1 Ni Paulo, Sila ndi Timoteo be resi, lidri känisa ro Tesalonika ya ri, se orivoya Lu Täpi amaro ro ndi Opi Yesu Kristo be:
2 Ka'do inye Lu Täpi amaro ndi Opi Yesu Kristo be kozo tai'dwero ndi taliatokpe be ämiri.
Vure Ikyi Kristo rosi
3 Ädrupii ago endreŋwai amaro, beṛo ämäri aro'boya oyene Lu ri tu cini si ta amiro ta. Ṛo kado ämäri oyene inye, tana taoma amiro kate ugu omba ndra ago ŋgalu ami alo alo ro azii ri kate ugu a'do parandra. 4 'Doni tase ko'ba andivo amaro be a'done driuŋgyi be ta amiro ta känisai Lu roya owo. Mà driuŋgyi ta liti se nyàbe ugu yaiŋgyi ago taoma 'duro amiro rriti ndi rueza cini se nyàbe oyi kigyesi ono rota.
5 Ta cini ono kaka'dana anjioko vureope Lu ro orivoya ŋgye ago tase ka oyebe efone ni kigyesi anjioko ta amiro usina nda 'da. Miri 'bädri'ba ndaro roya, tase nyàbe ugu rueza ni rigye ono tana ro. 6 Lu oyena tase ŋgye 'da; nda ezina rueza 'da ànya se kabe ami o'ba ruezane dri, 7 ago nda ozona ŋgaopa 'da ami se nyàbe rueza ri ago kpa ämäri. Nda oyena ono 'da ondro Opi Yesu kate ruka'da ni vo'buyakuru yasi asilele roya malaikai mbaraekye ndaro be. 8 Nda ezana ànya se koga Lu zo ago se koroyi Lazokado ta Opi amaro Yesu ro kote ono 'da. 9 Ànya ezaruna 'da rueza äduako ya, 'dooko elewete ni Opi kandra ago ni 'desi fopara ndaro resi, 10 ondro nda kate ikyi Tu ana si räṛu usune ni lidri cini ndaro resi ago taoro ni vona se cini kabe taoma resi owo. Nyà'dona kpa 'da ànya se koro nda be ana lako, tana mìmate tazevoedre amaro ämiri ono ya.
11 Ta'dota mà mätu ondoalo ta amiro ta. Mà Lu amaro eji ami o'bane kado ori se nda kuzi ami be kigye ono oriza. Ka'do inye nda mbara ndaro si koye ole cini amiro ta takado rota ago konde losi amiro taoma ro. 12 Liti ono yasi ävuru Opi amaro Yesu ro usuna räṛu 'da ni ami resi, ago nyùsuna räṛu 'da nda resi tai'dwero Lu amaro ro ndi Opi Yesu Kristo robe si.
© The Holy Bible in Moru © The Bible Society in the Sudan, 2000