Ruonji ndi 'Diogye To'di be
1 “Ondro manoaza kogye toko aza gwo ago kovolesi oko go ga anya gozo, tana nda usu takozi aza te anya be. Ta'doro nda kegyi waraga 'dionjiro gwo anyari ago kozo gwo anya rigye, ago kusi anya gwo ni 'ba ndaro yasi, 2 'dooko ondro anya koyi kuru manoaza gwo ago ro, 3 ago ondro ago se kovolesi ana kole anya kpa kote, kegyi waraga 'dionjiro kpate anyari, ago kozote anya rigye, ago kusi anya kpa gwo ni 'ba ndaro yasi. Kode ondro ago anyaro se kovolesi 'do kodra gwo, 4 ta'doro kote ago anyaro se käti konji anya be ana ri ogone anya urune toko ro kpa to'di; anya enji yasi. Tana 'do a'dona ndi undiro ro OPI ri. Ko ämiri tase koziro para nonye ono oyene wari se OPI Lu amiro kabe ozona ämiri ono ya.
Ota Azaka
5 “Ondro ka'do manoaza kogye toko dri to'di ro, ko nda ozone kyila ya kyila'bai be kode nda o'bane losi aza oyene; be ndäri orine 'bäru dritairo ndroa alodi, tana nda ka'do robe 'bäru ago ko'ba toko ndaro robe yai'dwesi.
6 “Ko kuni kode kuniŋgwa inya uyiro urune vo ŋgase ozote 'do dri. Tana do anjioko nya adri 'dina 'do vo uruna.
7 “'Dise kabe Yisaraele'ba azi ndaro kuguna ago kabe o'bana iyeäṛi ro ndäri kode kabe nda ogye iyeäṛi ro parata dri 'do beṛo kugu na 'do ufune. Nyànana tase undiro nonye ono ni ami lako liti 'do yasi.
8 “Ondro ka'do nyà rueza ni adravo kyini ro ri, mì'ba mi amiro komba kado ämiri tase kohanii Lewe'bai ro kabe atana oyene ämiri 'do modona oyene ayani; be ämiri oyene oso se mata ànya be ronye. 9 Mìyi tase OPI Lu amiro koyebe Miriama ri liti ya efo amiro ni Ezipeto yasi ana tana.
10 “Ondro ka'do nyozo ŋga aza te tiko ro 'diaza ri, mici ko zo ndaro ya boŋgo nda ko'ba tana be ozone vona ro 'do urune; 11 oko nyedre tesi mi'ba nda modo kezi ŋgase nda koba tana be 'do ni miri. 12 Ondro ka'do nda ka'dote lemeri'ba yi, mi'ba boŋgo na 'do kori ko mibe ŋgäkyi raa; 13 be miri logone ndäri tandrolero, tana nda ku'du robe driigye. 'Dooko nda oyena aro'boya ndi miri, ago a'dona ndi takado ro miri Opi Lu miro kandra.
14 “Nyoco ruindu'ba se kabe losi oye päläti dri ago orivoya ati'ba ro lemeri be 'do ko, kode nda orivoya Yisaraele'ba azi yi kode 'diatra yi se kabe ori alo aza 'ba'desii amiro ya 'do. 15 Miri päläti ndaro losi se tuna 'do ro ozone ndäri teinye kitu ri ociako; (tana nda lemeri'ba yi ago mio'ba be parata ndaro parata 'do dri orizana sina.) ukyi nda liyi 'da OPI ri milomvo, ago a'dona ndi takozi ro miri.
16 “Ko uti'bai ufune ta takozi se ŋgwai koyebe 'do rota, ago ko ŋgwai ufune ta takozi se uti'bai koyebe rota; 'dialo ufune toto ta takozi se modo ndaro koyebe rota ayani.
17 “Beṛo ko ämiri atrai ndi kenvoi be odine ni taŋgye ànyaro drisi, ago miru boŋgo ävuzii ro ko vo yuŋgu ro ro. 18 Oko ämiri tana oyine anjioko nyà'dote iyeäṛi ro Ezipeto ya ago OPI Lu amiro pa ami te dritairo; 'do ni tase ma'debe ota ono ozone ämiri owo.
19 “Ondro ka'do mìṛi inya teni ämvu miro yasi ago se mìlobe 'do drina azana tana kujete ämvu ya, mìgo kote vona ya; 'do te e'bene 'diatra, kenvoi ndi ävuzii be ri; tana OPI Lu amiro käṛu ami robe losi se cini nyàbe oyena ya. 20 Ondro nyòtopi doŋgo ice ido ro amiro rote, kote ämiri ogone se ke'bebe gwoṛi yasi kai topine, 'do te 'diatra, kenvoi ndi ävuzii be ri. 21 Ondro ka'do nyòtopi doŋgo kono ro amiro te, kote ämiri ogone vole na topine kpa to'di, doŋgo kono ro se ke'bebe iyi ka'do teri 'diatrai, kenvoi ndi ävuzii be ri. 22 Oko ämiri tana oyine anjioko a'do se nyà'dobe iyeäṛi ro nyà'dote iyeäṛi ro Ezipeto ya; 'do ni tase ma'debe ota ono ozone ämiri owo.