Uzia 'Bädri'ba Yuda ro
(2 'Bädri'bai 14:21-222 15:1-7)1 Lidri cini Yuda ro njiyi ŋgwa Amazia ro Uzia, se ndroa na orivoya 'butealo fonjidrialo ana te 'bädri'ba ro vo täpi ndaro roya. 2 (Uzia go ru ago go be 'bakici Elota rote odra Amazia ro vosi.)
3 Uzia ka a'do 'bädri'ba ro oko ndroa ndaro te 'butealo fonjidrialo, ago nda mirivote ndroa 'butenji foritu Yerusalema ya. Ävuru endre ndaro ro ni Jekolia ni Yerusalema yasi. 4 Nda yete tase kusi OPI be ayani, oso täpi ndaro koyebe ronye. 5 Tuse Zekaria tavoata'ba ndaro mätu ro bedri lidriidriro ana si, nda indurute OPI ri 'diriro, ago Lu äṛu nda te.
6 Uzia oyite kyila oyene Felesete'bai be. Nda toga tiṛi 'bakici Gata, Tamenia, ndi Asedodo robe te riya vuru; ago be 'bakicii tiṛi si te Asedodo lomvo ago vo azaka Felesete'bai ro yasi. 7 Lu pa nda te ago 'ba nda te Felesete'bai, Arabii se koribe Gurabala ya, ndi Meuni'bai be opene ṛe. 8 Ago Amona'bai sayi ŋga te Uzia ri, nda a'dote mbara amba be ago liku ndaro larirute sate le Ezipeto ya.
9 Uzia tomba tiṛi ṛatararo Yerusalema rote tiṛiwiṛa obe si Dereŋwa Cukudri roya, Dereŋwa Vodelero roya ago vose tiṛi keŋgorube kigye ana ya. 10 Ago nda be tiṛiwiṛa ṛatararo kpate vocowa ya ago 'di karaṛi amba te, tana nda orivoya ti amba be lutu pa aŋgoyasi ago vo njanjalanjaro ya. Nda ozo agoago te lidri ri kono kyi'dine 'bädri luturo ya ago ämvu osone gyini kado yasi, tana nda lu ämvuoso tawi.
11 Nda a'dote kyila'bai be amba nja kyila oyene, egyi'bai Jiela ndi Maseya be egyiyi otina te ŋgalepe Anania ro zele, se ni alo aza otaozo'bai 'bädri'ba ro ro. 12 Dri'bai kyila'bai ànyaro ro cini orivoya kutu ritu kama njidrialo (2,600). 13 Kyila'bai se ànya zele orivoya kutu kama nätu fonjidrieri kama nji (307,500), se uninayi ndi kyila oyene mbara si, 'bädri'ba opane ni kyila'baazii ndaro ri. 14 Uzia lanji ŋga 'digagaro, äzu, tagyia logoro dri gagaro, boŋgo kyila ro, kusu, ätui, ndi kuni ovoro iba si be te kyila'bai cini ri. 15 Yerusalema ya ŋgaede'bai ndaro tauni'bai ro edeyi ŋga azaka te ätu u'boza ago kuni 'desi evoza ni tiṛiwiṛa ndi cukudri tiṛi 'bakici ro robe drisi. Liku ndaro larirute vo cini yasi, ago nda a'dote mbara be amba tana nda usu ŋgaopa teni Lu resi.
Eza Uzia te ta Driuŋgyi Ndaro rota
16 Oko ondro nda ka'dote mbara amba be oko, nda a'dote driuŋgyi be se 'ba nda te o'dene. Nda ro OPI, Lu ndaro kote, oci si Yekalu ya ŋga tägyi tagyiri ro ozane vo tori oloro ŋga tägyi tagyiriro ozaro dri. 17 Oko kohani Azaria ndi kohanii azaka njidriana se mbara be ago turiako kai be soyite 'bädri'ba vo 18 nda lagane. Ànya atayite ndäri ekye: “Uzia! Ko ni miri ŋga tägyi tagyiri ro ozane OPI ri. Oko kohanii zelevoi Arona ro se Zäṛute iyi ozana toto ni. Mifo ni vo alokado ono yasi, tana miye takozi te OPI Lu ri, ago minina kote a'done äṛu ndaro be tona.”
19 'Dooko Uzia orivoya edrevoya lau Yekalu ya vo tori oloro ŋga tägyi tagyiri ro ozaro lomvo nja lakaza ŋga ozaro be dri ndaro ya. Nda a'dote kyilaro kohanii kai be, 'dooko dori kari 'be nda te militi ya. 20 Azaria ndi kohanii azaka se kai be ndreyivote militi 'bädri'ba roya turi si, gbiriyi nda te ofone ni Yekalu yasi. Nda fote ndrindri tesi tana OPI eza nda te.
21 'Bädri'ba Uzia ri ori anjoko ndaro te undiro tana ni adravo kari ro ndaro ri. Nda go ci kote tona Yekalu ya, nda rite iṛe zo modo ndaro ya, lolite ni kama cini ndaro yasi, 'dooko Yotama ŋgwa ndaro a'dote wari'ba ro ago miri 'bädri te.
22 Nebi Yesaya ŋgwa Amoza ro egyi ŋgase cini azaka 'Bädri'ba Uzia koyebe tu ŋgamiri ro ndaro si tana te. 23 Uzia drate ago ase nda te gyini 'bädri'ba roya, tana ta adravo ndaro rota ase nda kote vo 'bädri'bai osero ya. Ŋgwa ndaro Yotama gorite 'bädri'ba ro vo ndaro ya.