Vodelero Kowai Awiro ro
1 Musuvo a'do lototi mbaraekye OPI rote, ago tori OPI ro ru mate ago 'ba mate vuru kitoriya vodelero se kowa orivoya twi gyini na drisi ana ya. 2 Nda lazi mate gbikyi vodelero ana yasi, ago mandre kowa ta amba vodelero ya ago a'dote awiro. 3 Nda atate märi ekye: “Ŋgwa lidri ro, inye'do kowa kwoi ogo adrina ndi ya?”
Mologotate makye: “Äye OPI Mbarapara, mini toto ni!”
4 Nda atate kpa to'di ekye: “Nyäŋgu ta kowa kwoi ri, ago nyata kowa awiro kwoi ri ata OPI ro erine. 5 Nyitita ànyari mikye ma, OPI Mbarapara ma ni ata ànyari makye: ‘Ma oye lawa ovone ami ya ago ma oye ogone ami o'bane lidriidriro. 6 Ma'bana kidro ndi izaro'bo be 'da ami lomvosi ago matakona drina 'da kyini si. Mavona lawa 'da ami ya ago nyadrina 'da. 'Dooko mìnina 'da anjioko ma ni OPI owo.’ ”
7 Ta'dota mäŋguta te oso OPI katabe märi ana ronye. Ondro mate ugu ata oko, meri kporo amo rote, ago kowa cini eto ruunjute voaloya. 8 Ondro madri ugu ondrena oko, mandre atako drî kowa cini rote kidro ndi izaro'bo be si ago atako drina te kyini si. Oko lawa a'dote i'do ànya ya.
9 Lu atate märi ekye: “Ŋgwa lidri ro, nyäŋgu ta lawa ri. Nyitita lawa ri mikye OPI Mbarapara ekye: ‘Nyikyi ni lamadri su cini yasi, ago mici lomvo se avo ro kwoi ya, tana anya kadri robe.’ ”
10 Ta'dota mapetate oso ata tana be märi ana ronye. Lawa cite lomvo se kai ya, ndi ànya adriyite ago ŋgayite kurusi. Ànya a'dote amba se unina ndi a'done kyila'bai ro.
11 Lu atate märi ekye: “Ŋgwa lidri ro, lidri cini Yisaraele ro labayi oso kowa se kai ronye. Ànya kayi ata ekye: ‘Kowai amaro te awiro ago ama te teinye mio'ba aza ako ago takaci ako.’ 12 Ta'dota nyäŋgu ta ago nyata lidri maro Yisaraele ro ri mikye ma, OPI Mbarapara ma oye 'budrii ànyaro tupine, ago ànya lofone tesi ago ma oye ànya logone kovole wari Yisaraele roya. 13 Ondro mäpi 'budrii se ase ànya be kigyesi iyi te, ago molofo ànya te tesi oko, ànya uninayi 'da anjioko ma ni OPI owo. 14 Mavona lawalawa maro 'da ànya ya, ago ànya adrinayi 'da, ago ma'bana ànya 'da orine wari modo ànyaro ya. 'Dooko ànya uninayi 'da anjioko ma OPI matani ago maye tana te.”
Yuda ndi Yisaraele be 'Bädri alo ro
15 OPI atate märi ekye: 16 “Ŋgwa lidri ro, miru dofo ce ro aza ago nyegyi ta kwoi lomvoigye mikye: ‘'Bädri Yuda ro ndi lidri na be.’ 'Dooko miru dofo aza ago nyegyi ta kwoi lomvoigye mikye: ‘'Bädri Yisaraele ro ndi lidri na be.’ 17 'Dooko nyodro'be dofo ritu iyi tana ànya kalandre robe dofo alodi ro drì miro ya. 18 Ondro lidri miro kejiyi mite takaci ta ono ro itine ànyari oko, 19 nyitita ànyari mikye: Ma, OPI Mbarapara makye ma oye dofo se Yisaraele ana urune dro'bene se Yuda ana be dofo alodi ro, tana ànya ka'do robe dofo alodi ro drì maro ya.
20 “Miru dofo se ritu nyegyi ta be lomvoigyesi iyi drì miro ya ago mi'ba lidri kondre ànya. 21 'Dooko nyata ànyari mikye ma, OPI Mbarapara, ma oye lidri Yisaraele ro urune ni tu'dei se ànya koyiyibe kigyesi iyi yasi, motona kala ànyaro 'da ni vo cini yasi, ago mologona ànya 'da wari modo ànyaro ya. 22 Modro'bena ànya 'da tu'de alodi ro wari ana ya, 'bereŋwai Yisaraele ro dri. 'Bädri'ba a'dona toto alodi ànya mirine, ago ànya uninayi kote a'done tu'dei ritu ro kode rulewene 'bädri ritu ro. 23 Ànya uninayi kote andivo ànyaro enjine tona lui edeedero si, kode ŋgase ya maro osoro lomvoigye iyi si kode takozi aza oye si. Mapana ànya 'da ni ŋgase cini ànya koyeyibe takoziro 'do yasi. Mäwäṛina ànya 'da; ànya a'donayi 'da lidri maro, ago ma'dona 'da Lu ànyaro. 24 'Bädri'ba ànyaro a'dona 'da oso ruindu'ba maro Dawidi ronye. Ànya cini a'donayi 'da 'dimiri'ba be alodi. Ago ànya oronayi ota maro 'da ago ätinayi 'da 'diriro. 25 Ànya orinayi 'da wari se zutui ànyaro koribe kigye ana ya, se mozobe ruindu'ba maro Yakoba ri ana, Ànya orinayi 'da lau ŋgàga ànyaro ndi zelevoi ànyaro be äduako. 'Bädri'ba se oso ruindu'ba maro Dawidi ronye ana mirina ànya 'da äduako. 26 Ma'bana tao'baro maro taliatokpero 'da ànya yibe ago a'dona 'da tao'baro äduako ro. Mäṛuna ànya 'da ago militina oti ànyaro 'da, ago ma'bana Yekalu maro 'da kitoriya ànyaro ya äduako. 27 Marina 'da ànya yibe lau; ma'dona 'da Lu ànyaro, ago ànya a'donayi 'da lidri maro. 28 Ondro ma'ba Yekalu maro te lau a'done ànya lako äduako oko, 'dooko tu'dei uninayi 'da anjioko ma, OPI, manji Yisaraele ni a'done lidri modo maro ro.”