2 'Bädri'bai 23 - The Holy Bible in Moru (BAIBOLO ALOKADO) (MB)

Josia ana Mätu Lui Awi rote

1 'Dooko 'Bädri'ba Josia zo lazo te, ago dri'bai cini Yuda ro ndi Yerusalema robe otoyikalate ndare. 2 Ago 'bädri'ba oyite Yekalu ya troalo lidri cini Yuda ro ndi Yerusalema robe, kohanii ndi nebii be, lidri se ŋga'bai ndi lemeri'bai be be. 'Bädri'ba zi ata se cini buku se tao'ba ro se usube Yekalu ya ana te ànyari. 3 Ago 'bädri'ba edrete läŋgyiri zo'desi miri ro ro lomvo ago 'ba tao'baro te OPI kandra, nda orone, ago ota ndaro ndi tazevoedre ndaro be ätine ya cini ndaro si ago lindri cini ndaro si, ago ata se tao'baro ono ya 'do oyene oso egyibe buku ana ya ronye; ago lidri cini 'ba tao'ba te tao'baro se ana ätine.

4 Ago 'bädri'ba ta Ilekia, kohani fopara te, ndi kohanii se kundueŋga'bai ndaro yibe, ndi dereŋwa gaga'bai be, lakazà se cini Yekalu OPI roya, se edebe Bala, lu tokoro Asera ndi 'bi'bi be mätuza iyi, lofone tesi. Ago 'bädri'ba za ànya te asi si tesi Yerusalema lomvo loto vodelero Kidrona roya, ago äŋgyi torofo na te Betele ya. 5 Nda ana kohanii lu awi ro se 'bädri'bai Yuda ro kodibe to tori ozane voi lui awi mäturo yasi 'bakicii Yuda ro yasi ago gbikyi Yerusalema lomvosi, ànya se ka kpa ŋga tägyi tagyiri oza Bala ri, kitu ri, 'bi'bi ndi imba be ri kai te. 6 Ago nda lofo beti lu tokoro Asera rote tesi ni Yekalu yasi, lofote tesi ni 'bakici Yerusalema yasi le vodelero Kidrona roya, zate asi si lau, ago onjite torofo ro foda, ago larite 'budri lidri awi ro drisi. 7 Nda pere zoi ronyi'ba manoàgoro ro se orivoya Yekalu ya ana te, vose 'ditoko kayibe boŋgo lu tokoro Asera mäturo o'dina kigye ana. 8 Josia ezi kohanii se cini 'bakicii Yuda ro yasi kai te ago nda enji vo tori oloro se kohanii kayibe ŋga tägyi tagyiri ro ozana kigye iyi te etoni Geba ya le Beraseba ya. Nda pere voi tori oloro se ecivo dereŋwa Yosua, wari'ba 'bakici ro ro kobebe lomvo ana te, se orivoya gaṛi dereŋwa 'bakici ro roya ana. 9 Caoko ale kote kohanii lui awi se kwoi ro ri ikyine ruindune Yekalu OPI roya Yerusalema ya, oko ànya niyi ndi ambata loŋgaako se ozobe kohanii azi ànyaro ri 'do onyane.

10 'Bädri'ba Josia pere Tofeta vo lu awi mäturo se orivoya vodelero Inoma roya ana kpate, tana ukyi 'diaza oza ŋgwaagoro kode ŋgutiro ndaro 'da lu Moleka ri. 11 Nda pere farasii se 'bädri'bai Yuda ro kodibe to ta kitu mäturo ta dereŋwa eciro Yekalu ya ya kai te, se orivoya orivo Natana Maleka dri'ba 'desi losi ro roya, se orivoya orooro ro, ago nda za arabia kitu mäturo te asi si. 12 Ago nda pere voi tori oloro se 'bädri'bai Yuda ro kobebe zo ya kurusi zo'desi miri ro Aza roya ana te, ndi voi tori oloro se Manase kobebe goko ritu Yekalu roya ana be; nda pere ànya te ago onji ànya te foda ago date vodelero Kidrona roya. 13 Ago 'Bädri'ba Josia enji voi lu awi mäturo se ogone 'buzele Yerusalema ro yasi ana te, ndi le ogone ŋgäṛiŋwadri 'bereŋwa ice ido ro roya, se Solomo 'bädri'ba Yisaraele ro kobebe Asetarete lu tokoro undiro Sidona'bai ro, ago Kemosa lu Moaba ro ndi Milekoma lu Amona'bai ro mätuza ana. 14 'Bädri'ba Josia toga vo caricari se abebe kuni si ana te jinyijinyi ago ga beti lu tokoro Asera rote vuru, ago nda tisi vose ànya kedreyibe kkigye ana te kowa lidri rosi.

15 Ndrani 'do risi Josia pere vo tori oloro Betele ya, se Yeroboama ŋgwa Nebata ro kobebe lu awi mätuza, se koloci Yisaraele be takozi oyene ana te vuru ago tufu kuniŋwà ànyaro te jinyijinyi, 'bi ànya te foda ago nda za lu tokoro Asera kpate. 16 Ondro Josia kozamite oko, nda ndre 'budrii te 'bereŋwa dri, nda zo lazo te ago ewe kowa teni 'budrii kai yasi ago za ànya te vo tori oloro dri, ago enji vo tori oloro te, oso ata OPI ro se nebi kayobe, ṛo kyeno ana ronye.

17 'Dooko nda atate ekye: “Kuni mandrebe lau ana e'diyi ya?”

Ago lidri 'bakici ro zatadri ndaro te ekye: “Ana orivoya 'budri nebi se kikyibe ni Yuda yasi ago kiti tase cini miyebe vo tori oloro Betele ro ri ono tana be ṛo kyeno ana ro.”

18 Josia atate ekye: “Nyè'be kori inye, 'diaza kona kowa ndaro ko.”

Ta'dota ànya e'beyi kowa ndaro te, ndi tro kowa nebi se kikyibe ni Samaria yasi ana robe.

19 Voi lu awi mäturo se cini 'bakicii Samaria ro yasi se 'bädri'bai Yisaraele ro kolobeyibe, se kekoyi ya OPI robe oŋgane kyilaro sina kai nda pere te, nda ye vo cini tori oloro kai te oso se nda koyebe se Betele ya ri kai ronye. 20 Ago nda tufu kohanii cini lui awi ro se orivoya lau kai te, voi tori oloro drisi, ago za kowa lidri rote ànya drisi. 'Dooko nda gote Yerusalema ya.

Josia ye Karama Lävu Odra ro rote

(2 Ambâ 35:1-19)

21 'Bädri'ba Josia ta lidri cini te ekye: “Mìye karama Lävu Odra ro ro OPI Lu amiro ri, oso se egyi tana te buku tao'baro ono ya ono ronye.” 22 Aye karama Lävu Odra ro ro aza kote oso nonye eto ṛoni tui vureope'bai se kimiriyi Yisaraele'bai be rosi; kode tui 'bädri'bai Yisaraele ro ndi Yuda robe rosi; 23 oko ndroa 'butealo fonjidriena miri 'Bädri'ba Josia ro rosi oko aye karama Lävu Odra ro ro ono te Yerusalema ya.

Ŋgatoza Azaka se Josia yebe

24 'Bädri'ba Josia ana ta ata'ba tori avo robe ndi kwozoi be ndi lui zo robe ndi lui edeedero be ndi ŋgase cini undiro andrebe wari Yuda ro ndi Yerusalema robe ya te, tana nda ko'ba aye ota se egyite buku se kohani Ilekia kusube Yekalu ya ana ro robe. 25 'Bädri'ba käti aza a'do kote oso nda ronye, se indurute OPI ri ya cini ndaro si, tauni cini ndaro si ago mbara cini ndaro si, ota Musa ro orooro ro; 'bädri'ba aza go a'do kpa kote oso nda ronye nda vosi.

26 Caoko kyila ndra OPI ro Yuda lomvo kye kote ta tase 'Bädri'ba Manase koyebe ya OPI ro ekoza ana rota. 27 OPI atate ekye: “Manana Yuda kpa 'da ni mi maro yasi, oso mana Yisaraele be ronye, ago mavona 'bakici Yerusalema se manjibe ono ndi zwi cowa, ndi Yekalu se makye ma mätuzana kigye ana be.”

Ädu 'Dimiri Josia ro

(2 Ambâ 35:20–36:1)

28 Taoye cini azaka se Josia koyebe egyi tana te Buku Ambâ ro 'Bädri'bai Yuda ro roya. 29 Tu 'Bädri'ba Josia rosi, Neko 'bädri'ba Ezipeto ro oyite 'bädri'ba Asaria ro opane Golo Eferata ya. 'Bädri'ba Josia oyite kyila oyene 'bädri'ba Ezipeto ro be Megido ya ago 'bädri'ba Neko fu ndate lau. 30 Ago dri'bai losi ro ndaro ŋgyiyi avo ndaro te arabia si ni Megido yasi eziyi nda te Yerusalema ya ago seyi nda te 'budri modo ndaro ya. 'Dooko lidri Yuda ro njiyi ŋgwa Josia ro Joaza te ago äṛuyi ndate a'done 'bädri'ba ro vo täpi ndaro roya.

Joaza 'Bädri'ba Yuda ro

(2 Ambâ 36:2-4)

31 Joaza ka eto 'dimiri oko ndroa ndaro te orivoya 'buteritu fonätu, nda mirivote imba nätu Yerusalema ya. Ävuru endre ndaro ro ni Amutala ŋguti Yeremaya ro ni 'bakici Libena yasi. 32 Ago nda yete tase undiro ayani OPI mile, oso se cini zutui ndaro koloyeyibe ronye. 33 Neko 'bädri'ba Ezipeto ro 'ba Joaza te kamba'ba ro Ribela ya wari Amata roya, ukyi nda mirivo 'da Yerusalema ya ago 'batate lidri Yuda ro ri talentaro kama alo (100) mo'di ro ndi talentaro alo logo läguläguro robe ozone. 34 Neko 'bädri'ba Ezipeto ro 'ba Eliakima ŋgwa Josia rote 'bädri'ba ro vo täpi ndaro Josia roya, ago toza ävuru ndaro te Jehoiakima. Oko nda ru Joaza te ago ezi nda te Ezipeto ya, ago nda drate lau.

Jehoiakima 'Bädri'ba Yuda ro

(2 Ambâ 36:5-8)

35 'Bädri'ba Jehoiakima ozo mo'di ndi logo läguläguro be te Neko 'bädri'ba Ezipeto ro ri. Nda 'ba tate parata driutwe ro urune ago ozone oso 'bädri'ba Neko ko'ba tana be ronye. Nda ru mo'di ndi logo läguläguro be teni lidri rigyesi oso se atibe 'di alo alo ri ozone a'do ŋga ànyaro ro voro ronye.

36 Jehoiakima ka eto 'dimiri oko ndroa ndaro te orivoya 'buteritu fonji, nda mirivote ndroa 'butealo foalo Yerusalema ya. Endre ndaro ävuruna ni Zebida ŋguti Pedaya ro ni 'bakici Ruma yasi. 37 Nda yete tase undiro ayani OPI mile, oso se cini zutui ndaro koloyeyibe ronye.