Losi Lazo'bai ro 24 - The Holy Bible in Moru (BAIBOLO ALOKADO) (MB)

Yudai Kicuyi Paulo te

1 U'du nji vosi oko Anania Kohani Fopara oyite Kaisaria ya rukä 'di'desii robe ago ota uni'ba aza se äzite Teretulu ana be. Ànya edreyite Wari'ba Felikisi kandra ago itiyitate Paulo lomvo. 2 'Dooko äzi Paulo te zo ya, ago Teretulu eto nda kicute, nonye ekye: “Mi 'desi se kado para! Tavouni miro a'doro dri'ba ro ono 'ba marite liatokpero tuna te amba, ago ŋga kado amba ayete ta kado 'bädri amaro rota. 3 Màle taliatokpe ono ri a'done ago tu cini si, ago maye aro'boya amba miri.

4 “Male ko saa miro enjine amba, caoko, ma mi eji yauni si ago ta amaro erine aree. 5 Musu mano ono te 'di koziro rriti ozoozoro, nda 'ba Yudai te amone kyilaro 'bädri cini yasi, ago nda kpani dri'ba gboko Nazareta'bai ro. 6 Nda ojo kpate Yekalu enjine, ago märu nda te. 8 Ondro nyeji mano ono te, mi andivo minina ŋgase cini mìkicu nda be tana ro tana 'da ni nda resi.” 9 Yudai letadri ŋga kicu ono rote ago atayite ekye, ta cini ono orivoya taŋgye yi.

Paulo ka yi Gaga Ata si Felikisi Kandra

10 'Dooko Wari'ba atate Paulo ri ta itine, ago Paulo atate ekye:

“Mänite mirite vureope'ba ro Tu'de ono dri ndroa na amba, ago ma orivoya yai'dwesi ta andivo maro ro itine mi kandra. 11 Andivo miro mini ṛote, u'duna ko ndrani 'butealo foritu drisi moyite Yerusalema ya mätune. 12 Yudai usuyi ma kote ugu kaladiṛivoya 'dialo aza be Yekalu ya, usuyi ma kpa ko ugu ya lidri ro eŋgavoya, ca zoitaeriro ya kode ca 'bakici ya. 13 Ànya ka'dayi taŋgye tase ànya kikicuyi mabe tana ro kpa ko miri. 14 Ma ta ono o'bane unine miri: Ma Lu zutui amaro ro mätuna ugu oso si Liti Opi ro se ànya ekye kowe yi ono vo. Oko mama kpate ŋgase cini egyibe Ota Musa roya ago bukui nebii roya ono ya. 15 Ma kpa mio'ba alo ono be Lu ya oso ànya se kwoi ka'do be sina ronye, anjioko lidri se äzibe kado ago kozi efona 'da ni avo yasi. 16 Ago ma andivo mojote ondoalo a'done tavousu ŋgye ya robe Lu kandra ndi lidri be.

17 “Ndroa amba a'do maro i'do Yerusalema ya vosi, moyite lau parata ugune lidri modo maro ri ago kpa tori olone. 18 Ondro ma ugu ta ono oye nonye oko, ànya usuyi ma te Yekalu ya la'bi 'diwäṛiro ondena märi vosi owo. Lowa i'do mabe ago tagburu i'do. 19 Oko rukä Yudai ro ni wari Asia ro yasi orivoya lau; andivo ànyaro beṛo ikyine mikandra ànya kikicuyi ma robe ondro ànya ka'doyite ta aza be malomvo owo. 20 Kode lidri gi noŋwa kwoi kitiyi taenji se ànya kusuyibe mayebe koziro tuse medrete Taäyi'bai kandra ana si, 21 e'be gialo ta alodi medrete tuse medrete ànya kandra ana si makye: ‘Nya vure maro opena ondro ono ta taoma se ekye avo efona 'da ono rota.’ ”

22 'Dooko Felikisi se ni ta Liti Opi ro ono ṛote, shwe tu te mileya. Atate ànyari ekye: “Ondro otaozo'ba kyila'bai ro Lusia kesate oko, marana tu vure ro 'da.” 23 Nda ta dri'ba kyila'bai ro se kabe vo Paulo ro ondre ana te nda gagane, ago dritai ozone ndäri ago ole ozone bereazii ndaro ri ŋga ozone ta lemeri ndaro rota.

Paulo, Felikisi ndi Durusila be Kandra

24 U'du fere vosi oko Felikisi ikyite toko ndaro Durusila be, se orivoya Yuda yi. Nda zo lazo te Paulo vo ago eri ta ndaro te ondro nda ka ugu ta iti ta taoma Kristo Yesu ya rota owo. 25 Oko ondro Paulo kugu ta iti te ta takado rota, ta andivo rita rota, ago ikyi Tu Vureopero rota oko, Felikisi a'dote turituri ro ago atate ekye: “Yauono nyoyi amiro ri, mago mäzina mi 'da ondro manji tuna te owo.” 26 Ago tausu ya nda orivoya mio'ba be ekye Paulo ozona parata 'da iri tana ta ono ro nda zi Paulo te ondoalo atane nda be.

27 Ndroa ritu kälävute oko Porekio Feseto gorite vo Felikisi roya wari'ba ro. Oko tana Felikisi le Yudai i'dwene ndi nda e'be Paulo te 'du kamba ya.