Losi Lazo'bai ro 21 - The Holy Bible in Moru (BAIBOLO ALOKADO) (MB)

Oyi Paulo ro Yerusalema ya

1 Màye mede te ànyari, ago mòyite. Màsivote ŋgyero toŋbo si, màzate Kosa ya; kyenonosi oko màsate Rode ya, ago ni nasi mùgu oyite Patara ya. 2 Mùsu toŋbo te ka ugu oyi Foenesia ya, mòyite ago màdite toŋbo si. 3 Ago mèsate vose mä̀ni ndi drî Saiporosi ro ondrene ya, ago 'dooko mä̀dite ŋgäṛiŋwa na yasi mòyite Siria ya. Mòyite kototi Tura roya, se lakazà toŋbo ya abe lofona kigye ana. 4 Mùsu taoma'bai azaka te lau ago màrite ànya yibe u'duna njidrieri. Mbara Tori Alokado rosi ànya atayite Paulo ri ko oyine Yerusalema ya. 5 Oko ondro tu amaro oriro ànya yibe kokyete oko, mè'be vo ana te ago mùgu oyite liti amaro ya. Vo ànyaro cini otoyikalate voaloya 'ditoko ndi ŋgàga ànyaro be, oyiyite ama yibe ni 'bakici yasi gyikala, lau ama cini màso kayate ago mä̀mätute. 6 'Dooko màye mede te azi ri, ago mòyi màcite toŋbo ya ondro ànya kayite ogo 'bäru owo.

7 Mùgu oyite, mùgu udite toŋbo si ni Tura yasi le Petolemai ya, lau màye mede te taoma'bai ri ago màrite ànya yibe u'duna alo. 8 Kyenonosi oko mè'be vo ana te ago mèsate Kaisaria ya. Lau màrite zo Filipo lazolari'ba roya, se ni alo aza lidri njidrieri se anjibe ruindu'bai ro Yerusalema ya ana ro. 9 Nda orivoya ndiriŋwa ogyeako be su se peyi lazo Lu rote. 10 Màrite lau u'duna amba oko nebi se äzibe Agabu ana esate ni Yuda yasi. 11 Nda ikyite amare ru kyini kunduro Paulo rote, embe pa modo ndaro rote ndi drí be sina, ago atate ekye: “Ono ni tase Tori Alokado kata tana be owo ekye: Kuzupi kyinikunduro ono ro Yudai Yerusalema ya embane nda 'da oso ono ronye, ago ànya ozonayi nda gwo Atrai ri.”

12 Ondro meri ta ono te oko, ama ndi azii lau ana be molo'barute Paulo ri ko oyine Yerusalema ya. 13 Oko nda zatadrite ekye: “Nyà 'do e'di oye, ugu liyi si ono ronye nyà ya maro okye etaya? Ma orivoya nja ko toto embene embe Yerusalema ya oko kpa odrane lau ta Opi Yesu rota.”

14 Ago ondro mä̀ni kote nda leyene oko, me'be nda te makye, ayena te ole Opi ro ayani.

15 U'du azaka lau vosi oko, mä̀ru ŋga amaro te ago mòyite Yerusalema ya. 16 Rukä taeri'bai ro ni Kaisaria ya oyiyi kpate ama yibe ago uguyi ama te 'ba Menasona roya, mano se mà ugu oyi be orine sina ana. Nda ni Saiporosi yasi, ago alo aza taoma'bai se ṛo kyeno ana ro.

Oyi Paulo ro Yakoba Ondre

17 Ondro mèsate Yerusalema ya oko, taoma'bai ruyi ama te yai'dwesi. 18 Kyenonosi oko Paulo oyite ama yibe Yakoba ondrene, ago 'desii känisa ro cini orivoya. 19 Paulo ye mede te ànyari ago iti ta cini se Lu koyebe Atrai lako losi oye ndaro si tana te ànyari. 20 Ta ndaro erina vosi oko, ànya cini räṛuyi Lu te. 'Dooko ànya atayite ekye: “Ädrupi Paulo, mindrete Yudai du kutu ro a'doyite taoma'bai ro, ago ànya orivoya Ota äti'bai. 21 Ititate ànyari ekye nya ni Yudai se cini koriyibe 'bädri Atrai ro yasi embana Ota Musa ro e'bene, nya ugu ata ànyari ko ŋgwai ànyaro olone ŋbiṛiro ago ko osone la'bi Yudai ro vo. 22 Ànya kaoye ta erine ekye nyesate. Ka'do inye, ayena e'di ya? 23 Ono ni tase màlebe miri oyene owo. Lidri orivoya su noŋwa se 'bayi tao'ba te. 24 Nyoyi ànya yibe ago nyodro'beru ànya yibe la'bi 'dio'baro wäṛiro roya ago nyozo ŋgase ànyari ozone ŋgana ni 'dooko ànya uvunayi drî ànyaro ndi! Liti ono yasi 'dicini uninayi ndi anjioko taŋgye aza i'do tase itibe ànyari ta miro ta ono ya, oko anjioko mi andivo nya ori Ota Musa ro voro. 25 Oko Atrai se ka'dobe taoma'bai ro, màzo waraga te ànyari taitisi ànyari màratate anjioko beṛo ko ànyari ŋgaonya se ozobe lui awi ri onyane, kode kari, kode ŋga 'ba ro se ädu gboro na udu, ago beṛo andivo ànyaro lagane ni ronyi oyevoya.”

26 Ago Paulo ru lidri kai te ago kyenonosi ye la'bi'dio'baro wäṛiro te ànya yibe! 'Dooko nda oyite Yekalu ya ago ozo u'du se orine te madale ädu tu oriro 'dio'baro wäṛiro roya, 'dooko alona tori 'da ta ànya cini rota.

Äru Paulo Teni Yekalu ya

27 Oko ondro aba ädu u'du njidrieri ro ka oyete okyene oko, rukä Yudai ro ni wari Asia ro yasi ndreyi Paulo te Yekalu ya. Ànya eŋgayi ya lowa rote ago ruyi Paulo te. 28 Ànya treyite ekye: “Lidri Yisaraele ro! Miye ŋgaopa! Ono ni mano se kabe ta emba vo cini yasi lidri Yisaraele ro, Ota Musa ro, ndi Yekalu ono be lomvo owo. Ago yauono nda go ezi Atrai te Yekalu ya ago enji vose alokado ono te!” 29 (Ànya 'deyibe ta ono atane nonye tana ànya ndreyi Trofimusa ni Epeso yasi te Paulo be 'bakici ya, ago ànya kusuyibe ekye Paulo ugu nda te Yekalu ya.)

30 Tagburu larirute 'bakici yasi, ago lowa cini mute troalo ago ruyi Paulo te, ago eseyi nda te tesi ni Yekalu yasi. Ago ase käläsi Yekalu rote dori. 31 Lowa ojote Paulo ufune, ago lazo sate otaozo'ba kyila'bai Roma'ba ro ri ekye Yerusalema te twi amo kyila robe. 32 Otaozo'ba ru rukä dri'bai ro ndi rukä kyila'bai robe te ago eŋgoyivote lowa re. Ondro lidri kondre nda te kyila'bai be oko, ànya e'beyi Paulo o'bi te. 33 Otaozo'ba oyite Paulo re, ru nda te, ago ozo tate nda embene nyori ritu si. 'Dooko nda ejitate ekye: “Mano ono a'di owo ago ŋgase nda koyebe e'diyi ya?” 34 Rukä lowa ro treyite ta azaka be azakana ta to azaka be. Tagburu nonye ono si otaozo'ba kyila'bai ro ni kote tase ka'dobe taŋgyena unine, ago nda ta lidri ndaro te Paulo ugune tiṛi gawa kyila'bai ro ya. 35 Ànya tuyite le kotopa dri nda be, ago 'dooko kyila'bai ŋgyiyi nda te tana äni kote drî lowa ro o'bine. 36 Ànya cini eziyi ikyite nda vo ago uguyi totrete ekye: “Mìfu nda.”

Paulo ka Andivo Ndaro Gagana

37 Ago ondro aba kyila'bai ka oyete Paulo ugune vo tiṛi gawa kyila'bai roya oko, nda atate otaozo'ba ri ekye: “Mile gi'da märi ta aza atane miri ya?” Otaozo'ba ejitate ekye: “Inye'do nyata kala Giriki ro ndi ya? 38 Ka'do inye mi ko ni mano se Ezipeto'ba ro tu kyeno aza si ogbobe ago ugu kyila'bai kutu su (4,000) be vocowa ya kyila oyene owo ya?”

39 Paulo zatadrite ekye: “Ma orivoya Yuda yi, ätite Taresusi Silisia ya ana ya, orivoya 'di 'bakici se 'desiro ro. Rägu mi'ba mata lidri ri.” 40 Otaozo'ba ozo ole te, ago Paulo edrete kotopa dri ago kanda drí ndaro te lidri ri a'done titiro. Ondro kodriyite njuru oko, Paulo atate ànyari kala Ebere rosi.