Driayo ta Ŋgaopa rota
1 Äye OPI Lu maro, ma driayo miri kituzwi ŋgaopa ta,
ago ŋgäkyi si ma ikyi mikandra.
2 Nyeri mätu maro,
nyeri liyi maro ta ŋgaopa rota!
3 Tana rriti amba 'dete mädri
ago ma te ti odrane.
4 Ati mate 'diazaka se ka oyebe odrane lako,
ma te orivoya mbaraako.
5 E'be ma te avoi lako;
ma orivoya oso 'dise äfute alalate 'budrii ànyaro yasi ronye,
oso ànya se nyije tana te ronye,
tana minina kote ànya opane.
6 Mivo ma te le 'budri ociekye ya,
le 'bu uniro ago ociekye ya.
7 Kyila miro ka o'de läŋgyi be mädri,
ago nyitisi ma te gbulä anyaro zele.
8 Mi'ba bereazii maro te ma e'bene;
ago mi'ba ma te ŋgakozi ro ànya mile.
Asekala maro te ago mänina kote voopane;
9 mi maro orivoya mbaraako ni liyi ri.
OPI, ondoalo ma mi uzi
ago ma drì maro eŋga kuru miri mätu ya.
10 Inye'do miye talaroro ndi avo riya?
Inye'do ànya ŋgayi gindi kuru mi räṛune ya?
11 Inye'do ŋgalu 'duro miro ata tana ndi 'budri ya
kode a'do'diri miro ata tana ndi
vo ŋgapere ro ya ya?
12 Inye'do talaroro miro andre gindi vo uniro ya
kode takado miro andre gindi wari se ije tana te ya ya?
13 OPI, ma driayo miri ta ŋgaopa rota;
kyenoŋbo si ma mätu oye miri.
14 OPI, nya ma ogazo etaya?
Nya kundu oza märi etaya?
15 Ṛoni agoanji maro si, mezarute ago ma'dote ti odrane;
mezarute ni taezaro miro ro risi, ago ma te ŋgaopa aza oko.
16 Kyila kozipara miro ronyo ma te;
ŋgagota koziro miro ka ma ufu.
17 Ànya muyidri maro te kituzwi oso gyitändri ronye;
ànya seyikala maro te lamadri cini yasi.
18 Mi'ba bereazii se ca ti maro kpate ma e'bene,
ago ŋgätini te toto ni oriazi maro.