Esetera ka 'Bädri'ba ndi Amana be uzi Karama onyane
1 U'du nina anyaro akpa rosi oko Esetera so boŋgo runduṛuro 'bädri'ba ro anyaro te ago oyi edrete ya yasi goko zo'desi miriro 'bädri'ba ro roya, se äwumibe zoya oriro be ana. 'Bädri'ba orivoya zo yasi ya rite giti ndaro 'bädri'ba ro dri, zamite ecivo zo'desi miriro ya driro; 2 ondro 'bädri'ba kondre toko 'bädri'ba ro Esetera te edrevoya tesi oko, ya ndaro lu anya te ago nda eŋga dofo läguläguro se nda kurube drì ndaro ya ana te Esetera ri. 'Dooko Esetera iswete ago do drî dofo rote. 3 Ago 'bädri'ba atate anyari ekye: “E'diyi ya toko 'bädri'ba ro Esetera? Taeji miro e'diya? Beṛo ndi ozone miri ka'do ca telesi miri 'bädri'ba maro ro ozone, ozona ndi miri.”
4 Esetera zatadrite ekye: “Ondro ka'do tana kusi mi 'bädri'ba gindi, male mi 'bädri'ba ndi Amana be a'done ondro ŋgwaazii maro ŋgäkyi ono si ŋgaonya se mala'dibe mi 'bädri'ba ri 'do onyane.”
5 'Dooko 'bädri'ba zo lazo te ekye: “Nyezi Amana ndrindri, tana màye tase Esetera kolebe ono robe.” 'Dooko 'bädri'ba ndi Amana be oyiyite ŋgaonya se Esetera kala'dibe ana onyane. 6 Ago ondro ànya kayite ugu vino umvu oko, 'bädri'ba eji Esetera te ekye: “Ŋgase milebe ni e'diya? Mozo na ndi miri. Taeji miro ta e'diro taya? Ka'do ca telesi miri 'bädri'ba maro ro mozona ndi miri.”
7 Esetera zatadrite ekye: “Ŋgase malebe ago taeji maro ni ono: 8 Ondro ka'do mi 'bädri'ba nya'do gindi yauni be märi ago mile gindi tase mabe ejina ago ŋgase malebe 'do ŋgana ozone oko, mi 'bädri'ba ndi Amana be nyikyi ondo ŋgaonya kinjo aza ma oyebe la'dine ämiri 'do onyane. 'Dooko tu 'do ya mitina tase malebe itine miri 'da oso mi 'bädri'ba nyata be ronye.”
Amana ka Taäyi Moredekai Ufune
9 Ago tu gi ana si Amana fote ni ŋgaonya voyasi riyäro ago yai'dwesi. Oko ondro nda kondre Moredekai te dereŋwa 'bädri'ba roya, ago ondro Moredekai ŋga kote ca ka'da taoro kpa kote ndäri oko, Amana a'dote kyilaro ndra nda be. 10 Caoko Amana rita andivo ndaro te ago oyite 'bäru, 'dooko nda zi bereazii ndaro ndi toko ndaro Zeresa be te rudro'bene anya be. 11 Amana ŋgyi drî te ago ka'da ŋgaamba liŋgyiliŋgyiro ndaro te ndi oti ŋgwàagoro ndaro robe, ndi eŋga se 'bädri'ba keŋga nda be 'desiro dri'bai azi dri ndi ruindu'bai 'bädri'ba robe dri ana be. 12 Amana ugu atate ekye: “Ta cini ko toto ni 'do oko toko 'bädri'ba ro Esetera eji 'diaza kote ikyine 'bädri'ba be ŋgaonya se anya kala'dibe ana onyane, oko toto ma ago go eji ama kpate ogo onyane ondo 'bädri'ba be. 13 Caoko tase cini kwoi ye takado aza ko'de märi, tana ma drigba gi Moredekai se Yuda ro ono ondrena dereŋwa 'bädri'ba ro kala.”
14 'Dooko toko ndaro Zeresa ndi bereazii cini ndaro be atayite ndäri ekye: “Miba eŋga ice kacaro ocana kpikpina 'butenjidrieri fonji(75) kuru. Ondo kyenoŋbo oko nyeji 'bädri'ba ayi Moredekai robe driigye; 'dooko minina ndi oyine 'bädri'ba be ŋgaonyane yai'dwesi.” Tase atabe ono tana si Amana te ago nda 'ba eŋga ice kacaro te kuru.