1 Samuele 24 - The Holy Bible in Moru (BAIBOLO ALOKADO) (MB)

Dawidi E'be Saulo te Ufuako

1 Ondro Saulo kegote ni osovoya Felesete'bai vo oko, iti tate ndäri ekye: “Mindre, Dawidi orivoya vocowa Eŋgedi roya.” 2 'Dooko Saulo tope kyila'bai kado te kutu nätu (3,000) ni Yisaraele cini lakosi, ago oyite Dawidi ndi lidri ndaro be uṛine ogone 'buzele Lutui Indri vocowa ro roya. 3 Ago litibiṛi ya gyolo azaka timele ro orivoya, ago kugyi orivoya lototi lomvoigye, ago Saulo cite kugyi ya loline. Oko Dawidi ndi lidri ndaro be riyite piṛi ädu kugyi roya. 4 Ago lidri Dawidi ro atayite ndäri ekye: “Ondro ono tu esate, OPI ozo kyila'baazi miro te drì miro ya, oso se nda ko'ba tana be ronye, miye nda oso se tana kusi mi be nda oyene ronye.” 'Dooko Dawidi ŋgate, kugurute ago lo boŋgo runduṛuro Saulo ro sina te. 5 Ago ono vosi ya Dawidi ro loŋgate, tana nda lo boŋgo si Saulo rote. 6 Nda atate lidri ndaro ri ekye: “OPI laga ma zo märi opi maro, se OPI konjibe ono oyene koziro, drì maro eŋgane nda dri i'do, nda orivoya 'di äṛuäṛu OPI royi.” 7 Dawidi 'bidri lidri ndaro rote mbara, ago lekote ànyari Saulo gotane.

Ago Saulo ŋgate kuru ndi e'be kugyi te, ago eto oyite.

8 Ono vosi Dawidi ŋga kpate, ago fote ni kugyi yasi ago zi Saulo te ekye: “'Desi maro, 'bädri'ba!” Ago ondro Saulo kondre vote kovole nda kundu oko, Dawidi ändite militi si vuru, taoro ka'daza. 9 Ago Dawidi atate Saulo ri ekye: “Tana e'di nya ta lidri se kabe ta ata ekye mindre, ma mi uṛi ufune kwoi ro erina niya? 10 Mindre, kitu ono si ono mi miro ndre tase OPI kozo mibe drì maro ya kugyi ya ono te. Ago 'di azaka ta ma te mi ufune, oko me'be mi te. Matate makye, märi drì maro eŋgane opi maro dri i'do; tana nda orivoya 'di äṛuäṛu OPI royi. 11 Mindre, täpi maro, mindre si boŋgo runduṛuro miro pelepelena begi drì maro ya ono. Malo anya ni, oko mäfu mi kote, mini robe ago mindre robe anjioko mogbo kote mibe ago ma teinye ta ako mibe. Maye takozi aza kote milomvo, nya gica ma uṛi ufune ono owo. 12 Ka'do inye OPI oyena vure ni lakole amaro mibe ya. OPI kologo vo takozi se miyebe märi ro ni miri, märi drì maro eŋgane midri i'do alona. 13 Oso taoni uku aza atabe ronye ekye: ‘Taoye undiro ka efo ni lidri undiro yasi.’ Drí maro odone milomvo i'do. 14 'Bädri'ba Yisaraele ro efo tesi a'di vo ya? Nya oso a'di vo ya? Kokye avo vo ya? Nyonyo vo ya? 15 Ka'do inye OPI a'dona ni vureope'ba ro ago atana ta ni lakole amaro ya mibe; nda kondrevo ta maro ya, nda kagaga ma ago kopa ma ni drì miro yasi.”

16 Ondro Dawidi konde tase kwoi atana te Saulo ri oko, Saulo atate ekye: “Inye'do ono orivoya mi owo ya ŋgwa maro Dawidi?” Ago nda eto liyite. 17 Nda atate Dawidi ri ekye: “Mi orivoya taŋgye'ba yi ndrani mädrisi; tana miye ma te kadopara, oko maye mi te kozipara. 18 Kitu ondro ono si ono nyaka'da takado miro märi te. OPI ozo ma te drì miro ya, oko mifu ma kote. 19 Aba ondro mano aza kusu kyila'baazi ndaro be, e'bena nda gindi oyine liatokpero ya? Ka'do inye OPI käpäṛi mi takado si tana tase miyebe märi kitu ono si ono tana ro. 20 Mänite endaro nya'dona 'da 'bädri'ba ro, ago miri 'bädri'ba Yisaraele ro ro a'dona ndi drikaca miro zele. 21 Ka'do inye nyäṛuru märi ävuru OPI rosi anjioko miri zelevoi maro ufune te i'do, ago miri ävuru maro forone tesi ni katidri täpi maro ro yasi te i'do.” 22 Ago Dawidi ye ta ruäṛu rote Saulo ri.

'Dooko Saulo oyite kovole 'bäru; oko Dawidi ndi lidri ndaro be oyiyite vo ruda'doro ànyaro ya.