1 Nyii kwɔro kwǝni Bɔɔlɔs kwɔlɔcca-ŋǝsi, kwir khaḏaam kǝthi Yǝcu Kwɔrɔstɔ, kwɔrnɔṯɔ-nyii ethoro kaavɔr. Lǝlliny-nǝ ethaari bǝshirǝ Inyjiilǝ wǝthi Allah, 2 wɔgittathɔŋw-yi kwuzǝttuk, ki-riŋla-la rǝthi liɽii luuŋwun, nǝ ki Yiṯaab-na Yirllinǝlɔ ter, 3 Inyjiil wa wǝni Tɔr tuuŋwun turuuthu ki-ṯɔvɔɔ-na ṯǝthi Ḏaawḏ ŋiɽaŋal-ŋi ŋǝthi aŋna. 4 Nɔŋworo Tɔr tǝthi Allah ŋɔma-ŋi ŋǝthi Ṯigɽim ṯǝthi ŋirllinǝlɔ ter, ṯidiiɽǝ-thi ṯuuŋwun ki-ŋiɽany-na ŋǝthi, Yǝcu Kwɔrɔstɔ kwir Kweeleny kwǝri. 5 Nǝr aavi ne@ma ŋundu-ŋgi, nǝ ŋaavɔr tok, ethi mɔlotto lizi lǝthi ǝzir tatap, ethi ǝmmini nǝ ethi enye naana, ŋiɽaŋali-ŋi ŋǝthi yiriny yuuŋwun. 6 Nǝṯǝ oro ŋaaŋa rogɽo-ri raalɔ lɔrnɔṯɔrsi ethoro lǝthi Yǝcu Kwɔrɔstɔ.
7 Ŋaaŋa kila tatap lǝṯisi Allah amɽi linaanɔ Rɔɔma, lǝnyjicǝrsi yiriny yǝni lirllinǝlɔ ter: nyii ŋgwa kwithiŋaca-ŋǝsi ne@ma nǝ ṯaaginna ṯinḏi naanɔ-gwɔ Allah wir Papa kwǝri nǝ Kweeleny kwǝni Yǝcu Kwɔrɔstɔ.
Sɔɔrɔm kwǝthi Bɔɔlɔs etheele ethi raaŋitha Rɔɔma-ŋwɔ.
8 Nyii kwǝccǝ Allah wiinyi shukran ker-kerreny Yǝcu Kwɔrɔstɔ-ŋgi ŋiɽaŋal-ŋi ŋǝni ŋaaŋa tatap kaka mǝgwɔ ṯurmun tatap neŋne ŋiɽaŋali ŋǝthi ṯǝmminǝ ṯaalɔ. 9 Allah wir shuhuuḏ kwiinyi wa wǝṯi-nyii ǝkkici ŋothɽor ṯigɽim-thi ṯiinyi ṯǝbshiir-thi ṯǝthi Inyjiil wǝṯhi Tɔr tuuŋwun. Nyii kwiti kwǝṯi kiirathi mac ethi ɔrti ŋaaŋwɔsi kworo nyaamin tatap ki-thaara-na ṯiinyi kiyiiriny. 10 Ǝṯiny-gwɔ ɔṯalɔ kithaara-na kiyiiriny mindaŋ mǝroro ŋǝthi ṯɔgwor ṯǝthi Allah nyii-ŋgi ethiila naani-ŋa-gwɔ. 11 Kaka nǝthiny-gwɔ sɔɔrɔma beṯṯen etheese ŋaaŋwɔsi, mindaŋ mǝŋǝsi inḏǝthǝ haḏaaya wokwo wǝthi Ṯigɽim Ṯirllinǝlɔ ter, mindaŋ ethi firllasi ŋaaŋwɔ-sila. 12 Ŋǝniŋw, ethi firllathisila ṯǝmminǝ-thi wɔɽe-wɔɽeny, kitha taalɔ nǝ ṯiinyi tok. 13 Nyii kwɔnaŋna-ŋǝsi liyǝŋgǝri ethisi elŋe ŋǝniŋw, nyii kwǝṯi naŋni dok-dok ethiila naaniŋa-gwɔ, laakin ǝṯi-nyii ǝni kwumthinǝ ethiila, mindaŋ ethisi ǝginǝ lokwo daŋgal-na, kaka-ṯǝ nǝginǝ-nyji-gwɔ lokwo lǝthi Umam tok. 14 Nyii kwǝthi kǝmzu Yuunaaniiyyiin-yi nǝ baraabara tok, nǝ ki-lizi lǝthi yǝnǝ nǝ lir yǝɽiyǝŋ domony tok. 15 Ŋwɔṯaŋw nǝnyii naŋni beṯṯen tok ethi ǝccǝ ŋaaŋwɔsi bǝshirǝ Inyjiilǝ ŋaaŋa kila linaanɔ Rɔɔma.
Ŋɔma ŋǝthi Inyjiil.
16 Ṯɔrɔny ṯiti ṯǝṯi-nyii yee-na mac ṯǝni Inyjiil; wir ŋɔma ŋǝthi Allah ŋǝthi ŋiglǝthǝ ŋǝthi kila tatap lǝthi ṯǝmminǝ, ki Yahuuḏ kerreny nǝ Yuunaaniiyyiin tok. 17 Duŋgwun-ŋgi nǝ ŋirllalɔ ŋǝthi Allah ruwǝnnǝlɔ ethoro ŋǝthi ṯǝmminǝ ṯir min-min kaka nɔlɔɔthɔnar-gwɔ ŋaarɔŋw, “Kwirllalɔ kwǝṯ miithi ṯǝmminǝ-thi.”
Ŋirŋasa ŋǝthi Allah.
18 Kaka nǝṯi-gwɔ ŋirŋasa ŋǝthi Allah ruuthǝ ki-leere-na ǝṯir rɔɔthatha lizi naana ṯuwǝn kila lǝṯoro ḏiḏ Allah, nǝ ŋikiyaŋi naana tok ŋǝthi lizi kila lǝṯisi kwuɽubǝthǝlɔ ŋa ŋir rerrem ŋikiya-ŋi ŋeeŋen. 19 Nǝ kaka ŋa ŋǝŋgirsi ǝthici ŋɔma-na ethisi elŋe ŋǝni Allah, nǝsi Allah ruwǝzǝlɔ por-por, kaka nibaaŋicasi-gwɔ Allah-lɔ por-por. 20 Kinaŋw tuk nigittina-gwɔ ṯurmun-lɔ kwon-kwon, nǝ ŋa ŋǝni ŋuuŋun ŋiti ŋǝṯi iijini mac, ŋir ŋɔma ŋuuŋun ŋǝṯi nannatha dok-dok, nǝ ŋɔrɔŋ-ŋi Allah tok nǝr iijinǝlɔ por-por kwomne-na ŋgwɔ kwɔgittina. Ŋwɔṯaŋw nǝreere ǝthi lɔɽɔjɔ leere mac lǝthi-li ŋgwa kǝɽinnǝthǝ 21 Nilŋithir-vǝ kinnǝni Allah tok, nǝrteere iiɽinǝ ḏuṯ ethi Allah-ŋaŋgi, ya ethi ǝccǝ ŋunduŋw shukran, laakin nǝ fikir kweeŋen ere ǝthi faayitha kweere mac, nǝ ŋaɽiny ŋeeŋen ere ǝthi faayitha tok mac, nǝr urǝnni kirim-nǝ deddep. 22 Ǝṯir ruusi rogɽo reeŋen lizi lǝthi yǝnǝ, laakin nǝroro yǝɽiyǝŋ, 23 nǝr uppi ŋinithi-nǝ ŋǝthi Allah wǝṯi nannatha dok-dok suurǝ-gi kwaaɽinna kwizigwunǝŋi kwaṯi ernene, ya ndǝwǝ ya haywaan, ya ŋgwa kwǝṯeele yaari-yalɔ tok.
24 Ŋwɔṯaŋw nǝsi Allah aalatha rii kadɔwa-na kǝthi rɔgwor reeŋen, nǝ ki-ŋiɽigin-nǝ ethi-ŋi ǝwɽi yaŋna yeeŋen yǝy deŋgen-na wɔɽe-wɔɽeny. 25 Kaka mǝrsi-gwɔ uppunǝ ŋir rerrem ŋǝni Allah nǝluŋw-ŋi, mindaŋ nǝr kwoccelɔ ŋgwa kwɔgitta Allah, na nǝr ǝkkici ŋothɽor tok ki-lɔɔbi lǝthi ŋgwa kwɔgitta ṯurmunǝ, ŋgwa kwǝṯi ɔrtanni dok-dok. Amiin.
26 Ŋwɔṯaŋw nǝsi Allah aalatha rii kadɔwa-na kigii-na ṯiga-ṯiga. Nǝsi laaw leeŋen uppunǝ ŋǝthi ŋaaw, nǝrsi ǝrri ŋiti ŋir ŋǝthi ŋaaw mac. 27 Nǝ lɔr tok, nǝrsi duŋgwǝci ŋa ŋǝthisi ǝrrici layɔ, mindaŋ nǝr dunnuni naana kadɔwa-gi deŋgen-na. Ǝṯisi lɔr ǝrri ŋir @eeb-na tubuɽ-tubuɽ, mindaŋ nǝr aavi jiizǝ kwɔvthannicasi kwǝthi ŋikiya ŋeeŋen.
28 Nǝ ṯǝŋw nidirnar-gwɔ ethi elŋe Allah, nǝsi Allah aalatha rii ethi nannatha ki-ŋaɽiny-na ŋeeŋen ŋigii, ethisi mɔmlotto ethisi ǝrri ŋir @eeb. 29 Nǝr-ŋi urǝnni-nǝ deddep ŋa tatap ŋir ŋikiya ŋirna ter-ter; ŋisǝrmuuṯ, ŋikiya, ṯimiidatha, ŋudur, na nǝr-ŋi urǝnni-nǝ deddep kee-ŋgi ŋiɽany, dimmi, ŋaasim, ṯikǝɽinyjǝlɔ, nǝ lir ṯɔŋwɔn ṯarr, 30 lǝṯi kikkiyathina ethi wǝthisinǝ, lir ṯuwǝn ṯǝthi Allah, lǝṯi ɔllɔthi, lǝṯi piŋi rogɽo reeŋen, ǝṯir ṯoo ŋikiyaŋi, ǝṯireere iinyici rǝrnyin-ŋwɔsi naana mac, 31 lir yǝɽiyǝŋ, liira ṯǝmminǝ, wala ethǝthi timɽiyǝ tokwo kaamin-gi. 32 Nǝ nilŋithir-sivǝ kinnǝni tok ki Sherii@a-nǝ kwǝthi Allah kwaarɔŋw, kila lǝṯisi ǝrri ŋir kaka-ṯǝ ŋɔ lɔvthannica ŋiɽany. Ǝṯir-seere ǝrri ŋɔ dak mac, laakin ǝṯir-li aamina kila lǝṯisi ǝrri-ri.