2 Timoteo 2 - The Holy Bible in Moru (BAIBOLO ALOKADO) (MB)

Kyila'ba 'Diri Kristo Yesu ro

1 Ka'do inye, mi ŋgwa maro, nya'do mbara ro tai'dwero amaro rudro'be ya Kristo Yesu be si. 2 Miru ŋgaemba se nyeri ma be tana opevoya tazevoedre'bai amba kandra 'do, ago nyocope ànya lidri taŋgye'bai ri, se uninayi kpa ndi azii embane.

3 Nyezaru ama yibe oso kyila'ba 'diri Kristo Yesu ro ronye. 4 Kyila'ba se kabe kama iro oye dri'ba ndaro se kabe ugu ota ozo 'do usiza dro'beru kote taoye ori 'diawi robe. 5 Kyekye'ba se kabe umu kyekye ya unina ko ŋgapäṛi urune e'be gialo nda orona ota lutu. 6 Ämvuoso'ba se koye losi te mbarasi onyana doŋgo jalia ro käti. 7 Nyusu ta tase mabe atana ono ro, tana Opi ozona tauni 'da miri vona cini uniza.

8 Miyi ta Yesu Kristo ro, se eŋgate ni odra yasi, se orivoya ni zelevo Dawidi ro, oso embate Lazokado se mabe opena ya ronye. 9 Tana ma Lazokado ope, ma rueza ago embe ma kpate nyori si oso otapere'ba ronye. Oko ata Lu ro embe ko, 10 ago miŋgyi rriti ŋgacini rote ta lidri onjionji Lu ro rota, tana ànya ka'do robe kpa ŋgaoparo se kabe ikyi Kristo Yesu si ago kabe taoro äduako ezi robe. 11 Ono orivoya ata ŋgye yi ekye:

“Ondro màdrate nda be,

màrina kpa nda be.

12 Ondro mà gi'du ugu rriti iŋgyi,

mìmirina 'di kpa 'da nda be.

Ondro màga kala ndaro te

nda ogana kala amaro kpa 'da.

13 Ondro mà'do ko 'diri,

nda iro gi 'diri,

tana nda ni ko kala andivo ndaro ro ogane.”

Losi'ba se Aka'date Ŋgye

14 Nyologo ta ono tana lidri miro dri, ago nyozo ŋgaemba lämu'du ro drî ànyaro otana si Lu kandra ko kyila oyene ta atà rota. Se ye takado ko, oko ka gialo lidri se kabe taeri perena. 15 Nyojo mbara cini si mi ka'dane ŋgye Lu mile, oso losi'ba se drîna kupi kote ta losi ndaro rota ronye, se kabe lazo Lu ro taŋgye ro embana ŋgyero ronye. 16 Minaru pere ni ata luako'ba ro resi se ka gialo lidri pere lozo ni Lu resi. 17 Miemba nonye ono laba orivoya laza nyendero se kabe iza onya ronye. Lidri ritu se kembayi tase nonye ono be ni Umenaio ndi Fileto be. 18 Ànya e'beyi liti taŋgye rote ago uguyi taoma taoma'bai azaka ro gburute ugu ata si ekye efo amaro ni avo yasi tana kye ṛote nja. 19 Oko kotopa ŋgyiri se Lu kedrebe änina ko kandane; ago egyi ota kwoi te driigye ekye: “Opi ni ànya se orivoya ndaro kai te” ago “Nda se kabe ata ekye nda orivoya Opi ro beṛo ruonane ni ugu takozi oye yasi.”

20 Zo 'desi ya lakaza saani ro; deŋbele ro, ndi dritoto robe orivoya, azakana edete ni mo'di ndi logo läguläguro be yasi, azakana ni ice ndi ludri be yasi; azakana ta tu lämu'du azaka rota, azakana losi ete oyero. 21 Ondro 'diaza ka andivo ndaro o'ba wäṛiro ni ŋgacini undiro kwoi risi, ayena losi lämu'duro 'da nda si, tana adi nda te ago te nja losi 'Desi ndaro ro oyeza, ṛote nja losi cini kado oyeza. 22 Mina taoye agoanji ro, ago miso taŋgye, taoma, ŋgalu ndi taliatokpe be vo, troalo ànya se ya wäṛiro si kayibe Opi uzi ta ŋgaoparo ta yibe. 23 Oko minaru pere ni amaama ndi kalawasa tauniako si resi; mini ndi ànya kayi kalaope ezi. 24 Ruindu'ba Opi ro beṛo ko kalaopene. Beṛo ndäri a'done yauni be lidri cini ri, miemba'ba kado ago yaiŋgyi be ro, 25 nda se orivoya ata liyaro be ondro kate kyila'baazii ndaro drîna otana owo, a'dona Lu ozona kandrakado 'da ànyari drietaza ago ikyiza taŋgye unine. 26 Ago 'dooko drî ànyaro ogona usuna takado 'da ago opanayi vo 'da ni abari kicu'ba ro yasi, se ru ànya te ago 'ba ànya te ole ndaro orone ono.