Yǝcu mɔŋgwɔ ǝrmici mɔ@allimiina kwǝthi Sherii@a ŋundu-ŋǝ Lifirriisiiyyiin-ŋǝli.
(Mɔrgus 12:38-39Luuga 11:43-46Luuga 20:45-46)1 E-ta nǝ Yǝcu andaci ŋwɔdɔŋwɔsi ṯalaamiiz-thi ṯuuŋwun, nɔŋwsǝccǝŋw, 2 “Mɔ@allimiin kwǝthi Sherii@a-ŋǝ Lifirriisiiyyiin-li lǝmminicǝrsi ethi uppupi Sherii@a-na kwǝthi Muusǝ, 3 ŋwɔṯaŋw laazim ǝsi iinyici ŋa naana tatap ŋǝṯir-ŋǝsi andaci ethisi ǝrri; laakin eseere ṯǝccini ŋothɽor-ŋi ŋeeŋen mac, kaka ǝṯirsi-gwɔ ere ǝrri ŋa ŋǝṯir-ŋi aari bǝshirǝ mac. 4 Ǝṯir kǝkkici lizi lithaathɔ ṯɔɔvi ṯinii diddip ki-rɔɔɽɔ-la reeŋen ṯiti ṯǝthi ŋɔma ethi ǝppini mac, laakin nǝreere ǝmmini mac ethisi ṯiŋacci ṯii ethisi mǝcci ki-ṯɔɔvi-na kitha ṯappar. 5 Ǝṯir ǝrri kwomne tatap por-por ethisi lizi ese. Iisar-ṯi ǝṯir daɽimatha yiṯǝmi yeeŋen daɽam-daɽam. Nǝ yebɽǝŋi yǝṯi illǝṯhǝlɔ ki-yireth yeeŋen ǝṯirsi uli tottoc. 6 Ǝṯir amɽi ǝzir wisaaw-wisaaw wǝthi-gwɔ naanalɔ ki-yǝzuumǝ-nǝ, ǝṯir kwurbunni lɔrsiya-lɔ ki-limajma@-na tok; 7 ǝṯir amɽi ethisi lizi akikanni ṯiiɽǝthi-nǝ ki-lisuug-nǝ. Nǝ ethisi lizi ǝccǝŋw, ‘Yaa mɔ@allim’. 8 Ǝṯeere ǝmmini mac ethi ǝccǝ ŋaaŋwɔsi-ŋw, ‘Mɔ@allim’ kaka nɔrŋa-gwɔ ŋiyaŋga tatap nǝ nǝthi Mɔ@allima kwɔtɔpɔt dak. 9 Ǝṯeere ǝccǝ kweere ‘Ṯǝrnyǝri’ mac kɔnɔŋw kwurǝyu-lu, kaka nǝthiŋǝ-gwɔ Ṯarnyalɔ ṯɔtɔpɔt ṯǝṯi naani ki-leere-na. 10 Ǝṯeere ǝmmini ethǝccǝ ŋaaŋwɔsiŋw, ‘Yaa Sǝyyiḏ’ mac, kaka nǝthiŋǝ-gwɔ Sǝyyiḏǝ kwɔtɔpɔt kwundǝr-ṯǝ kwǝni Kwɔrɔstɔ. 11 Ŋgwa kwuthǝmthi-ŋǝsi-lǝ daŋgal-na laazim ŋworo khaḏaam kaalɔ. 12 Mɔŋw ǝllini kweere ki-rogɽo, ǝri aaɽisalɔ rɔbbok, nǝ mɔŋw ǝjlinni kweere ki-rogɽo ǝri piŋi.
Yǝcu mɔŋgwɔ kette lizi kaṯṯi kila lǝṯi kǝɽinyjinǝ-lɔ.
(Mɔrgus 12:40Luuga 11:39-42, Luuga 44, Luuga 52Luuga 20:47)13 “Ǝnnǝ ṯurvǝ ṯaalɔ ŋaaŋa lir mɔ@allimiin kwǝthi Sherii@a-ŋǝ Lifirriisiiyyiin-li, ŋaaŋa lirmba likǝɽinyjinǝlɔ! Ŋaaŋa lǝṯi lǝŋthǝci lizi ǝgwur wǝthi Ŋeeleny ŋǝthi ki-leere-naŋw kiyǝnǝ yeeŋen, laakin ŋaaŋa rogɽo-ri raalɔ tǝ ǝṯeere naŋni ethǝnḏi tok mac, wala ethisi ǝmminici kila linaŋna ethǝnḏi.
[ 14 “Ǝnnǝ kwǝthi ṯurvǝ ṯaalɔ ŋaaŋa lir mɔ@allimiin kwǝthi Sherii@a-ŋǝ Lifirriisiiyyiin-li, ŋaaŋa lirmba likǝɽinyjinǝlɔ! Ŋaaŋa lǝṯi yatha leethela lir laaw kwomne tatap kwǝthir, ǝṯisi ɔrnatha yiŋna yeeŋen, mindaŋ ǝṯaami aari kiyiiriny lǝlu-ttuk bǝy-bǝyin! Ŋwɔṯaŋw a likaṯṯasi hɔkwɔma rac wir nyoro-nyoro!]
15 “Ǝnnǝ kwǝthi ṯurvǝ ṯaalɔ ŋaaŋa lir mɔ@allimiin kwǝthi Sherii@a-ŋǝ Lifirriisiiyyiin-li! Ŋaaŋa lirmba lǝṯi arri-ri saafira ki-bahar-na nǝ ǝzir naana tatap ethi ǝginǝ kwette etheele ki-thaay-la ṯaalɔ; mindaŋ mǝ ǝginǝ rac tǝ, e-ta ǝṯaaṯi ǝṯi ruusi kwɔvthanna nyaamin-na nyiɽǝn etheele ki-jahannam-nǝ kaka ŋaaŋwɔsi!
16 “Ǝnnǝ kwǝthi ṯurvǝ ṯaalɔ ŋaaŋa lir ŋwɔɽa ŋwir lunduŋw, ŋaaŋa lǝṯi aari @allima, ǝṯi aarɔŋw, ‘Mǝ kweere aari haalifa Heikal-yi, ŋweere kǝkkini haliifa-yi mac; laakin mɔŋw aari haalifa ḏahab-thi ṯinaanɔ ki-Heikal-na ǝṯɔŋw-yi kǝkkini’. 17 Ŋaaŋa lirmba lir lunduŋw lir yǝɽiyǝŋ! Aatha kwɔrɔ kwir mɔhim, ḏahab ṯirii alla Heikal wǝṯi rilli ḏahabalɔ ter? 18 Nǝ ǝṯisi ǝccǝ @allima tok ǝtisǝccǝŋw, ‘Mǝ kweere aari haalifa ŋwɔthgwun-ŋi, ǝṯɔŋweere kǝkkini haliifa-yi wuuŋwun mac; laakin mɔŋwaari haalifa kwomne-gi ŋgwa kwɔdǝnnǝr ki-ŋwɔthgwun-lǝ, ǝṯɔŋw-ŋgi kǝkkini!’ 19 Ŋaaŋa lirmba lir lunduŋw! Aatha kwɔrɔ kwir mɔhim, kwomne-ŋgwa kwudunnunǝy alla ŋwɔthgwun ŋwɔṯi rilli kwomnelǝ ter ŋgwa kwudunnunǝ? 20 Ŋwɔṯaŋw, mɔŋw aari kweere haalifa ŋwɔthgwun-ŋi, ŋwɔni kwaari haalifa ŋwɔthgwun-ŋi nǝ kwomne-gi tatap kwɔnaanɔ-gwɔ-la kwudunnunǝ. 21 Nǝ mɔŋw aari haalifa Heikal-yi, nɔŋwɔni kwaari-yi haalifa nǝ Allah tok wǝṯi-gwɔ nanni-na; 22 nǝ mɔŋw aari kweere haalifa leere-li, nɔŋwɔni kwaari haalifa kwɔrsi-gi kwǝthi Allah, nǝ Allah-yi tok wǝṯi-gwɔ naani-la.
23 “Ǝnnǝ kwǝthi ṯurvǝ ṯaalɔ ŋaaŋa lir mɔ@llimiin kwǝthi Sherii@a-ŋǝ Lifirriisiiyyiin-li! Ŋaaŋa likǝɽinyjinǝṯǝ kɔlɔ! Ŋaaŋa lǝṯi inḏǝthǝ Allah @ɔshɔra wir kǝny, kir na@-na@-ŋa kwuzbǝrǝ-gi nǝ kamuun tok, laakin nǝsi ere kettice yǝy ŋa mac ŋir rerrec ethi iinyici ṯa@liima naana ṯǝthi Sherii@a, ŋirllalɔ, ŋimɽi nǝ ṯǝmminǝ, ŋindǝr-ṯǝ ŋɔ ŋir laazim ŋǝthisi ǝrri, nǝ ethiŋeere ṯɔɔthina mac. 24 Ŋaaŋa lir lunduŋw lir ŋwɔɽa! Ŋaaŋa lǝṯi ṯiɽeny tawaŋi-na kwomne-na ŋgwa kwǝṯii, laakin ǝṯi demne kamlaŋi nda tugwrǝ!
25 “Ǝnnǝ kwǝthi ṯurvǝ ṯaalɔ ŋaaŋa lir mɔ@allimiin kwǝthi Sherii@a-ŋǝ Lifirriisiiyyiin-li! Ŋaaŋa lirmba likǝɽinyjinǝlɔ! Ŋaaŋa lǝṯi suuɽi kwɔbaaya-ŋwɔsi-na sohan-gi parŋgala, laakin ininyǝnǝ-ŋgi tǝ ǝṯir urǝnni kwomne-na deddep ŋgwa kwǝṯi aava ŋaaŋa ŋurṯǝthǝ-ŋi, nǝ ṯigiirɔ tok. 26 Ŋa kwir kwɔfirriisii kwir kwunduŋ! Ǝṯi suuɽi kwubaaya-na ker-kerreny, e-ta ŋwɔtǝ suuɽunni ṯɔɔṯɔthala tok!
27 “Ǝnnǝ kwǝthi ṯurvǝ ṯaalɔ ŋaaŋa lir mɔ@allimiin kwǝthi Sherii@a-ŋǝ Lifirriisiiyyiin-li! Ŋaaŋa lirmba likǝɽinyjinǝlɔ! Ŋaaŋa lir kaka rimaamɔ rifiithɔ, rǝṯi iijini parŋgala riccaaw, laakin iininy-ŋgǝnǝ-tǝ ǝṯir urǝnni ŋwiyaŋ-na deddep kwomne-gina kwinyiiṯu. 28 Nǝrṯoroŋw, ŋaaŋa tok ǝṯi saawi parŋgala kiyǝnǝ yǝthi lizi tatap, laakin ki-rɔgwor-na raalɔ tǝ, nuurǝnni ṯikǝɽinyjinǝlɔ-ŋwɔsi-nǝ deddep ŋikiya-ŋi.
Yǝcu nandisa-ŋgwɔ ŋiɽaŋali ŋǝthi jiizǝ kweeŋen ŋiɽiiya-ŋi.
(Luuga 11:47-51)29 “Ǝnnǝ kwǝthi ṯurvǝ ṯaalɔ ŋaaŋa lir mɔ@allimiin kwǝthi Sherii@a-ŋǝ Lifirriisiiyyiin-li! Ŋaaŋa likǝɽinyjinǝlɔ kɔlɔ! Ŋaaŋa lǝṯi acci rimaamɔwa rǝthi liɽii ŋisanna-ŋisanna, nǝ rǝthi kila lirllalɔ ǝṯisi daɽimatha naana daṯam-daṯam. 30 Ǝṯaarɔŋw ǝŋgi-nyii naani kithlǝ tuk lugwurnǝ-li lǝri ǝŋginy-leere ɔɽɔmaṯṯi mac ethi endinye liɽiiya. 31 A limǝ ǝmmini ethaarɔŋw nyiiŋǝ lir nyɔr nyǝthi lugwurnǝ kila lindinyiṯi liɽiiya. 32 Ǝɽir kǝniny iilatha keereny-gi ethisi ṯimmasi kworo ŋa ŋaari-ŋi lugwurnǝ laalɔ ibṯǝḏi ethisi ǝrri! 33 Ŋaaŋa lir yimǝw, noro nyɔr nyǝthi yimǝw! A ligittathɔ ethi kilatha hɔkwɔma wǝthi jahannam aŋgwɔrɔ. 34 Nǝ sǝbǝb-gi ṯǝ ŋgwɔ ŋǝsi usicǝ liɽiiya nǝ kila lǝthi yǝnǝ nǝ mɔ@allimiin tok; ǝsi ɽeenye lokwo, ǝsi ṯigrǝthǝ lithaathɔ ki-ŋwuuɽi-lǝ ŋwɔṯɔmɔthalɔ, nǝ lithaathɔ ǝsi ippipi ki-limajma@-na ǝsi urtutǝlɔ min mǝḏiinǝ limǝḏiinǝ. 35 Ŋwɔṯaŋw a jiizǝ kwǝthi lizi kila lɔsɔɔɽɔ liɽinyithirsi, ŋwɔ iidi daŋgal-la, min ki-ŋiɽany ŋǝthi Haabiil kwɔsɔɔɽɔ mindaŋ nǝ ŋiɽany iila ŋǝthi zakkariiyyǝ kwɔsɔɔɽɔ tok, ŋgwa kwiɽinyithi-ŋǝ kelgeny-na kǝthi Heikal-ŋǝ ŋwɔthgwun-ŋi. 36 Nyii kwɔŋǝsi andaci rerrem! Jiizǝ kwǝthi lizi kɔlɔ tatap liɽinyithirsi, kwiidi ki-lizi-lǝ lǝthi lɔɔmɔr kɔlɔ.
Ṯamɽa ṯǝthi Yǝcu ṯǝni Urshaliim.
(Luuga 13:34-35)37 “Athrɔ Urshaliim, athrɔ Urshaliim! A kwǝṯi endindinye liɽiiya, nǝ ǝṯi accatha yaavɔra-lɔ yall-yi kiya yuusicǝ-ŋǝsi Allah! Nyaamin nyuuru ǝṯiny naŋni ethaaṯasi lizi lɔɔŋwa dɔŋw naaniny-gwɔ, kaka nǝṯi-gwɔ kagrɔ aaṯasi nyagwrɔŋi dɔŋw kiyivɔɔ-na yuuŋwun, laakin ǝṯir-nyeere ǝmminici mac. 38 Ṯaŋw a Heikal waalɔ arṯinna-lɔ mindaŋ ŋwɔ naani domony. 39 Nyii kwɔŋǝsi andaci, ŋaaŋa liti linyeese kwokwony mac mindaŋ maarɔŋw, ‘Ethi Allah ɔrtatha ŋgwa kwinḏi yiriny-yi yǝthi Kweeleny’.”