Adravo Ezekia ro ndi Ruedena be
(2 'Bädri'bai 20:1-112 Ambâ 32:24-26)1 Tuse kai si adravo ru 'Bädri'ba Ezekia te ṛo ti odrane odra. Ago nebi Yesaya ŋgwa Amoza ro oyite nda ondrene ago atate ndäri ekye: “OPI kani ata nonye ekye mira ta cini ŋgyero tana nya oye odrane, miri voopane i'do.”
2 Ezekia zamite tiṛi lomvo ago mätute OPI ri ekye: 3 “OPI mämätu mi, miyi tase mindurube miri 'diriro ago taoro si ono tana, ago se ondoalo mojote tase kadoro mile miro ya 'do oyene ayani.” Ago nda eto liyite livube amba.
4 'Dooko OPI ta Yesaya te ekye: 5 “Nyoyi ago nyata Ezekia ri mikye OPI, Lu zutu miro Dawidi ro kani ata nonye ekye: meri mätu miro te ago mandre miendre miro te; mago ma'bana mi 'da ogo orine ndroa na 'butealo fonji. 6 Mapana mi 'da ndi 'bakici Yerusalema ro ono be ni 'Bädri'ba Asaria ro risi, ago magagana 'bakici ono 'da.”
21 Yesaya ititate 'bädri'ba ri kyi'du se äyibe 'boloto 'do o'bane mi kure ndaro roya, 'dooko nda a'dona ndi kadoro. 22 'Dooko 'Bädri'ba Ezekia ejitate ekye: “Taka'daro se unizana anjioko ma oye oyine Yekalu ya ni e'diya? ”
7 Yesaya logotate ekye: “Ono ni taka'daro OPI ro owo miri, OPI oyena ŋgase nda ko'ba tao'ba na be 'do ndi, 8 OPI o'bana lindri kotopa uturo se 'Bädri'ba Aza kobebe 'do, uswena 'da kovole mba'damba'da na 'butealo.” Ndi lindri na swete kovole mba'damba'da na 'butealo.
9 Ondro adravo Ezekia 'bädri'ba Yuda ro kokyete oko, nda egyi loŋgo ono te ekye:
10 Musutate kitoriya rriti maro roya makye maro mate uguoyi
mate uguoyi dereŋwa 'bädri avo ro yasi,
ori anjoko maro orine lau.
11 Musutate makye maro märi ogone OPI ondrene 'bädri se abe ori lidriidriro kigye
ono ya te i'do
kode 'di lidriidriro aza ondrene te i'do alona.
12 Makye maro akye tu maro oriro te ago tana kyete,
oso abe zo boŋgoro timele lekye'ba ro eŋgyena vuru 'do ronye;
oso abe boŋgo olo ni mberekye o'dina ro yasi 'do ronye, ta maro kyete.
Musutate makye maro tu gi ŋgäkyi ana si ana OPI kate ori maro o'bana okyene.
13 Miliyite ŋgaopa ta ŋgäkyi ra,
oso ibi ronye nda ka kowa cini maro toŋgo.
Musutate makye maro tu gi ŋgäkyi ana si ana OPI kate ori maro o'bana okyene.
14 Uwi ata maro ro a'dote oso ari ronye,
ago miliyite oso tu'bu ronye.
Mi maro okwote ni voondrevoya vo'buyakuru ya.
Äye OPI mate rueza mipa ma ni rriti se cini ono yasi.
15 Matana ekye e'diya? Tana OPI iti ta te märi.
Ekye iye ta ono ni, ago mäni kote u'dune tana mate tusuro.
16 Opi, lidri ka ori ta miro si, ago ma kpa ori ta miro si;
Nyede ma jiŋgiṛi ago mi'ba mari lidriidriro.
17 Rriti amba maro ono orivoya takadoro märi.
Tana ŋgalu miro si mipa ma teni odra yasi;
ago nye'be mate ta takozi cini maro rota.
18 'Di alo aza unina ko aro'boya oyene miri ni 'bädri
avo ro yasi;
avo unina ko mi räṛune
avo unina ko taoyine a'do'diri
miro ono ya.
19 'Dise lidriidriro 'do kani mi räṛu,
oso mabe mi räṛu yauono ronye.
Täpii kayi a'do'diri miro tana itina
ŋgàga ànyaro ri.
20 OPI, opana ma 'da,
ago maŋgona loŋgo 'da lekyembe o'bi,
Yekalu miro ya tu cini
ori amaro rosi.