1 Ambâ 5 - The Holy Bible in Moru (BAIBOLO ALOKADO) (MB)

Zelevoi Rubena ro

1 Kwoi ni zelevoi Rubena ŋgwa kayo ro Yakoba ro ro owo. (Oko tana nda ye tate toko ogyeako täpi ndaro robe, ta'dota taŋgye uti ndaro ro ozote Yosepa ri, tana ta'doro egyi ävuru ndaro kote zelevoi lako a'do 'di utiro ronye. 2 Katidri Yuda ro ka'do gica mbara ro ago 'dimiri'bai ka'do gica ni kigyesi katidrii cini dri owo.) 3 Rubena ŋgwa kayo ro Yakoba ro orivoya ŋgwàagoro be su: ni Anoka, Palu, Ezerona, ndi Karumi be. 4 Kwoi ni zelevoi Yoele ro owo le kovole'ba na ya: ni Semaya, Goga, Simei, 5 Maika, Reya, Bala, 6 Bera, se Tigelata Pilesera 'bädri'ba Asaria ro kurube kamba'ba ro di ana, nda ni dri'ba katidri Rubena'bai ro owo. 7 Egyi katidri Rubena ro ro dri'bai käläsikala ànyaro voro orivoya oso nonye, dri'ba nai ni Jiela, Zekaria, 8 Bela, ŋgwa Azaza ro, kwozo Sema ro, käläsikala Yoele ro ro, se rite Aroeri ya, sagwo le Nebo ndi Balameona be ya. 9 Anya riyi kpate ogone 'buzelesi sagwo le sidri vocowa se ketobe ni Golo Eferata roya ana ya, tana koronya 'ba ro ànyaro litite amba wari Gilada roya. 10 Tu 'bädri'ba Saulo ro rosi katidri Rubena ro gota Agara'bai te ago tufu ànya te kyila ya, ago ànya riyite wari cini ànyaro ogone 'buzele Gilada ro yasi ya.

Zelevoi Gada ro

11 'Bakala Gada ro riyite ogone mä'dudri 'bakala Rubena ro roya wari Basana roya sagwo le Saleka ya. 12 Yoele ni dri'ba käläsikala käti ro, käläsikala ṛiri ro ni Safama, Janai ndi Safata be ni dri'bai käläsikala azaka ro Basana ya. 13 Ago 'bakala ànyaro azakana ni 'di käläsikala njidrieri ono ro: ni Mikaela, Masulama, Sheba, Jorai, Jakana, Zia, Ebera. 14 Anya orivoya zelevoi Abihaila ŋgwa Uri ro ro, arabe zutui ànyaro voro orivoya oso nonye: Abihaila, Jaroa, Gilada, Mikaela, Jesisai, Jado, Buza, 15 Ahi ŋgwa Abediela ro kwozo Guni ro, ni dri'ba käläsikala kwoi ro. 16 Ànya riyite wari Gilada ndi Basana be roya, ndi 'ba'desii se lau ana be yasi, ago wari cini lowo ro Saroma ro yasi. 17 (Egyi zelevoi se cini kwoi te tu Yotama 'bädri'ba Yudaro ndi Yeroboama 'bädri'ba Yisaraele be rosi.)

Kyila'bai 'Bakalai 'Buzelesi ro

18 'Bakalai Rubena, Gada, ndi telesi 'bakala Manase ro robe, kyila'bai kyila oyero ànyaro se orivoya ŋga ruotaro be, bando be, ndi kusu be be, se embate orivoya kado otina cini orivoya kutu 'butesu fosu kama njidrieri 'butenjidrialo. 19 Anya yeyi kyila te 'bakalai Agara'bai ro, Jetura, Nafisa ndi Nodaba be be. 20 Ànya yiyi tate Lu ya ago mätuyi nda te ta ŋgaopa rota, ago Lu zatadri mätu ànyaro rote ago 'ba ànya te Agara'bai opene ṛe ndi beraazii cini ànyaro yibe. 21 Ànya oroyi koronyai 'baro kyila'baazii ànyaro rote, gamelei kutu 'butenji (50,000), timele kutu kama ritu 'butenji (250,000), doŋgyi kutu ritu (2,000), ago lidri se arube lidriidri ro orivoya kutu kama alo (100,000). 22 Ànya tufuyi amba kyila'baazii rote, tana kyila ana orivoya ole Lu ro yi, ànya riyite vo ànyaro yasi madale tu 'di ururo kamba'ba ro rosi.

Lidri Manase ro 'Buzelesi

23 Lidri Manase ro 'buzelesi riyite wari Basana roya le ogone mä'dudriro sagwo le Bala Eremona, Senira, ndi 'bereŋwa Eremona robe ya. 24 Dri'bai käläsikalai ànyaro ro ni kwoi: Ebera, Isi, Eliela, Azeriela, Yeremaya, Odavaya, ndi Jadiela be. Ànya cini orivoya 'di mbaraekye yi, ago dri'bai likuekye yi käläsikala ànyaro ya.

Oro 'Bakalai se 'Buzelesi te

25 Oko lidri a'dote ta'diriako Lu zutui ànyaro ro ri, ago e'beyi nda te ago mätuyite lui tu'dei se Opi keperebe ni ànya milesi kai ro ayani. 26 Ago Lu Yisaraele ro eŋga ya Pula 'bädri'ba Asaria ro, (se ni Tigelata Pilesera) ago nda oto 'bakalai Rubena, Gada, ndi telesi 'bakala Manase ro robe te di. 'Ba ànya te orine 'du Ala, Abora, ndi Arana be yasi, ago Golo Gozana kala madale tu ono si.