2 Samuele 5 - The Holy Bible in Moru (BAIBOLO ALOKADO) (MB)

Dawidi A'dote 'Bädri'ba Yisaraele ro ndi Yuda be

1 'Dooko 'bakala cini Yisaraele ro ikyiyite Dawidi re Eberona ya, ago atayite ndäri ekye: “Mindre, ama orivoya lomvo ago kari modo miro ro. 2 Tuse kyeno, Saulo be 'bädri'ba ro ämädri ana si, mi ni se ugu kyila'bai Yisaraele robe kyila ya ago logo ànya be 'bäru owo. OPI atate miri ekye: ‘Nya'dona 'da lepe'ba lidri iro Yisaraele ro ago nya'dona 'da miri'ba ànyaro.’ ” 3 Ago 'desii cini Yisaraele ro ikyiyite 'Bädri'ba Dawidi re Eberona ya; ago 'Bädri'ba Dawidi 'ba tao'baro te ànya be lau Eberona ya OPI kandra. Ndi ànya äṛuyi Dawidi te 'bädri'ba ro Yisaraele dri. 4 Dawidi ka a'do 'bädri'ba ro oko, ndroa ndaro te 'butenätu, ago nda mirivote ndroana 'butesu. 5 Eberona ya nda miri Yuda te ndroa njidrieri imba njidrialo; ago Yerusalema ya nda miri Yisaraele cini te ndi Yuda be ndroa 'butenätu fonätu.

Dawidi Ru Zaiona te

(1 Ambâ 11:4-91 14:1-7)

6 'Bädri'ba Dawidi ndi lidri ndaro be oyiyite Yerusalema gotane. Jebusa'bai se koriyibe ni wari ana ya ana, kusuyibe ekye Dawidi ni ko ocine 'Bakici ya, ago ànya atayite ndäri ekye: “Miri ecine noŋwa i'do, miako'ba ndi ka'bo be onjana mi toto ni.” 7 Caoko Dawidi ru vo mbaraekye Zaiona rote, se yauono ago äzite 'Bakici Dawidi ro.

8 Ago tu ana si Dawidi atate mànoago ndaro ri ekye: “'dise cini kabe Jebusa'bai gotana, mi'ba ànya koyi liti gyi ro yasi ago kufuyi miako'bai ka'boi yi be, se ya Dawidi ro osoro ànya lomvo.” Ono ni tase 'ba ànya be atane ekye: “Miako aza kode ka'bo aza ri ecine zo Opi ro ya i'do.”

9 Dawidi ru vo mbaraekye te ago rite kigye, ago zite “'Bakici Dawidi ro.” Nda be zoi te gbikyi lomvoigyesi, etote ni vose Milo ana ya cigwo ya yaro. 10 Ago Dawidi ugu a'dote mbararo ndra, tana OPI, Lu mbarapara, orivoya tro nda be.

Irama Ni Dawidi te

(1 Ambâ 11:1-3)

11 Irama 'bädri'ba Tura ro zo lazo'bai te Dawidi re, ndi ice wiri robe, kikyi'bai ice edero ndi kuni ede'bai be te, ago ànya beyi zo 'desi miri rote Dawidi ri. 12 Ago Dawidi nite anjioko OPI 'ba nda ni a'done 'bädri'ba ro Yisaraele dri, ago eŋga mbara miri 'bädri'ba ndaro ni a'done ndra ta lidri ndaro Yisaraele rota.

13 Ondro Dawidi ke'be Eberona te oko, nda ru 'ditoko ogyeako amba te ndi 'ditoko be ni Yerusalema yasi; ago äti ŋgwàagoro amba te ndi ndiriŋwa be ndäri. 14 Kwoi ni ävuru ŋgwai se ätibe ndäri Yerusalema ya ro owo: Samua, Sobaba, Natana, Solomo, 15 Ibara, Elisua, Nefega, Jafia, 16 Elisama, Eliada ndi Elifeleta be.

Dawidi Pe Felesete'bai te ṛe

(1 Ambâ 14:8-17)

17 Ondro Felesete'bai keriyi tate ekye a'ba Dawidi te 'bädri'ba ro Yisaraele dri oko, Felesete'bai cini oyiyite Dawidi uṛine. Oko ondro Dawidi keri tana te oko nda oyite le vo mbaraekye ya. 18 Ago Felesete'bai ikyiyite ago rayirute Vodelero Refaima roya. 19 Ndi Dawidi eji OPI te ekye: “Inye'do moyi ri kyila oyene Felesete'bai be ya? Inye'do nyozona ànya ndi drì maro ya ya?”

Ago OPI atate Dawidi ri ekye: “Nyoyi ri, endaro mozona Felesete'bai ndi drì miro ya.” 20 Ago Dawidi ikyite Bala Perazima ya, ago lau nda pe Felesete'bai te ṛe. Ndi nda atate ekye: “OPI ŋgovoṛo kyila'baazii maro lako käti ni märi, oso gyi ogaoga ronye.” Ta'doro äzi ävuru vo ana rote Bala Perazima. 21 Ago Felesete'bai e'beyi lu edeedero ànyaro te lau, ago Dawidi ndi lidri ndaro be ruyi ànya te ago oyiyite sina.

22 Felesete'bai ikyiyi kpate to'dina, ago rayirute Vodelero Refaima roya. 23 Ondro Dawidi keji OPI te kpa to'dina oko, Opi atate ndäri ekye: “Nyogota ànya ko nosiro, oko mipiru ànya kundusi, ago nyogota ànya lama telesi yasi ice ŋgo'bai ro lomvosi. 24 Ondro ka'do nyeri pavo aba ro kporona te drî ice ro yasi oko, miye ta dori; tana ma OPI moyite mimile kyila'bai Felesete'bai ro opene ṛe.” 25 Ago Dawidi ye tate oso se OPI kota nda be ronye, ago ànya njayi Felesete'bai te etoro ni Geba ya le Gezera ya.