1 Ambâ 11 - The Holy Bible in Moru (BAIBOLO ALOKADO) (MB)

A'do Dawidi ro 'Bädri'ba ro Yisaraele ndi Yuda be dri

1 'Dooko lidri cini Yisaraele ro otoyikalate voaloya Dawidi re Eberona ya, ago atayite ndäri ekye: Ama orivoya lomvo ago kari modo miro ro. 2 Kyeno Saulo bedri ni 'bädri'ba yi, nyugu kyila'bai Yisaraele ro ni kyila ya, ago nyologo ànya ni 'bäru; ago Opi Lu miro atate miri ekye: Nya'dona 'da lepe'ba lidri iro Yisaraele ro, ago nya'dona 'da miri'ba ànyaro. 3 Ta'dota dri'bai cini Yisaraele ro ikyiyite 'bädri'ba Dawidi re Eberona ya; ago Dawidi 'ba tao'baro te ànya yibe Opi kandra, ago ànya äṛuyi nda te 'bädri'ba ro Yisaraele dri, oso se Opi katabe Samuele si ana ronye.

4 'Bädri'ba Dawidi ndi Yisaraele'bai cini be oyiyite gotayi 'bakici Yerusalema te, se ni Jebusa, se Jebusa'bai ni lidri wari na ana ro. 5 Jebusa'bai atate Dawidi ri ekye: Miri ikyine noŋwa i'do, caoko Dawidi ru vo mbaraekye Zaiona rote, se yauono änite 'bakici Dawidi ro ro. 6 Dawidi atate ekye: Mano se kabe Jebusa'bai ufuna käti a'dona otaozo'ba kyila'bai ro! Yoaba, se endre na ni Zeruya ana oyite käti, ago nda a'dote otaozo'ba kyila'bai ro. 7 Tana Dawidi rite vo mbaraekye ya, ta'doro äzi anya te 'Bakici Dawidi ro. 8 Nda go be 'bakici te gbikyi, eto roni Milo ya ndi le 'batiazi ànyaro lomvo; ago Yoaba go ede anjoko 'bakici rote. 9 Dawidi ugu a'dote mbararo parandra, tana Opi Mbaraekye orivoya tro nda be.

Kyila'bai Likuekye Dawidi ro

(2 Samuele 23:8-39)

10 Kwoi ni kyila'bai likuekye lidri Dawidi ro ro owo, se payi nda te miri ndaro ya, ndi tro Yisaraele cini be, o'baza 'bädri'ba ro; oso Opi ko'ba tana be ronye, ago ànya ätiyi miri 'bädri'ba ndaro rote mbararo. 11 Käti ni Jasobama, ni käläsikala Akemona ro yasi ni dri'ba 'di nätu ro; nda ye kyila te äzu ndaro si lidri kama nätu (300) be ago tufu ànya te kpeye tu alo si.

12 Kinjona lidri likuekye ro lako ni Eleazara ŋgwa Dodo ro ni käläsikala Ahowa ro yasi. 13 Nda Dawidi be yeyi kyila te Felesete'bai be Pasadamina ya. Yisaraele'bai ka eto umu ni Felesete'bai ri oko, nda orivoya ämvu kyifo roya. 14 Ta'dota nda ndi lidri ndaro yibe edreyite kitoriya ämvu roya, ago yeyi kyila te Felesete'bai be; ago Opi ozo ŋgaopeṛe 'desi te ndäri.

15 Tu alo si 'di nätu dri'bai kyila'bai 'butenätu ro ro oyiyite luutu dri vose Dawidi koribe kigye ana ya loto kugyi Adulama ro lomvo, 'dooko kyila'bai Felesete'bai ro otoyi gawa te Vodele Refaima roya. 16 Tu gi ana si Dawidi orivoya vo mbaraekye ya; ago kyila'bai Felesete'bai ro orivoya Beteleme ya. 17 Tu alo si lu 'ba ro fu Dawidi te nda atate ekye: Osoaba 'diaza alo ezi gyi gwo märi umvune ni koro Beteleme ro se dereŋwa lomvo ana yasi! 18 'Dooko kyila'bai likuekyero se nätu kai ŋgoyivote gawa Felesete'bai ro yasi, ago ndiyi gyi te ni koro Beteleme ro se dereŋwa lomvo ana yasi eziyite Dawidi ri. Oko Dawidi lekote umvune, nda date ŋgapäṛi ro Opi ri. 19 Ago atate ekye: Mänina ko umvune! Landre gwo osoago ma kari lidri nätu se konjayibe adri ànyaro lomvo ono ro umvuna! Kwoi ni tase kyila'bai likuekye ro nätu kai koyeyibe owo.

20 Abisai ädrupi Yoaba ro, ni orivoya dri'ba lidri se likuekye 'butenätu ana ro. Nda ye kyila te äzu ndaro si lidri kama nätu be ago tufu ànya te; ago nda a'dote likuekye ro kyila'bai 'butenätu lako. 21 Nda likute parandra kyila'bai 'butenätu lako, ago a'dote otaozo'ba ro ànyari; oko liku ndaro ojo kote 'dise Nätu ana be.

22 Benaya ŋgwa Yoyada ro ni Kabezela yasi, orivoya kyila'ba likuekye yi, nda ye ta amba te turiako si, tufu kyila'bai mbaraekye ritu Moaba'bai rote. Tu alo si nda oyi kpate cite 'bu ya ago fu ibi te tu sia e'dero si. 23 Nda fu Ezipeto'bai alo aza kpate, mano kaca yi, ombana ocana orivoya ndrani kadrakadra ritu drisi. Ezipeto'ba ana orivoya äzu be 'desi dri ndaro ya oso loro boŋgo o'diro ronye; Benaya gota nda te dofo si, ago ivu äzu teni Ezipeto'ba ana rigyesi, ago go fu nda te loto äzu modo ndaro rosi. 24 Benaya ŋgwa Yoyada ro ye tase kwoi te turiako si, nda ni alo aza lidri se likuekye 'butenätu kai ro. 25 Nda likute ndra kyila'bai 'butenätu lako, oko liku ndaro ojo kote 'dise Nätu ana be. Ta'dota Dawidi 'ba nda te dri'ba nda okwa'bai ro.

26 Kwoi ni kyila'bai azaka se likuekye ro owo: Asaele ädrupi Yoaba ro, Elinana ŋgwa Dodo ro ni Beteleme yasi, 27 Samota ni Aroda yasi, Eleza ni Peleta yasi. 28 Ira ŋgwa Ikesa ro ni Takoa yasi, Abiezera ni Anatota yasi, 29 Sibekai ni Usa yasi, Ilai ni Ahowa yasi. 30 Marai ni Netofa yasi; Eleda ŋgwa Bana ro ni Netofa yasi, 31 Itai ŋgwa Ribai ro ni Gibea Benjamina ya yasi, Benaya ni Piratona yasi. 32 Urai ni vodelero goloŋwai Gasa ro yasi, Abiele ni Areba yasi; 33 Azemaveta ni Baruma yasi, Eliaba ni Salebona yasi. 34 Asema ni Gizona yasi, Jonatana ŋgwa Sage ro ni Arara yasi, 35 Ayima ŋgwa Sakara ro ni Arara yasi, Elifala ŋgwa Ura ro, 36 Efera ni Mekera yasi, Aija ni Pelona yasi, 37 Ezero ni Karemela yasi, Narai ŋgwa Ezebai ro, 38 Yoele ädrupi Natana ro, Mibara ŋgwa Ageri ro, 39 Zeleka ni Amona yasi, Narai lakazà Yoaba ro uŋgyi'ba na ni Berota yasi, 40 Ira ndi Gareba be ni Itera yasi, 41 Uria Ete'ba, Zabada ŋgwa Alai ro, 42 Adina ŋgwa Siza Rubena'ba ro dri'ba 'di 'bakala Rubena ro ro, gboko kyila'bai ndaro ro orivoya 'butenätu, 43 Anana ŋgwa Maka ro, Yosapata ni Mitena yasi, 44 Uzia ni Asetera yasi, Sama ndi Jiela be ŋgwàagoro Otama ro ni Aroeri yasi 45 Jediela ndi Joa be ŋgwàagoro Simeri ro ni Tiza yasi, 46 Eliela ni Mava yasi ago Jeribai ndi Josavia be, ŋgwàagoro Elinama Itema ro ni Moaba yasi, 47 Eliela, Obede ndi Jasiela be ni Mezo yasi.