1 Timoteo 5 - The Holy Bible in Moru (BAIBOLO ALOKADO) (MB)

Kana Taoma'bai ri

1 Mi'bidri agoambago ro ko, oko nyolo'baru ndäri oso nda orivoya täpi miro. Miye agoanjii oso ädrupii miro ronye, 2 tòkoadraŋwai oso endrei ronye, ago 'ditoko ndiriŋwa ro oso endreŋwà ronye, a'do wäṛi cini si.

3 Nyaka'da taoro ävuzii se cini ṛote endaro iṛe ri. 4 Oko ondro ävuzi aza orivoya ŋgwai be kode kwozoi be, beṛo ànyari taunine käti ono anjioko kama ànyaro mätu ro oyene katidri modo ànyaro ro ri ago oyena nonye si go kayi ŋga ozo uti'bai ànyaro ri tana ono ni tase kabe Lu usi owo. 5 Ävuzi se orivoya ṛote iṛe, teinye 'diaza ako vo anyaro ondrene, 'ba mi anyaro te Lu dri ago ka mätu oye 'duro ago ka nda eji ta ŋgaopa ndaro rota ŋgäkyi si kpa kitu si. 6 Oko ävuzi se kabe andivo anyaro ozo riyä awi ri dra ṛote nja, anya ka gica ori owo. 7 Nyozo taŋgaembaro kwoi ànyari, ukyi 'diaza kozi ànya 'da. 8 Oko ondro 'diaza kotita 'didiri ndaro ro kote, para ndrana gboko katidri modo ndaro ro, anjioko nda ga taoma tezo ago orivoya kozipara ndrani taomaako'ba ri.

9 Nyoloci ävuzi aza ko ävuru ävuzii se egyite roya e'be gialo ndroa na kälävu 'butenjidrialo (60) lutu, ago agye anya te, ṛo perena alodi. 10 Ago a'dote liku kado be takado oyesi; toko se eca ŋgwai anyaro te kadoro, ru atrai te 'ba anyaro ya, ye kama te driuŋgyiako si Kristo'bai azi ri, pa lidri se rriti ya te, ago ozo andivo anyaro te ugu takado oyene.

11 Oko nyoloci ävuzii se mbara ro ko ävuru ävuzii se egyite roya; tana ondro koleyite iyi ogyene, ànya onanayi iyi ndi ni Kristo resi, 12 ago 'dooko a'donayi ndi taenji tao'ba se ànya ko'babe kyeno Lu ri 'do ro perena robe. 13 Ànya orinayi kpa gwo saa ànyaro enjine ugunayi aba kpa gwo zo yasi zo yasi, oko kozi parana ànya embayi iyi te a'done kyere'bai ro, ago loci'bai ro ta cini yasi, ugu ŋgase ko ànyari atane atana be. 14 Oko male ävuzii mbara ro ri iyi ogyene, a'doza ŋgwai be, ago kotiyi 'ba ànyaro tana robe, ukyi ozo kandrakado 'da kyila'baazii ri ugu taundi ataza ama lomvo. 15 Tana ävuzii azaka so ṛote nja Satani vo. 16 Oko ondro toko aza Kristo'ba yi ka'dote ävuzii be katidri anyaro ya, beṛo anyari ta ànyaro otine, ago ko ŋgaläŋgyi o'bane känisa dri, tana ko'ba känisa kotita ävuzii se ṛote iṛe ro robe.

17 'Di'desii se kayibe losi kado oye oso dri'bai ronye beṛo tana usune kadoro kuguyi päläti uru robe kadoro amba, para ndrana ànya se kayibe losi mbara oye ugu taope si ndi miemba be iyi. 18 Tana taegyi ka ata ekye: “Nyembe kala 'daŋgo ro ko ondro nyate ugu losi oye sina inya otone owo,” ago “losioye'ba, beṛo ndi päläti ndaro ozone.” 19 Ate 'di'desi aza kicu miri nyeri tana ko e'be gialo ezi tazevoedre'bai ritu kode amba lutu. 20 Ànya se cini kayibe takozi oye mi'bi drî na ṛo miamba ya, tana ambana kuturi robe. 21 Ṛo orivoya Lu kandra ndi Kristo Yesu be ndi malaikai alokado be ma mi eji taŋgaembaro kwoi orone teinye 'di gyele ako kode ko 'diaza lune ayani ŋgase aza nyabe oyena ya. 22 Miye ta ko karagbagba ro drio'ba si 'diaza se nda odine ruindune Opi ri dri. Nyoloci mi ko takozi azii roya, nyagaga andivo miro wäṛiro.

23 Mimvu ko toto gyi ayani, oko mimvu vino fere ta ya miro rota, tana mi orivoya adravoro ondoalo.

24 Takozii lidri azaka ro ṛo orivoya ŋbelero ondrene, ago takozi ànyaro ka ànya ugu mileya vure ya; oko takozii azaka ro andrete le kovolesi. 25 Kpa oso inye andre taoye kado te ŋbelero, ago ca ànya se andre kote ŋbelero ro äni kote da'done.