Sheba Ogbote Dawidi be
1 Mano kozi aza orivoya lau Gilegala ya, ävuruna Sheba, ŋgwa Bikeri ro, nda Benjamina'ba yi. Nda vo cekuṛe te, ago atate ekye:
“Ama teinye vo ako Dawidi be.
Ama teinye vo ako ŋgwa Yisai robe,
Yisaraele'bai! Migo ri ba 'ba amiro yasi!”
2 Ago lidri cini Yisaraele ro e'be Dawidi te, ago soyite Sheba ŋgwa Bikeri ro vo, oko lidri Yuda ro ni Golo Yaradene yasi le Yerusalema ya soyite 'du 'Bädri'ba Dawidi vo.
3 Ago ondro Dawidi kikyite zo 'desi miri ro ndaro ya Yerusalema ya oko; nda ru 'ditoko ogyeako ndaro se 'butealo se nda ke'bebe vo zo 'desi miri ro ondrene kai te, ago 'ba ànya te vookwa'ba zele. Ago nda ozo ŋga te ànyari, oko u'du kote ànya be. Ago riyite vookwa'bai zele inye madale tu odra ànyaro rosi, uguyi ori te oso ävuzii ronye.
4 'Dooko 'bädri'ba atate Amasa ri ekye: “Mizi manoàgo Yuda ro voaloya ikyine mare u'du nätu ya, ago andivo miro nya'do kpa noŋwa.” 5 Ondro Amasa koyite lidri Yuda ro uzine oko; nda ru tute amba ndrani tuse 'bädri'ba kaka'dabe ndäri drisi. 6 Ago Dawidi atate Abisai ri ekye: “Sheba ŋgwa Bikeri ro ozona rriti ndi ndra ämäri ni Abisolomo drisi. Ka'do inye miru ruindu'bai ma opi miro ro ago miso nda vo, ukyi nda uru 'ba'desi se abebe ṛatara ro 'da andivo ndaro ri, ago opavo 'da ni ämäri.” 7 Ago Yoaba ndi Kerete'ba be ndi vookwa'bai Pelete'ba robe soyi kpate Abisai vo, ndi kyila'bai cini be; ànya foyite tesi ni Yerusalema yasi osone Sheba ŋgwa Bikeri ro vo. 8 Ondro ànya kesayite kuni 'desi se Gibeona ya ana pa oko, Amasa 'be drî te ànya yibe. Ago Yoaba so boŋgo kyila rote, ago so bando te foro ya embete kyini kundu ndaro ya. Ago ondro nda kate efo mileya oko, bando e'dete ni foro yasi. 9 Ago Yoaba atate Amasa ri ekye: “Oko nya'do gwo eŋwonyeya ädrupi maro?” Ago Yoaba ru Amasa te tivu yasi drigwo ndaro si nda njunjune. 10 Oko Amasa ndre bando se drì Yoaba roya ana kote; ago Yoaba 'di Amasa te sina ya ya, ago lakazà yasi ndaro i'durute vuru gyini dri ago nda drate, teinye u'di ṛiri aza u'di ako.
'Dooko Abisai ndi ädrupi ndaro Yoaba be soyite Sheba ŋgwa Bikeri ro vo. 11 Ago mano alo aza Yoaba ro edrete avo Amasa ro dri, ago atate ekye: “Nda se kole Yoaba be, ago nda se orivoya Dawidi ro, mi'ba nda koso Yoaba vo.” 12 Ago Amasa u'dute ruŋgoṛi ŋgoṛi ro kari iro ya liti 'desi dri. Ago 'dise kabe lävu nasi, ndreyi nda te oko, edreyite. Ago ondro nda kondrete lidri cini kate edre oko, nda ŋgyi avo Amasa ro teni liti 'desi drisi le cowa ago vo boŋgo te nda dri. 13 Ondro äŋgyi avo teni liti 'desi drisi oko lidri cini oyite Yoaba vo osone Sheba ŋgwa Bikeri ro vo.
14 Ago Sheba lävute wari 'bakala cini Yisaraele ro ro yasi ago ikyite le 'bakici Abele Beta Maka ro ya; ago Bikeri'bai mbikalate, ago soyite nda vo 'bakici ya. 15 Ago manoàgo se cini Yoaba be ikyiyite ago muyidri Sheba ro te Abele Beta Maka ya. Ànya beyi gyini te donjo tiṛi 'bakici ro tesisi 'do lomvosi, ago uguyi vo u'di te tiṛi zelesi tana ko'de robe vuru. 16 Toko tavouni'ba aza ni 'bakici yasi trete ni tiṛi drisi ekye: “Nyeri! Nyeri! Nyata Yoaba ri ikyine noŋwa, tana male atane nda be.” 17 Ago Yoaba ikyite loto anya re; ago toko ana atate ekye: “Inye'do mi Yoaba owo ya?”
Yoaba zatadrite ekye: “Ma owo.”
'Dooko anya atate ndäri ekye: “Nyeri ata ma ruindu'ba miro ro.”
Ago nda zatadrite ekye: “Ma erina.”
18 'Dooko toko ana atate ekye: “Tuse kyeno ana si ata aza atate ekye: ‘Nyoyi Abele ya ta tadriozaro ta;’ ago 'do ni ŋgase ànya koyeyi be owo. 19 Ma ni alo aza ànya se orivoya liatokpero ago 'diri ro Yisaraele ya owo. Nya 'bakici se orivoya endrero Yisaraele ya ono ufuna etaya! Mile gwo drimbi OPI ro perene etaya?”
20 Ago Yoaba zatadrite ekye: “Ma i'do ta 'do ya, ma i'do kigye, märi 'bakici perene kode ufune i'do! 21 'Do ko taŋgye yi. Mano aza 'bädri lutu ro Eperaima ro ro, äzite Sheba ŋgwa Bikeri ro, ogbote 'Bädri'ba Dawidi be. Nyozo mano se alodi ono ämäri, ago meŋgyena ma 'da ni 'bakici lomvosi.”
Ago toko ana atate Yoaba ri ekye: “Mindre, mevona drî ndaro 'da miri tiṛidri yasi.” 22 'Dooko toko ana oyite lidri 'bakici ro re tavouni anyaro si. Ago ànya täṛiyi drî Sheba ŋgwa Bikeri ro rote, ago evoyite tesi Yoaba ri. Ndi Yoaba vo cekuṛe te, ago ànya pererute ni 'bakici lomvosi, ago mano alo gote kovole 'ba iro ya. Ago Yoaba gote Yerusalema ya 'bädri'ba re.
Dri'bai Losi Oyero Miri Dawidi ro ro
23 Yoaba ni otaozo'ba kyila'bai cini Yisaraele ro ro; ago Benaya ŋgwa Yoyada ro ni otaozo'ba Kerete'bai ndi Pelete'bai be ro; 24 ago Adorama ni dri'ba losi'bai se o'bana losi oyene mbarasi ro, Yosapata ŋgwa Ailuda ro ni kala egyi'ba yi; 25 ago Seva ni egyi'ba Vureope'bai ro; ago Zadoka ndi Abiatara be ni kohanii; 26 ago Ira ni 'ba'desi Jaira ro yasi kpa ni alo aza kohanii Dawidi ro ro.
© The Holy Bible in Moru © The Bible Society in the Sudan, 2000