1 Samuele 10 - The Holy Bible in Moru (BAIBOLO ALOKADO) (MB)

1 'Dooko Samuele ru gäbä ido rote ago date drî Saulo ro ya, ndi njunju nda te ago atate ekye: “OPI äṛu mi te 'bädri'ba ro lidri ndaro Yisaraele dri. Nyimirina lidri OPI ro 'da ago mipana ànya 'da ni drì kyila'baazii ànyaro se gbikyi ànya lomvosi kwoi ro yasi. Ago ono a'dona ndi taka'daro ro miri anjioko OPI äṛu mi ni a'done 'bädri'ba ro lidri ndaro dri. 2 Ondro nyate oyi ni mare si ondro oko mi'bena drî 'da lidri ritu be 'budri Raele ro lomvo wari Benjamina roya Zeleuza ya, ago ànya atanayi 'da miri ekye: ‘Doŋgyii se nyoyibe uṛine kayi usute, ago yauono täpi miro te ta ako ta ànyaro ta oko kate milo'be ta miro ta ayani,’ ago ka ata ekye: ‘Mayena e'di ta ŋgwa maro rota ya?’ 3 Ni nasi nyoyina gwo driyaro vudi alokado Tabora roya; ago lau lidri nätu ka ugu oyi tori olone Lu ri Betele ya o'benayi drî 'da mibe. Alo ànyaro indri nätu be, azana ŋgyi duŋguṛu ambata ro nätu, ago aza ŋgyi kurukyini ro twi vino be. 4 Ànya oyenayi mede 'da miri ago ozonayi duŋguṛu ritu ambata ro 'da miri, ago miruna 'da ni ànya rigyesi. 5 Ago ono vosi, nyikyina 'da lutu Lu roya Gibea ya, se gawa Felesete'bai ro kigye ana. Ondro nyate oci 'ba'desi ya oko, mi'bena drî 'da gboko nebii robe kayi efo vuru ni vo mätu ro yasi, kudi be, gara be, yeṛi be ndi lekyembe be, kayi ugu räṛu oye. 6 'Dooko tori OPI ro ikyina ndi mbara amba be midri, ago mi'dena gwo totrene räṛu oyebe ànya be ago nya'dona 'da mano to ro. 7 Ondro mi'bedrite taka'daro se ono be, miye tase milebe oyene ono, tana Lu orivoya tro mibe. 8 Ono vosi nyoyi ma mile Gilegala ya; ago mikyina 'da mire lau ago mazana tori 'da ndi ŋgapäṛi rumora robe. Miri ma kwotene lau u'duna njidrieri, madale mesana ni mire ago maka'dana tase miri oyena 'da.”

9 Ondro Saulo koza kundu te Samuele e'be ne oko, Lu ozo ya to'di te Saulo ri. Ago tu gi alo na ono si taka'daro se cini kwoi a'dote. 10 Ondro Saulo ndi ruindu'ba ndaro be kikyiyite Gibea ya oko, gboko nebii ro 'bedrite nda be. Ndi dori tori Lu ro ikyite mbara amba be nda dri. Ago ye räṛu te totre be ànya lako. 11 Ago ondro 'dise cini kuni nda be kyeno kai kondreyi nda te räṛu oyevoya nebii be oko, ànya atayite azi ri ekye: “Tase ka'dobe ŋgwa Kisi ro ri ono e'di ya? Inye'do Saulo kpate alo aza nebii ro ya?” 12 Mano aza alo vo ana ro zatadrite ekye: “Täpii Nebii kwoi ro ni a'di ya?” Ta'dota ta ono a'dote taoni ro ekye: “Inye'do Saulo kpate alo aza nebii ro ya?” 13 Ondro nda konde lä'bi te oko nda cite vo mätu ro ya.

14 Täpiazi Saulo ro atate ndäri ndi ruindu'ba ndaro be ekye: “Nyòyite eŋwaroya?”

Saulo za tadrite ekye: “Mòyite doŋgyii uṛine; ago ondro mä̀ni kote ànya usune oko, mòyite Samuele ondrene.”

15 Ndi täpiazi Saulo ro eji tate ekye: “Molo'baru miri nyiti märi, Samuele ata ta e'diro miri ya?”

16 Ago Saulo atate täpiazi ndaro ri ekye: “Nda iti tate ämäri ŋbelero ekye usu doŋgyii te.” Oko nda iti tase Samuele kata be ekye nda ka oye a'done 'bädri'ba ro ana tana kote täpiazi ndaro ri.

17 Samuele zi lidri Yisaraele rote kalakotone OPI re Mizipa ya. 18 Ndi nda atate lidri Yisaraele ro ri ekye: “Ono ni tase OPI Lu Yisaraele ro kabe atana owo ekye: ‘Molofo ami te tesi ni Ezipeto yasi, ago mapa ami teni drì Ezipeto'bai ro yasi ago ni drì lidri se cini kabe ami eza ro yasi.’ 19 Oko kitu ondro ono si ono miga Lu amiro tezo, se kabe ami opa ni lenje amiro ndi rriti amiro be yasi ono. Tana nyàtate mìkye: ‘Hwa! Mi'ba 'bädri'ba ämäri.’ Ka'do inye andivo amiro nyìkyi nyotokala OPI kandra ba 'bakala amiro voro ago käläsikala amiro voro.”

20 'Dooko Samuele lofo 'bakalai cini Yisaraele rote mileya, ago vodo vo 'bakala Benjamina ro te. 21 Ago Samuele lofo katidrii 'bakala Benjamina ro rote mileya, ago katidri Matri'bai ro vodo vote. Äduro nda lofo katidri Matri'bai rote mileya mànoago na ba alo alo, ago vodo vo Saulo ŋgwa Kisi rote. Ago ondro ànya kuṛiyi nda te oko, niyi kote nda usune. 22 Ago ànya ejiyi ta teni OPI sisi to'dina ekye: “Inye'do Saulo ikyi gite noŋwa ya?” Ago OPI atate ekye: “Mindre, Saulo da'do andivo ndaro begi lakazà kundu ana.” 23 'Dooko ànya muyite ago ruyi nda teni lau; ago ondro nda kedrete lidri lako oko, nda edrete orivoya kaca ndrani lidri azi ri. 24 Ago Samuele atate lidri cini ri ekye: “Inye'do mìndre nda se OPI konjibe te ya? 'Diaza i'do nda ronye lidri cini lako.” Ago lidri cini trete ekye: “Miri madaro 'bädri'ba.”

25 'Dooko Samuele iti taŋgye 'bädri'ba ro ndi kama ndaro be tana te lidri ri; ago nda egyi tana te buku ya ago 'bate OPI kandra. 'Dooko Samuele pere lidri cini te oyine, 'dialo oyite 'ba ndaro ya. 26 Ago Saulo oyi kpate kovole 'ba ndaro se Gibea ya ana ya, ago lidri se turi ako Lu ko'bi yana be kai oyite nda be. 27 Oko lidri kozi azaka atayite ekye: “Mano ono unina ama opane eŋwanyeya?” Ago ànya mawoyi nda te, ago eziyi ŋgakado kote ndäri. Oko Saulo ri ŋga iro gi trwe.