Eŋga ago Odi To Mutuguṛi A'do Lototi OPI ro ro
1 OPI atate Musa ri ekye: 2 “U'du käti imba käti rosi oko, nyeŋga Mutuguṛi a'do lototi OPI ro ro kuru. 3 Mi'ba Sänduku Tao'baro se otà 'butealo be 'do kigye, ago miyi boŋgo mile na ya. 4 Nyoloci tara'biza kigye, ago mira lakazà driigye, nyezi ŋga lamba edrero, ago mi'ba lamba cini driigye. 5 Ago mi'ba vo tori oloro läguläguro ŋga tägyi ŋgutruro ozaro mile Sänduku Tao'baro roya, ago miyi boŋgo käläsi Mutuguṛi ro kala. 6 Mi'ba vo tori oloro ŋgapäṛi ozaro ro mile käläsi Mutuguṛi ro yasi, 7 ago mi'ba kagyi ŋgaojo ro lakole Mutuguṛi ro ndi vo tori oloro be ya, ago miso gyi kigye. 8 Nyedre goko kuru gbikyi lomvoigyesi, ago miyi boŋgo käläsi goko roya.
9 “'Dooko miru ido 'diäṛu ro, ago nyäṛu Mutuguṛi ndi ŋgase cini kigye iyi be, ago midi ànya to ndi lakazà na cini kigye iyi be, ka'do robe alokado. 10 Nyäṛu vo tori oloro ŋgapäṛi ozaro ro kpa ndi lakazà cini losina robe, ago midi vo tori oloro to; tana vo tori oloro ka'do robe cu alokado para ndra ro. 11 Nyäṛu kagyi ŋgaoja ro kpa ndi jope na be, ago midi to.
12 “'Dooko nyezi Arona ndi ŋgwàagoro ndaro be käläsi Mutuguṛi ro kala, ago mìja ànya gyi si, 13 miso boŋgo kohani ro Arona lomvo, nyäṛu nda ago midi nda to, tana nda kinduru robe märi kohani ro. 14 Nyezi ŋgwàagoro ndaro kpa ago miso boŋgo ànya cini lomvosi, 15 ago nyäṛu ànya oso nyäṛu täpi ànyaro be ronye, tana ànya kinduruyi robe märi kohanii ro; ànya äṛu locina ànya ni losi kohanii roya rriro le kovole'bai ànyaro ya.”
16 Musa ye ta cini te oso se OPI kata tana be ndäri oyene ronye. 17 U'du käti imba käti ndroa ṛiri ro se ànya ke'beyi Ezipeto be vosi oko eŋga Mutuguṛi a'do lototi OPI ro rote kuru. 18 Musa ra unjuvo na te ago eŋga joce na te kuru, ago lala loro caricari na te, ago eŋga ice caricari nate kuru, 19 ago nda lara boŋgo te Mutuguṛi dri, ago takote ändru boŋgo si, oso se OPI kata tana be ndäri ronye. 20 Nda ru kuniŋwà ritu kalakparo tao'baro be te nda 'bate Sänduku Tao'baro ya, ago so ice caricari rote Sänduku Tao'baro dri, ndi tako drina te, 21 ago nda 'ba Sänduku Tao'baro te Mutuguṛi ya, yi boŋgo oyioyiro te se gaga Sänduku Tao'baro te, oso se OPI kata tana be ndäri ronye.
22 Nda 'ba tara'biza te Mutuguṛi ya, ogone lamadri Mutuguṛi ro mä'dudrisi ya, boŋgo oyiro 'do kundusi. 23 Nda 'ba ambata alokado se ozobe OPI ri 'do te driigye; oso se OPI kata tana be ndäri ronye. 24 Ago nda 'ba ŋga lamba edrero te Mutuguṛi ya, miäwuäwuro tara'biza be ogone lamadri Mutuguṛi ro ŋgäṛiŋwadrisi yasi, 25 nda leru lamba te OPI kandra, oso se OPI kata tana be ndäri ronye. 26 Ago Musa 'ba vo tori oloro läguläguro te Mutuguṛi ya mile boŋgo oyioyiro roya, 27 ago za ŋga ŋgutruro te driigye, oso se OPI kata tana be ndäri ronye. 28 Nda yi boŋgo te käläsi Mutuguṛi ro kala. 29 Ago nda nju vo tori oloro ŋgapäṛi ozaro te käläsi Mutuguṛi ro kala ago nda za ŋgapäṛi ozaro ndi ŋgapäṛi inya robe te driigye; oso se OPI kata tana be ndäri ronye. 30 Nda 'ba kagyi ŋgaoja ro te lakole Mutuguṛi ro ndi vo tori oloro robe ya, ago so gyi te kigye ŋgaojaza. 31 Musa, Arona ndi ŋgwàagoro ndaro yibe jayi drì ànyaro ndi pai ànyaro be te sina, 32 ondro ànya kayite oci Mutuguṛi a'do lototi opi ro ya kode vo tori oloro ya, oko ànya jayi iyi te, oso se OPI kata tana be Musa ri ronye. 33 Ago Musa 'di goko te ŋgulu Mutuguṛi A'do lototi Opi ro ndi vo tori oloro be lomvosi, ago yi boŋgo oyioyiro te käläsi goko roya. Nda nde losi cini te.
'Dikolo Mutuguṛi A'do Lototi OPI ro ro dri
(Oti 9:15-23)34 'Dooko 'dikolo tako Mutuguṛi te, ago lägu ŋgaeyi a'do lototi OPI ro ro gate twi Mutuguṛi ya. 35 Musa ni kote ocine Mutuguṛi ya tana 'dikolo tako mutuguṛi te, ago lägu ŋgaeyi a'do lototi Opi roro gate twi Mutuguṛi ya. 36 Aba cini ànyaro ya ondro eŋga 'dikolo te kuru ni Mutuguṛi drisi, lidri Yisaraele ro etoyi oyigo mileya; 37 oko ondro eŋga 'dikolo kote kuru, 'dooko ànya niyi kote oyine mileya madale eŋgana 'dikolo lutu kuru. 38 Tana tu aba cini ànyaro rosi ànya kayi 'dikolo a'do lototi OPI ro ro ondre Mutuguṛi dri kitu si ago asi orivoya lekovoya driigye ŋgäkyi si.