si, ago lindri cini amiro si, 13 ago mìro ota ndi tase cini nda korabe iyi. Ma ànya ozo ämiri ondro ono ta kandrakado amiro rota. 14 Tana ca vo'buyakuru se lekuru ono orivoya OPI Lu amiro ro; 'bädri kpa orivoya ndaro, ndi ŋgase cini kigye iyi be. 15 Oko tana OPI lu zutui amiro tawi ago nda nji ami zelevoi ànyaro te, ni tu'dei azi cini lakosi oso yauono ronye. 16 Dia ka'do inye, nyà'do taoro be OPI ri ago nyà'du kote taeriako tona. 17 Tana OPI Lu amiro orivoya Lu lui ro ago Opi opii ro. Nda orivoya Lu 'desi ago mbaraekye, ago ṛo turine turi. Nda gyele 'di ko, ago nda le ta miogye ro ko. 18 Nda ka vure kenvoi ndi ävuzii be ro oyeni ŋgye, ago ka 'diatra se kayibe ori lidri amaro yibe lu ni, ka ŋgaonya ndi boŋgo be ozona ni ànyari. 19 Ka'do inye, nyulu 'dise atra ro, tana nyà'do kpate atrai ro 'bädri Ezipeto roya. 20 Mìro OPI Lu amiro, nyìnduru ago nyämätu toto nda ayani. Nyà'do 'diriro ndäri ago mì'ba tao'ba toto ävuru ndaro si ayani. 21 Nyä̀räṛu nda tana nda ni Lu amiro owo, ago mìndre tase 'desi ŋgaopeṛe ro nda koyebe ämiri ta ono te mi modo amiro si. 22 Tuse zutui amiro koyibe Ezipeto ya ana si, ànya toto orivoya 'butenjidrieri, oko yauono OPI Lu amiro 'ba ami te lowa ro oso 'bi'bi vo'buyakuru ro ronye.
© The Holy Bible in Moru © The Bible Society in the Sudan, 2000