Ota 'Bereŋwa Sinai E'be ro
1 Kwoi ni ata se Musa katabe lidri cini Yisaraele ro ri vocowa ya tasi Golo Yaradene roya owo. 'Dooko ànya orivoya vocowa Sufa lomvo, lakole Parana ro 'ba'desii Tofelea, Labana, Azerota, ndi Dizahaba be roya. 2 Vo 'do ka u'du uru 'butealo foalo abaza ni 'Bereŋwa Sinai yasi le Kadesa Baranea ya liti 'Bereŋwa Seira ro yasi. 3 Ndroa 'butesu se ànya ke'be Ezipeto be, u'du käti imba 'butealo foalo na rosi, Musa iti tase cini OPI kota nda be itine lidri cini ri ana te ànyari. 4 Ta ono a'dote tuse nda kope Siona, 'bädri'ba Amora'bai ro se kimirivobe Esebona ya ago Ogo 'bädri'ba Basana ro, se kimirivobe Asetarota ndi Edrei be ya kai te ṛe ana vosi. 5 Ondro lidri Yisaraele rote orivoya tasi Golo Yaradene roya wari Moaba roya oko, Musa eto ota ono tazevona edrena te.
Nda ekye: 6 “OPI Lu amaro atate ämäri 'Bereŋwa Sinai pa ekye: ‘Mirite madaro 'bereŋwa ono pa. 7 Miŋga teri ago nyugu oyi teri. Nyoyi 'bädri lutu ro Amora'bai roya ago wari se cini lomvoigyesi ana yasi le Araba ya, le 'bädri lutu ro ago vo delero yasi, wari se Negebe ya ya, ago le Gyi'desi Mediteraneana kala. Nyoyi wari Kanana roya ago wari Lebanona ro ya. Nyoyi ndi le golo 'desi ya Golo Eferata ya. 8 Maka'da wari teni ämiri wo, nyòyi ago miru ri wari se ma, OPI, ma'ba tana be ozone zutui amiro, Abarayama, Yisika, Yakoba, ndi zelevoi ànyaro be ri owo.’ ”
Musa ka Vureope'bai Ka'dana
(Ofo 18:13-27)9 Musa atate lidri ri ekye: “Tuse ama bedri 'Bereŋwa Sinai pa ya mititate ämiri makye: ‘Mänina kote ugu ami lepene iṛe. 10 OPI Lu amiro 'ba ami te litine ta'dota tu ono ya ami te amba oso 'bi'bi vokuru ro ronye. 11 Ka'do inye OPI, Lu zutui amiro ro, ko'ba ami litine pere kutu ro amba ndrani nya'do be yau ono drisi ago käṛu ami oso nda ko'ba tana be ronye. 12 Oko mäŋgyina ŋgaläŋgyi kalaope amiro edena ro iṛe eŋwanyeya? 13 Mìnji lidri tavouni'ba, tauni'ba ndi 'di se ni ta amba te iyi azaka ni 'bakalai cini yasi, ma'ba ànya robe a'done drikaca be ämidri.’ 14 Ago mìletadrina ṛote mikye tase nyata be ono orivoya kadoro oyene ämäri. 15 Ta'dota märu dri'bai 'bakalai amiro ro se tavouni'ba ro ago se ni ta amba te iyi te, ago ma'ba ànya te a'done drikaca be ämidri. Azakana a'done kutu alo (1,000) dri, azaka kama alo (100) dri, azaka 'butenji dri, ago azaka 'butealo dri. Ago maka'da dri'bai losi ro kpate ni 'bakalai cini amiro yasi.
16 “Ago tu gi ana si mozo ŋgaemba ono te vureope'bai amiro ri makye: ‘Ämiri kalaope se kabe a'do lidri amiro lako 'do tana erine. Mìye vure kalaope lakole Yisaraele'bai ritu roya, kode vure lakole Yisaraele'bai aza ro atrai se koribe ami lako 'do be ya ŋgye ro. 17 Nyegyele 'di ko vureopevoya; oko mipe vure 'di giṛiŋwa ro kode 'di 'desi ro cini ojoojoro. Nyà'do ko turiro ni 'diaza ri, tana vureope ni Lu ro. Ondro ka'do vure aza ka'dote rritiro ämiri, nyezi mare, mape vure na 'do robe.’ 18 Ago tu gi alo ana si mata ta ŋgase cini oyene ämiri rote.
Azo Kamari'bai teni Kadesa Baranea yasi
(Oti 13:1-33)19 “Mè'be 'Bereŋwa Sinai te ago moyite vo cowa se ndräläkäkä uturi turi liti se kabe oyi 'bädri lutu ro Amora'bai roya ana yasi, oso Opi Lu amaro kota ama be ronye, madale masate Kadesa Baranea ya. 20 Ago matate ämiri makye: ‘Yauono nyèsate 'bädri lutu ro Amora'bai roya, se OPI Lu amaro, kozobe ämäri ono ya. 21 Mìndre, OPI Lu amiro ozo wari ono te ämiri. Nyòyi ago mìru oso OPI, Lu zutui amiro kozo ota na be ämiri ronye. Nyà'do ko lä'bilä'biro kode turiro.’
22 “Oko ami cini nyìkyite mare ago nyàtate mikye: ‘Mì'de mazo lidri azaka mileya wari ana marine ämäri, ago ànya kitiyi ta liti se ämäri urune ago beti 'bakicii se lau ana tana robe ämäri.’
23 “Tase ana landrete takado ro, ta'doro manji lidri 'butealo foritu te, ba alo alo ni 'bakala alo alo yasi. 24 Ànya oyiyite 'bädri lutu ro ya le Vodelero Esekola roya ago mariyite. 25 Ànya eziyi doŋgo azaka 'bädri ana rote ämäri, ago logoyi tate ämäri ekye wari se OPI Lu amaro kozobe ämäri ono orivoya kadopara.
26 “Caoko mìgatezo oyine wari se ana ya ago nyògbote ota OPI Lu amiro robe. 27 Nyà'dote driovivoya zo boŋgoro amiro yasi mìkye: ‘Tana ya OPI ro orivoya osoro ama lomvo, nda lofo ama te ni Ezipeto yasi toto ama ozone Amora'bai kwoi ri, ànya kutufuyi ama robe. 28 Mòyinate eŋwaro ya? Ama orivoya ädrupii amaro se màzobe kwoi eŋgayi ya amaro te ekye lidri se kai orivoya mbaraekye ago lombaekye ndrani ämäri drisi, ago 'bakicii ànyaro 'desii ro ago tiṛiwiṛaro be. Màndre lidri dämbäṛäṛäro te lau!’
29 “Oko matate ämiri makye: ‘Nyà'do ko lä'bilä'biro ago turiro ni lidri kai ri. 30 OPI Lu amiro se ka ami lepete ni ono, nda andivona oyena kyila 'da ta amiro ta, oso mìndre nda koyebe Ezipeto ya 31 ago vo cowa ya ana ronye. Mìndrete Opi Lu amiro ezi ami lepe ni liti ndrelekpekpe ono yasi madale esane le vose ono ya, oso täpi kabe ŋgwa ndaro lepena ronye.’ 32 Oko ta nonye ono ka'do ca, caoko mìyi ta kote OPI Lu amiro ya, 33 nda oyi gica ondoalo mile amiro ya vo usune ämiri gawa amiro otoza kigye owo. Nda 'dete mile amiro ya asi cariro si ŋgäkyi si liti ka'daza ämiri ago 'dikolo cariro si kitu si.
OPI Ka Yisaraele Eza
(Oti 14:20-45)34 “OPI eri driovi amiro te ago a'dote kyilaro, ta'doro nda äṛurute ekye: 35 ‘Alo aza ami gi kovole'bai takozioye'bai ono ro ri ocine wari se kado ma'ba tana be ozone zutui amiro ri ana ya te i'do. 36 Toto Kaleba ŋgwa Jefune ro ocina ni kigye, ago mozona wari se nda kamaribe ana ndi ndäri ago zelevoi ndaro ri tana ndana a'dote 'diriro ma Opi ri.’ 37 OPI a'do kpate kyilaro mabe ta amiro si ago atate ekye: ‘Ca mi Musa, ocine wari ana ya i'do. 38 Oko Yosua ŋgwa Nuna ro kundueŋga'ba miro ocina ni. Nyotomba ndana tana nda lepena Yisaraele ni wari ana urune.’
39 “Ago nda ekye: ‘Oko ŋgaga amiro se mikye kyila'baazii uruna 'do, ŋgaga se drigba giṛiŋwà ro ni ta takado ndi ta takozi robe dri ko ono, ocinayi ni wari se ana ya. Mozona wari ana 'da ànyari, ago ànya urunayi 'da. 40 Oko ami lidri ono, migo kovole vocowa ya, liti se kabe oyi Gyi'desi Okaro roya ana drisi.’
41 “Ndi nyòlogo tate mikye: ‘Màye takozi te OPI lomvo. Oko yauono mòyina ndi kyila oyene oso OPI Lu amaro kota ama be ronye.’ 'Dooko ami alo alo nyède ami te kyila oyene, ago nyùsu tate mìkye a'dona ndi rritiako 'bädri se lutu ro ana urune.
42 “Oko OPI atate märi ekye: ‘Nyata ànyari mikye: Nyoyiko kyila oyene, tana mänina ko a'done tro ami yibe ago kyila'baazii amiro opena ami ndi ṛe.’ 43 Miti tase OPI katabe 'do te ämiri, caoko nyèri tana kote. Nyògbote ota Opi ro be, ago nyòyite 'bädri lutu ro ya driuŋgyi si. 44 'Dooko Amora'bai se koriyibe 'bädri lutu ro ana dri iyi efoyite ämidri oso lowa kumuepe ro ronye ago njayi ami te. Ànya peyi ami te ṛe 'bädri lutu ro Seira roya le Horema ya. 45 Ta'dota mìgo nyègo te kovole ago nyàyodrite OPI ri oko Opi eri driayo amiro kote, ago ti ta amiro kote.
Ndroa se Vocowa ya iyi
46 “'Dooko mìrite madaro Kadesa ya.
© The Holy Bible in Moru © The Bible Society in the Sudan, 2000