Daniele 1 - The Holy Bible in Moru (BAIBOLO ALOKADO) (MB)

Taiti ta Daniele rota ndi Bereazii ndaro be

Agoànji Goko Nebukadenezara roya

1 Ndroa nina 'dimiri Jehoiakima 'bädri'ba Yuda ro rosi oko, Nebukadenezara 'bädri'ba Babelona ro ikyi te ago mudri Yerusalema rote. 2 Opi ozo Jehoiakima 'bädri'ba Yuda ro te drì ndaro ya, rukä lakazà Yekalu ro robe. Nda ugu ànya te le Babelona ya, ago dro lakazà alokado se kai te voŋgaodroro lui modo ndaro roya.

3 'Bädri'ba ta Asepenaza, dri'ba 'desi losiro ndaro te, agoànji azaka ezine ni kamba'bai Yisaraele'bai ro lakosi, ni zelevo 'bädri'ba ro kode 'di 'desi ro yasi. 4 Ànyari a'done teinye mämbiako liŋgyiliŋgyiro, tauni kado ta cini robe, embaembaro tavouni be, tauniuniro ndrindri, ago unina ndi ruindune kadoro zo 'bädri'ba roya. Asepenaza modo ri ni ànya embane kala ndi taegyi Babelona'bai rosi. 5 'Bädri'ba 'ba tate ŋgaonya toco ndi vino kado se 'bädri'ba kabe onyana ago umvuna 'do modona ozone ayani ànyari. Ànya embane ndroa nätu, ago voigyesi oko oloci ànya robe ruindune 'bädri'ba ri. 6 'Dise anjibe 'dina kwoi lako ni Daniele, Anania, Misaela ago Azaria, se cini kwoi ni 'bakala Yuda ro yasi. 7 Dri'ba 'desi losi ro ozo ävuru aza te ànyari, zi Daniele te Beletesazara, zi Anania te Sadaraka, zi Misaela te Mesaka, ago zi Azaria te Abedenego.

8 Daniele usutate ko andivo ndaro enjine ŋgaonya toco ndi vino se 'bädri'ba kabe umvuna ana si, ta'dota nda eji Asepenaza te ole ozone ndäri ko ŋga iyi onyane ago umvune, 9 ago Lu 'ba Asepenaza te yauni ka'dane ago tadriolene Daniele ri. 10 'Dooko Asepenaza atate Daniele ri ekye: “Ma orivoya turituriro ni 'bädri'ba ri, tana nda ra ta ni ämiri ŋga iyi onyane ago umvune, oko ondro ka'do nda kondre ami bete orweorwero ndrani agoànji azi amiro ri, 'dooko nda ufuna ma ndi.”

11 'Dooko Daniele atate mano se 'desiro Asepenaza kaka'dabe vo Daniele, Anania, Misaela ndi Azaria be ro ondrene ana ri ekye: 12 “Molo'baru miri, nyojo ta ama ruindu'bai miro kwoi ro u'duna 'butealo; u'du kwoi ya mi'ba ozo toto agba ayani onyane ndi gyi be umvune ämäri. 13 'Dooko mindre a'do toto amaro agoànji se kayibe ŋgaonya se toco 'bädri'ba ro onyana 'do be, ago miye ta ama ruindu'bai miro ri oso mindre ama be ronye.”

14 Nda le tase ànya kejibe ana tadrina te ago ojo ta ànyaro te u'duna 'butealo. 15 Ondro u'du 'butealo kokyete oko, andre be lomvo ànyaro a'dote kadopara ago oseosero ndrani agoànji se kabe ŋgaonya toco 'bädri'ba ro onyana iyi drisi. 16 Ta'dota voondre'ba ana na ŋgaonya se toco ndi vino se 'bädri ra tana be ozobe ànyari ana te ago nda go ozote agba ayani onyane ànyari.

17 Lu ozo tauni, tauzi ndi tatenyi be te kadoro agoànji se su kwoi ri. Ndra na, nda ozo tauni takaci rulofo ndi tori itiro be te Daniele ri.

18 Ondro ndroa se nätu 'bädri'ba kotibe agoànji ana eziza nda kandra ana kokyete oko, Asepenaza ezi ànya te Nebukadenezara kandra. 19 'Bädri'ba atate ànya yibe, ago ànya cini lakosi, nda usu 'diaza kote oso Daniele, Anania, Misaela ndi Azaria be ronye; ta'dota oloci ànya te ruindune 'bädri'ba ri. 20 Tase cini 'bädri'ba kabe ejina kode rriti se cini nda kabe tana itina, lidri su kwoi niyi ṛo kadopara perena 'butealo ndrani tetedri'bai ndi taläkä'bai cini se 'bädri ndaro ya drisi. 21 Daniele rite goko 'bädri'ba roya lau madale Sairasi 'bädri'ba Peresia ro ru Babelona gwo.