Mätu ta Ŋgaopeṛe rota
1 OPI kozatadri miro tu rriti rosi!
Opi Lu Yakoba ro kagaga mi!
2 Nda kezi ŋgaopa miri ni Yekalu ndaro yasi
ago kozo ŋgaopa miri ni 'Bereŋwa Zaiona yasi.
3 Nda koyi ta ŋgapäṛi cini miro ro
ago ka'do yai'dwesi ta ŋgapäṛi ozaro miro rota.
4 Nda kozo ŋgase ya miro kolebe
ago ko'ba taora cini miro ka'do kado.
5 Mitrena 'da riyä si ŋgaopeṛe miro tana ro
ago mèŋgana bere amaro 'da kuru ävuru Lu amaro roya.
OPI koza taeji cini miro tadrina.
6 Yauono mäni ndi anjioko OPI kani 'bädri'ba onjionji ndaro opa;
OPI ka tadri ndaro oza ni vo'buyakuru alokado ndaro yasi
ago OPI kani ŋgaopeṛe para ozo ndäri mbara ndaro si.
7 Lidri azaka yi ta ànyaro arabia kyila roya
ago rukäna yi ta farasii ànyaro ya; oko màyi ta amaro OPI Lu amaro ya.
8 Lidri oso nonye ono pälina 'da ago o'dena 'da,
oko màŋgana 'da ago mèdrena 'da ŋgyiri.
9 Nyozo ŋgaopeṛe 'bädri'ba ri, Äye OPI,
miza tadri amaro ondro màte läziuzi owo.