2 Samuele 8 - The Holy Bible in Moru (BAIBOLO ALOKADO) (MB)

Dawidi Afo Miri 'Bädri'ba Ndaro rote

1 Ono vosi 'Bädri'ba Dawidi go gota Felesete'bai kpate to'di ago pe ànya te ṛe. Ago nda ru Metegama teni Felesete'bai rigyesi. 2 Ago nda pe Moaba'bai kpa te ṛe. Nda 'ba kamba'bai te u'dune gyini dri, oraoraro gyeree; gyeree ritu ufune, ago gyeree alo e'bene. Ago Moaba'bai a'dote ruindu'bai ro Dawidi ri ago ozoyi ŋga driutwero te ndäri.

3 Dawidi pe Adadezera ŋgwa Reoba ro, 'bädri'ba Zoba ro kpate ṛe, 'dooko Adadezera kaoyi wari Golo Eferata ro logone mbara ndaro zele. 4 Dawidi ru farasi'bai teni nda rigyesi kutu alo kama njidrieri (1,700); ago kyila'bai se kabe aba pa si orivoya kutu 'buteritu (20,000) Ago Dawidi toŋgo pa farasii arabia osero rote cini, oko nda eta anjokona te arabia kama alo (100) esene. 5 Ago ondro Siria'bai Damaseka ro kikyiyite Adadezera 'bädri'ba Zoba ro opane oko, Dawidi tufu lidri Siria'bai rote orivoya kutu 'buteritu foritu (22,000). 6 'Dooko Dawidi ra gawa kyila'bai rote Siria Damaseka roya; ago Siria'bai a'dote ruindu'bai ro Dawidi ri ago sayi ŋgate ndäri. Ago OPI 'ba Dawidi te ŋgaopene ṛe vose cini nda koyite kigyesi yasi. 7 Ndi Dawidi ru ŋga 'di otaro logo läguläguro se 'desii losi ro Adadezera ro kuŋgyiyibe iyi te, ago ezi ànya te Yerusalema ya. 8 Ago nda ru atala amba kpa te ni 'bakicii Adadezera ro Beta ndi Berotai be yasi.

9 Ondro Toi 'bädri'ba Amata ro keri tate ekye Dawidi pe kyila'bai Adadezera rote kpeye ṛe oko, 10 nda zo ŋgwa ndaro Yorama te 'Bädri'ba Dawidi re, mede oyene ndäri, ago titikäṛi oyene ndäri tana nda ye kyila te Adadezera be ago pe nda te ṛe ana ro, tana Adadezera a'dote ondoalo kyila oyevoya Toi be. Yorama ezi lakazai se edebe ni mo'di logo läguläguro ndi atala be yasi te Dawidi ri. 11 'Bädri'ba Dawidi di ŋgase kwoi te OPI ri ndi tro mo'di ndi logo läguläguro se nda kurube ni tu'dei cini se nda kopebe ṛe kai rigyesi be, 12 ni Edoma ndi Moaba be yasi, Amona'bai, Felesete'bai ndi Amaleka'bai be rigye si iyi, ndi telesi ŋga ro se nda kurube ni Adadezera ŋgwa Reoba 'bädri'ba Zoba ro rigyesi be.

13 Liku Dawidi ro a'dote orivoya ndra nda kegote ni Edoma'bai se kutu 'butealo fonjidriena (18,000) ufuvoya si Vodelero Täyi roya owo. 14 Ago nda ra gawa kyila'bai rote Edoma yasi; ago Edoma'bai cini a'dote ruindu'bai ro Dawidi ri. OPI 'ba Dawidi te ŋgaopene ṛe vose nda koyite kigyesi yasi.

15 Dawidi rite 'Bädri'ba ro Yisaraele cini dri, ago nda ye taŋgye endaro te lidri cini ndaro lako. 16 Yoaba ŋgwa Zeruya ro ni otaozo'ba yi kyila'bai dri; ago Yosapata ŋgwa Ailuda ro ni egyi'ba miri ro; 17 ago Zadoka ŋgwa Aituba ro ndi Aimeleke ŋgwa Abiatara robe ni orivoya kohanii; ago Seraya orivoya ni egyi'ba vureope kyila'bai ro ro; 18 ago Benaya ŋgwa Yoyada ro orivoya dri'ba ro vookwa'bai 'bädri'ba ro dri; ago ŋgwàagoro Dawidi ro orivoya kohanii.