2 Petero 2 - The Holy Bible in Moru (BAIBOLO ALOKADO) (MB)

Miemba'bai Mieywe'ba ro

1 Tu kyeno kai si nebii mieywe'ba efote lidri lako, ago kpa oso inye miemba'bai mieywe'ba ro efona 'da ami lako. Ànya ezinayi ta 'dienji ro 'da, taŋgaembaro se ko ŋgye, ago oganayi Miemba'ba se kogye ànya be zo, ago ànya ezinayi ruenji ndriro 'da andivo ànyaro dri. 2 Ago amba osona 'da taoye koziro ànyaro vo; ago ta tase ànya kayibe oyena rota, azaka atanayi taundiro 'da Liti taŋgye ro lomvo. 3 Miemba'bai mieywe'ba ro kwoi orivoya yagäru'bai ago ànya litinayi ŋga 'da ni tase kowero ànya kayi ugu itina ämiri yasi. Vureope'ba ànyaro teṛo nja kyeno ago Tufu'ba ànyaro teṛo mi uŋbo.

4 Lu e'be malaikai se yeyi takozi be kote, oko vo ànya te gehena ya, se embe ànya te nyori si vouni ya, kayi ugu Tu Vureope ro kwote. 5 Lu e'be 'bädri se uku ana kote, oko ezo gyitändri te 'bädri ya lidri luako dri, 'dise nda kopabe toto orivoya Noa, se pe taŋgye te, ndi lidri njidrieri azaka be. 6 Lu pe vure 'bakicii Sodomo ndi Gomora be rote, za ànya te asi si, ago 'ba ànya te taka'daro ro tase ka oyebe a'done luako'ba ri ro. 7 Nda pa Loto mano kado, se a'dote rritiro ni taoye kozi lidri otaako'bai ro risi te. 8 Mano kado ana rite ànya lako, ago tu cini si nda ezarute ni tusu taoye undiro ànyaro ondrena ndi erina be risi. 9 Ago Opi ni ndi lidri lu'ba ro opane ni taojoro ànyaro yasi ago kani takozi'bai äti taezaro zele madale Tu Vureope rosi, 10 Para ndrana ànya se kabe oso taundiro lomvo ànyaro ro ŋgalovona vo ago kayibe drikaca Lu ro mawona iyi.

Miemba'bai mieywe'ba ro kwoi orivoya driupiako ago mäwu'bà yi, ago ka'dayi taoro kote 'desii vokuru ro ri, oko ànya 'dayi ànya te. 11 Ca malaikai, se orivoya mbara amba be ago orivoya aṛi be ndrani miemba'bai se mieywe'ba ro kwoi drisi, kicuyi ànya kote la'da o'da si Opi kandra. 12 Oko lidri kwoi kayi taoye tauniako si, oso koronyai vocowa ro se ätite urune ago ufune ronye; ànya kayi ŋgase aza ànya kuniyi ko gotana la'da o'da si, utufuna ànya 'da oso koronyai vocowa ro ronye, 13 ago ozona rueza 'da ànyari ta taezaro se ànya kozoyibe rota. Ta riyä ro ànyaro orivoya ŋga aza oyene ṛo dritai ro kitu si se kojona ŋgaleme lomvo ànyaro ro 'da 'do; ànya orivoya driupi yi ago liku koziro be ànya kayite rudro'be ami yibe karama amiro ya owo, ànya luyi liti se ànya kayibe ami odo sina tawi! 14 Ànya leyi ko voondrene ŋga aza dri oko 'ditoko ronyi ro dri ayani, takozi leme ojo ànya ko alona. Ànya kayi lidri mbaraako loci abari ya. Ago ànya embayi ya ànyaro te a'done yagäru be. Anya orivoya latri Lu ro zele! 15 Ànya e'beyi liti ŋgye te ago ijeyi liti ànyaro te, ànya soyite liti se Balama ŋgwa Beora ro kurube vo, se lu te parata se nda kabe usuna takozi oyesi 16 ago a'bi drî ndaro te ta takozi ndaro rota. Doŋgyi ndaro atate ata lidri rosi ago 'bidri taoye amaama si nebi rote.

17 Lidri kwoi laba oso koro se gyi na sete ronye, oso 'dikolo se oli gbiriṛi be ŋgyite ronye, Lu eta vo te ànyari vouniekye gbiṛikyiri roya. 18 Ànya kayi ta ata driuŋgyi si ago kayi ta amaama ro ata, ago kayi taundiro ŋga lovo lomvo ro ro oye ànya se keto ta be ruopane ni lidri se kayi ori 'diwiri ro ori yasi uruza. 19 Ànya 'ba tao'ba dritai rote ànyari oko andivo ànyaro orivoya iyeäṛii taoye 'dienji robe, tana lidri orivoya iyeäṛi ro ŋga se aza kope nda te ṛe ri. 20 Ondro lidri koparute ni ŋga 'dienjiro 'bädri ro risi ta Opi ago Opa'ba Yesu Kristo uni rosi, ago 'dooko ago äru kpa gwo to'di ànya se kope ànya be ṛe si, lidri gi nonye ono ori äduna a'dona te koziro ndrani se ànya koribe käti risi. 21 Aba a'dona ṛo kadopara ànyari orine liti taŋgye ro uniako ni unine ri ago 'dooko ruonane ni ota se alokado ozote ànyari ana yasi. 22 Tase ka'dobe ànyari ono ka'date anjioko taoni kwoi orivoya ŋgye se ekye: “Kokye ka ogo ŋgase nda ki'dwebe re,” ago ekye: “Kizwe se alasate ka ogo rugburune koro ya.”