Ope ṛe ago Odra Abisolomo ro
1 'Dooko 'Bädri'ba Dawidi otokala lidri se orivoya cini nda be ana rote, ago nda 'ba otaozo'bai 'desi rote kutu drisi ago kama drisi. 2 Ago Dawidi zo kyila'bai te, nda lonyi gboko kyila'bai rote nätu, alodi orivoya Yoaba zele, alodi aza ädrupi Yoaba ro Abisai ŋgwa Zeruya ro zele, ago ninana Itai Gata'ba zele. Ago 'bädri'ba atate kyila'bai ndaro ri ekye: “Ma andivo moyina kpa kyila ya ami yibe.”
3 Oko ànya atayite ekye: “Hwa, beṛo ko miri oyine ama yibe. Tana ondro mä̀mu bete, ànyari ta amaro otine i'do. Ondro telesi kpäkyi amaro kodra be, ànyari ta amaro otine i'do. Oko lagye miro orivoya oso kutu 'bute (10,000) amaro ronye. Ni kadopara miri orine noŋwa 'bakici ya, ago mizo ŋgaopa robe ämäri.”
4 'Bädri'ba atate ànyari ekye: “Mayena tase nyusube kadopara ndra 'do ndi.” Ndi 'bädri'ba edrete dereŋwa eciro 'bakici ya lomvo, ondro kyila'bai ndaro kate ugu ofo tesi kama ro ago kutu ro owo. 5 Ago 'bädri'ba ta Yoaba, Abisai ndi Itai be te ekye: “Ta maro ta mìye ŋga kozi aza ko agoanji Abisolomo ri.” 'Bädri'ba kabe ota ozo ta Abisolomo rota dri'bai ri kyila'bai cini eriyi tana te.
6 Ndi kyila'bai Dawidi ro fote tesi vo kyila roya ago yeyi kyila te Yisaraele'bai be kokye Eperaima ro ya. 7 Ago kyila'bai Dawidi ro peyi Yisaraele'bai te ṛe, ago äfu lidri te amba tu gi ana si, otina orivoya kutu 'buteritu (20,000). 8 Kyila larirute wari ana yasi, ago vo kwokye ro 'do tufu kyila'bai te ndrani bando drisi.
9 Ago ndri oko Abisolomo 'bedrite kyila'bai azaka Dawidi robe. Abisolomo kugu umu doŋgyi ndaro si, ago doŋgyi kugu umu gwoṛi vudi ro zele si oko, drî Abisolomo ro ŋga lele ṛo anda lakole gwoṛii ro ya. Ago doŋgyi ndaro ugu umute driya ago e'be nda te pelevoya lakole vokuru ro gyini be ya. 10 Oko mano aza ni lidri Dawidi ro lakosi ndre nda te, ago oyi iti tana te Yoaba ri ekye: “Mindre, mandre Abisolomo te pelevoya vudi dri.”
11 Ndi Yoaba atate mano se kiti ta be ndäri ana ri ekye: “Mindre nda ndi! Mi'de be ko nda ufune lau vo dri etaya? Aba 'dooko ma'dona ndi yai'dwesi tonyo mo'di ro 'bute alo ozone miri ndi kyini kundu robe.”
12 Oko mano ana atate Yoaba ri ekye: “Aba ondro nyozo tonyo mo'di ro gica kutu alo (1,000) märi, mänina ko drì maro eŋgane ŋgwa 'bädri'ba ro dri. Tana ama cini merite 'bädri'ba ozo ota te mi, Abisai ndi Itai be ri ekye: ‘Ta maro ta miye ŋga kozi aza ko agoanji Abisolomo ri.’ 13 Ondro ka'do maye nda bete koziro adri ndaro ufuna si (änina ko ta aza da'done ni 'bädri'ba ri), 'dooko mi andivo nyeŋgyena mi ndi pere.”
14 Yoaba atate ekye: “Male ko saa enjine oso ono ronye mibe.” Ago nda ru äzu nätu te ago so Abisolomo te käsi ya sina, 'dooko nda dri gi lidriidriro pelevoya vudi dri. 15 Ago agoànji 'bute alo uŋgyi'bai lakazà kyila ro Yoaba ro ro, muyi lomvo Abisolomo rote, 'diyi nda te, ago fuyi nda te.
16 'Dooko Yoaba vo cekuṛe te, 'dooko kyila'bai ndaro egoyite ni osovoya Yisaraele'bai vo; tana nda tadri ànyaro te. 17 Ago ànya ruyi avo Abisolomo rote, ago voyi te 'bu 'desi ya kwokye ya, ago ànya droyi kuni te donjo driigye. Ndi Yisaraele'bai cini mute 'ba ànyaro yasi.
18 Tu oriro Abisolomo ro si nda ede ŋbiṛi te Vodelero 'Bädri'ba roya andivo ndaro ri, tana nda atate ekye: “Ma teinye ŋgwaago ako se ävuru maro o'baza orine lidriidriro.” Ago nda zi ŋbiṛi ana te ävuru modo ndaro ro dri. Ago äzite Ŋbiṛi Abisolomo ro le tu ono si ono.
Iti Odra Abisolomo ro tana te Dawidi ri
19 'Dooko Aimaza ŋgwa Zadoka ro atate Yoaba ri ekye: “Mi'ba mämu lazo be 'bädri'ba ri, tana OPI pa nda te ni kyila'baazi ndaro rigyesi.”
20 Oko Yoaba zatadrite ekye: “Ko miri lazo ugune tu ondro ono si, oko nyuguna lazo 'da tu aza si, oko ondro ono miri lazo ugune i'do, tana ŋgwa 'bädri'ba ro drate.” 21 'Dooko Yoaba atate Kusa'ba ri ekye: “Nyoyi nyiti tase mindrebe ono tana 'bädri'ba ri.” Kusa'ba se ana ändite Yoaba kandra, ago mute.
22 'Dooko Aimaza ŋgwa Zadoka ro atate Yoaba ri kpa to'dina ekye: “Ŋga aza kaca a'do ya mi'ba mämu Kusa'ba vo.”
Ago Yoaba atate ekye: “Nyaumu kpa etaya ŋgwa maro? Miri päläti urune lazo ugu ta i'do.” 23 Caoko, Aimaza atate ekye: “Ŋga aza kaca a'do mämuna ndi.”
Ago Yoaba atate ndäri ekye: “Mimu.” 'Dooko Aimaza mute liti gobe Vo Rriro Yaradene roya yasi, ago eŋgye Kusa'ba te.
24 Dawidi rite lakole dereŋwa ritu roya; ago vookwa'ba tute kuru tiṛi drisi ago edrete dridopi dereŋwa roya, ago ondro nda keŋga mi ndaro te kuru oko, nda ndre manoaza te eziimuvoya iṛe. 25 Vookwa'ba zi 'bädri'ba te ago iti tana te ndäri. Ago 'bädri'ba atate ekye: “Ondro nda ka'do bete iṛe, 'do nda orivoya lazo be itine.” Ago nda ezi imute ga lototi. 26 Ago vookwa'ba ndre mano aza kpate eziimuvoya; ndi vookwa'ba zi dereŋwa gaga'ba te ago atate ndari ekye: “Mindre, manoaza ka kpate eziimu iṛe.”
'Bädri'ba atate ekye: “Nda ka kpa lazo ezi.”
27 Ago vookwa'ba atate ekye: “Mandrebe 'di käti ana ka imu oso Aimaza ŋgwa Zadoka ro ronye.” Ago 'bädri'ba atate ekye: “Nda orivoya mano kado yi, ago nda kikyi lazokado be.”
28 'Dooko Aimaza zi 'bädri'ba te ṛeṛe ago atate ekye: “Ŋga cini kado.” Ago nda ändite 'bädri'ba kandra militi si gyini dri ago atate ekye: “Räṛu ka'do OPI Lu miro ri, se ozo mbara te miri lidri se ogbote mi 'bädri'ba be ono opeza ṛe.”
29 Ago 'bädri'ba atate ekye: “Inye'do ta cini ndi kado agoanji maro Abisolomo be ya?”
Aimaza zatadrite ekye: “Yoaba ka ruindu'ba miro ezona be, meri kporo amote amba, oko 'bo e'diyi ya aba mäni ko.”
30 'Bädri'ba atate ekye: “Mizaru telesi ago nyedre lau.” Ndi nda zarute ago edrete lau.
31 Ndri oko, Kusa'ba esate, ago nda atate 'bädri'ba ri ekye: “Lazokado tana opi 'bädri'ba maro. Tana kitu ono si ono, OPI pa mi teni mbara 'dise cini koŋgabe midri ro yasi.”
32 'Bädri'ba atate Kusa'ba ri ekye: “Inye'do ta cini ndi kado agoanji maro Abisolomo be ya?” Ago Kusa'ba se ana zatadrite ekye: “Ka'do ndi inye kyila'baazi mi opi 'bädri'ba maro ro ri, ago ànya se cini koŋgabe midri mi oyene koziro, ka'do ndi oso agoanji ana ronye.” 33 Ndi 'bädri'ba a'dote tusuro ndra, ago tute zo ya kurusi ya dereŋwa drisi ago liyite. Ago ondro nda kate ugu oyi oko nda trete liyi be ekye: “Äye ŋgwa maro Abisolomo, ŋgwa maro, ŋgwa maro Abisolomo! Aba madrana ṛoni vo miro ya! Äye Abisolomo, ŋgwa maro, ŋgwa maro.”