Amosa 1 - The Holy Bible in Moru (BAIBOLO ALOKADO) (MB)

1 Kwoi ni orivoya ata Amosa, se ni aloaza lekye'bai ro ni 'ba'desi Tekoa yasi ro. Lu ka'da ŋgase cini kwoi te Amosa ri ta Yisaraele rota, tu Uzia 'bädri'ba Yuda ro rosi, ago tu Yeroboama ŋgwa Yoasa ro 'bädri'ba Yisaraele ro rosi, ndroa ritu käti dri teinye ägbigbi ri usiako. 2 Amosa atate ekye:

“OPI ka ezi totre ni 'Bereŋwa Zaiona yasi;

ata ndaro ka uhwe ni Yerusalema yasi.

Lowoi wite karagyi,

ago käyi 'Bereŋwa Karemela dri lunyite.”

Vure Lu ro Oriazii Yisaraele ro Lomvo

Siria

3 OPI ekye: “Lidri Damaseka ro yeyi takozi te kpe kpe, ta'doro mänina ko ànya e'bene eza ako; tana ànya yeyi lidri Gilada rote koziro siomba si. 4 Ta'dota masona asi 'da zo'desi 'Bädri'ba Azaele ro dri, ago ujena tiṛi mbaraekye 'Bädri'ba Benadada ro 'da riya. 5 Motoŋgona dereŋwai Damaseka ro 'da, ago manana lidri 'da ni vodelero Avena ro yasi ndi 'dimiri'ba Betedena robe. Uguna lidri Siria ro 'da kamba'ba ro wari Kiri roya.”

Filisitia

6 OPI ekye: “Lidri Gaza ro yeyi takozi te kpe kpe, ta'doro mänina ko ànya e'bene eza ako, tana ànya ruyi tu'de ono te cini ago gyeyi ànya te iyeäṛi ro lidri Edoma ro ri. 7 Ta'dota masona asi 'da tiṛi Gaza ro dri ago ujena tiṛi mbaraekye anyaro 'da riya. 8 Manana lidri 'da ni Asedodo yasi ndi 'dimiri'bai 'bakicii 'dimiri'bai Asekelona robe. Mezana 'bakici Ekerona ro 'da, ago anjoko Felesete'bai ro se ke'bebe iyi todrana 'da.”

Tura

9 OPI ekye: “Lidri Tura ro yeyi takozi te kpe kpe, ta'doro mänina ko ànya e'bene eza ako tana ànya uguyi tu'de ono te le wari Edoma roya, ago ätiyi tao'ba a'doro bereazi ro se ànya ko'bayibe ana kote. 10 Ta'dota masona asi 'da tiṛi 'bakici Tura ro ro dri, ago ujena tiṛi mbaraekye anyaro 'da riya.”

Edoma

11 OPI ekye: “Lidri Edoma ro yeyi takozi te kpe kpe, ta'doro mänina ko ànya e'bene eza ako, tana ànya lanjayi ädrupii ànyaro Yisaraele'bai te bando si, ago ka'dayi yauni kote ànyari. Kyila ànyaro a'dote okyeako, ago ànya 'bayi kyila ànyaro te orine 'duro. 12 Ta'doro masona asi 'da 'bakici Temana ro dri ago ujena tiṛi mbaraekye Bozera ro 'da riya.”

Amona

13 OPI ekye: “Lidri Amona ro yeyi takozi te kpe kpe, ta'doro mänina ko ànya e'bene eza ako, tana ànya tosiyi 'ditoko se kovoro ro yana te Gilada ya, tana ànya leyi kishwe ànyaro afone bäräŋgälä. 14 Ta'doro masona asi 'da tiṛi 'bakici Raba ro ro dri ago ujena tiṛi mbaraekye anyaro 'da riya. 'Dooko tu ana si amo kyila oyero a'dona 'da, ago kyila oye perena vo 'da oso oligbiriṛi be ronye. 15 Äruna 'bädri'ba ànyaro ndi dri'bai losi ro ndaro be 'da midiro.”