Felesete'bai Gayi Dawidi Tezo
1 Felesete'bai otoyikala kyila'bai cini ànyaro rote Afeka ya; ago Yisaraele'bai otoyi gawa ànyaro te koro se orivoya Jezerela ya ana ya. 2 Ondro 'bädri'bai Felesete'bai ro kate ugu lävu driyaro kama ro ago kutu ro oko, Dawidi ndi lidri ndaro be ikyiyi iro te äduro 'Bädri'ba Akisa be. 3 Ago otaozo'bai Felesete'bai ro atate ekye: “Ebere'bai kwoi kayi e'di oye noŋwa ya?”
Ago Akisa atate otaozo'bai Felesete'bai ro ri ekye: “Ono orivoya Dawidi, ruindu'ba Saulo 'bädri'ba Yisaraele ro ro owo, se rite mabe ndroa na amba, musu taenji aza ko nda ya ro ni ikyi ndaro mare si.”
4 Oko otaozo'bai Felesete'bai ro a'dote kyilaro Akisa be, ago atayite ndäri ekye: “Mizo mano 'do kovole; mi'ba nda kogo robe 'ba'desi se nyozo be ndäri orine kigye 'do ya. Ko ndäri oyine kyila ya ama yibe, ukyi nda ogo a'do 'da manya'baazi ro ämäri kyila oyene ama be. Inye'do mimabe mano ono dro'bena andivo iro eŋwanye dri'ba ndaro be ya? Inye'do ṛo ko lidri amaro kwoi tufuna siya? 5 Inye'do ono ṛo ko, Dawidi se ànya kayi läri oto oko, koŋgoyi loŋgo be ekye:
‘Saulo fu iro kutu ro,
ago Dawidi fu iro kutu 'bute ono owo ya?’ ”
6 'Dooko Akisa zi Dawidi te ago atate ndäri ekye: “Ma ruäṛu OPI lidriidriro si, mi orivoya mano 'diri yi, ago märi, a'dona kadopara miri oyine mabe kyila ono ya. Musu taenji aza ko mibe, ṛo ni ikyi miro mare si. Oko rukä dri'bai ro leyi tadri miro ko. 7 Ka'do inye migo liatokpe ro kovole, ago miye ŋga aza se tana ka oye orine 'bädri'ba Felesete'bai ro usiako 'do ko.”
8 Ago Dawidi atate Akisa ri ekye: “Maye e'diyi ya? Taenji se nyusube ma ya ṛoni tuse mikyibe mire si madale yauono ni e'diya, se si ko märi oyine kyila oyene kyila'baazii mi opi 'bädri'ba maro robe ni ya?”
9 Akisa zatadri Dawidi rote ekye: “Mäni ndi märi mi teinye takoziako oso malaika Lu ro ronye. Oko dri'bai Felesete'bai ro atayi ni ekye miri oyine kyila ya ama yibe i'do. 10 Ka'do inye mìŋga ṛo kyenoŋboci mi ndi ruindu'bai Saulo ro se mibe iyi yibe. Ondro vo kalayate oko nyòyi dori.”
11 Ndi Dawidi ŋgate lidri ndaro be ṛo kyenoŋboci ogone 'bädri Felesete'bai roya. Oko Felesete'bai oyiyite Jezerela ya.
© The Holy Bible in Moru © The Bible Society in the Sudan, 2000