1 Ambâ 18 - The Holy Bible in Moru (BAIBOLO ALOKADO) (MB)

Ŋgaopeṛe Kyila'bai Dawidi ro ro

1 Ono vosi 'Bädri'ba Dawidi go gota Felesete'bai kpate, ago go pe ànya kpate ṛe. Nda ru 'bakici ànyaro Gata te ndi 'baŋwai se gbikyi lomvoigyesi be. 2 Nda pe Moaba'bai kpate ṛe, ago Moaba'bai a'dote ruindu'bai ro Dawidi ri, ago sayi ŋga te ndäri.

3 Dawidi gota Adadezera 'bädri'ba Zoba ro kpate, loto wari Amata ro lomvo, tana Adadezera ojote wari golo Eferata ro urune. 4 Dawidi ru arabia kyila ro teni nda rigyesi kutu alo (1,000), farasi'bai kutu njidrieri (7,000), kyila'bai se kabe aba pa si kutu 'buteritu (20,000); ago nda toga farasii arabia osero rote cini, oko nda eta anjokona te arabia kama alo (100) osero. 5 Ondro Siria'bai Damaseka ro kikyiyite Adadezera 'bädri'ba Zoba ro opane oko, Dawidi tufu lidri Siria'bai rote kutu 'buteritu foritu (22,000). 6 'Dooko Dawidi 'ba kyila'bai te gawai yasi wari ànyaro Damaseka ya yasi; ago Siria'bai a'dote ruindu'bai ro Dawidi rii, ago sayi ŋga te ndäri. Ago Opi 'ba Dawidi te ŋgaopene ṛe vo cini yasi. 7 Dawidi ru ŋga 'di otaro logo läguläguro se 'desii losi ro Adadezera ro kuruyibe kai te, ago ezi ànya te Yerusalema ya. 8 Nda ru atala amba du'duro kpate ni 'bakicii Adadezera ro Tibata ndi Kuna be yasi. Kovolesi Solomo ede karaṛi, läŋgyiri ndi lakazà atala ro Yekalu ro teni kigyesi.

9 Ondro Toi 'bädri'ba Amata ro keri tate Dawidi pe kyila'bai Adadezera 'bädri'ba Zoba ro rote cu ṛe oko, 10 nda zo ŋgwa ndaro Adorama te mede oyene 'Bädri'ba Dawidi ri, ago titikäṛi oyene ndäri tana nda ye kyila te Adadezera be ago pe nda te ṛe ana ro; tana Adadezera ondoalo a'dote kyila oyevoya Toi be. Adorama ezi lakazà se edebe logo läguläguro, mo'di ndi kati be si te Dawidi ri; 11 'bädri'ba Dawidi di ŋgase kwoi kpate Opi ri, tro mo'di ndi logo läguläguro se nda kurube ni tu'dei cini se nda kopebe ṛe Edoma'bai, Moaba'bai, Amona'bai, Felesete'bai ndi Amaleka'bai be rigyesi iyi be.

12 Abisai se endre na ni Zeruya ana, tufu Edoma'bai te kutu 'butealo fonjidriena (18,000) Vodelero Täyi roya. 13 Nda 'ba kyila'bai te Edoma ya; ago Edoma'bai cini a'dote ruindu'bai ro Dawidi ri. Ago Opi 'ba Dawidi te ŋgaopene ṛe vo cini yasi.

14 Dawidi rite 'bädri'ba ro vo Yisaraele ro cini dri, ago nda ye lidri te kadoro taŋgye si. 15 Yoaba ädrupi Abisai ro se endre nda ni Zeruya ana ni otaozo'ba yi kyila'bai dri, ago Yosapata ŋgwa Ailuda ro ni egyi'ba miri ro; 16 Zadoka ŋgwa Aituba ro ndi Aimeleke ŋgwa Abiatara robe ni kohanii; ago Savesa ni egyi'ba vure ro. 17 Benaya ŋgwa Jehoiada ro rite Kerete'bai ndi Pelete'bai be dri; ago ŋgwàagoro Dawidi ro ruyi losi 'desiro kpate miri ndaro roya.