Yisika ka Ori Gerara ya
1 Mä'bu aza 'dete wari ana ya, ana kpa to ni se tu Abarayama rosi ri. Yisika oyite Abimeleka 'bädri'ba Felesete'bai ro re Gerara ya. 2 OPI loforute ndäri ago atate ekye: “Nyoyi ko Ezipeto ya: miri wari se ma oye tana itine miri ono ya: 3 miri noŋwa ago ma'dona ndi tro mibe, ago mäṛuna mi 'da, ago ma oye wari cini ono ozone miri ndi zelevoi miro be, ago mätina tao'ba se ma'babe Abarayama täpi miro ri ono ndi. 4 Ago militina zelevoi miro 'da oso 'bi'bii vo'buyakuru ro ronye, ago mozona wari ono 'da cini ànyari, tu'dei cini ejinayi ma 'da ànya äṛune oso mäṛu zelevoi miro be ronye. 5 Tana Abarayama ro ma te ago äti ota maro ndi tase marabe be.”
6 Ta'dota Yisika rite Gerara ya. 7 Ondro lidri vo ana ro kejiyi nda te ta toko ndaro rota oko, nda atate ekye: “Anya orivoya endreŋwa maro:” tana nda turi turi atavoya ekye: “Anya orivoya toko maro,” tana nda ekye: “Ukyi lidri vo ana ro ufuyi ma 'da ta Rebeka rota.” Tana anya liŋgyi tawi. 8 Ondro Yisika korite lau tuna amba oko, tu alo aza si Abimeleka 'bädri'ba Felesete'bai ro kondrevote vouŋbo yasi oko, ndre Yisika te ojivoya Rebeka toko ndaro be. 9 Abimeleka zi Yisika te atate ndäri ekye: “Endaro anya orivoya toko miro; oko mi'debe atana mikye anya endreŋwa miro eŋwanye ya?”
Yisika zatadrite ekye: “Tana makye ukyi äfu ma 'da ta anyaro ta.”
10 Ago Abimeleka atate ekye: “Miye 'do e'diyi ämäri inye niya? Aba nonye ono lidri azaka u'duna mu'du toko miro be, se 'dooko aba nyezi taenji te ämädri.” 11 Ndi Abimeleka emba mi lidri cini rote ekye: “Nda se aza koye mano ono ndi toko ndaro be te koziro ndi 'dina 'do ufune.”
12 Yisika so ämvu te wari se ana ya, ago lo drí inya rote ndroa alo ana ya perena kama alo ndrani se nda kezi osona be ana ri. Tana OPI äṛu nda te. 13 Ago nda a'dote ŋga be amba, ago ugu ŋga usu te ndra, madale nda a'dote ŋgaamba'ba ro ndra. 14 Ago nda a'dote äṛi timele ro ndi tii robe amba ago ruindu'bai be nyalakpa, ta'dota Felesete'bai 'bayi mawi te nda be. 15 Ta'dota ànya tisiyi mi koro gyi ro se cini ruindu'bai täpi ndaro Abarayama ro ku'diyibe ṛo tuse Abarayama drigba dri lidriidriro ana si iyi rote, ago lagayi ànya tezo ondivona ya.
16 'Dooko Abimeleka atate Yisika ri ekye: “Nyoyi ri ni 'bädri amaro yasi, tana mbara miro te ndrani ämädrisi.” 17 Ndi Yisika narute ni lau ago kyi oto gawa ndaro te vodele Gerara roya, ndi rite lau. 18 Yisika go ava koro gyi ro se ä'dibe ṛo tu Abarayama täpi ndaro rosi ana kpate to'di; tana Felesete'bai tisiyi mina te odra Abarayama ro vosi, ago nda go zi ävurunai kpate oso se täpi ndaro kuzibe ana ronye. 19 Ago ruindu'bai Yisika ro 'diyi koro aza kpate vodele ya, ago eto gyi utite. 20 Ago lekye'bai Gerara ro peyikalate lekye'bai Yisika ro yibe, ànya ekye: “Gyi ono orivoya amaro.” Ta'dota Yisika zi ävuru koro ana rote Yisika (anjioko kalaope) tana ànya peyikala te driigye.
21 Ago runidu'bai Yisika ro 'diyi koro aza kpate, ago ànya peyikala kpate driigye, ta'dota nda zi ävuruna te Sitena anjioko kyila. 22 Nda narute ni nasi, ago oyi 'di koro aza kpate. Se ana apekala kote driigye, ta'dota nda zi ävuruna te Robota anjioko Drîtai. Nda atate ekye: “Yauono OPI ozo drîtai te ämäri orine wari ono ya, ago militina ndi amba noŋwa.”
23 Yisika oyite ni nasi le Beraseba ya. 24 Ago ŋgäkyi gi ana si OPI loforute ndäri ago atate ekye: “Ma ni Lu se täpi miro Abarayama ro ono owo; nyuturi ko, tana ma orivoya tro mibe, ago mäṛuna mi ndi, ago ma'bana zelevoi miro ndi a'done nyalakpa ta tao'ba maro se ruindu'ba maro Abarayama be ana rota.” 25 Ago Yisika be vo tori oloro te lau; ago nda mätu OPI te, ago nda oto gawa ndaro te lau; ago ruindu'bai ndaro 'diyi koro aza te lau.
Tadriole Lakole Yisika ro Abimeleka be ya
26 'Dooko Abimeleka ikyite ni Gerara yasi, ndi tavo ata'ba ndaro Auzata ndi Pikola otaozo'ba kyila'bai ndaro ro yibe Yisika ondrene. 27 Ndi Yisika eji ànya te ekye: “Tana e'di nyìkyi ma se ya amiro osoro lomvoigye, ago mìnja be ni 'bädri amiro yasi ono ondrena niya?” 28 Ànya zayitadrite ekye: “Yauono màndrete ŋbelero anjioko OPI orivoya tro mibe, 'dooko màkye ni kado tao'baro ri a'done lakole amaro mibe ya. Mi'de mà'ba tao'baro ri yau mibe; 29 anjioko ko miri ŋgakozi aza oyene ämäri kpa oso màye ŋgakozi aza ko miri 'do ronye, oko màye mi te kadoro ago màzo mi te liyaro ago yauono OPI äṛu mite.” 30 Ndi Yisika ye karama te ànyari, ago ànya nyayi ŋgate ago mvuyi ŋga kpate. 31 Kyenoŋbo kinjo si ṛo kyenoŋboci oko, ànya 'bayi tao'baro te ba alo alo ruäṛu si. Ago Yisika ye mede te ànyari ndi ànya oyiyite liatokpero.
32 Ago kpa tu alona 'do si ruindu'bai Yisika ro ikyiyite peyi ta koro se ànya ku'diyibe ana rote ndäri, ago atayite ndäri ekye: “Musu gyi te.” 33 Ago nda zi ävuruna te Siba, anjioko Ruäṛu; tana ta'doro äzi ävuru 'bakici ana rote Beraseba le tu ondro ono si ono.
'Ditoko Esau ro se Atrai ro ana
34 Ondro ndroa Esau rote 'butesu oko, nda gye ndiriŋwà ritu Ete'bai rote Yudita ŋguti Beri ro ndi Basemata ŋguti Elona robe. 35 Ànya 'bayi ori Yisika ndi Rebeka be rote a'done tusuro amba.