Ǝṯi aŋraci kandisa.
1 Liyǝŋgǝri liinyi, ǝṯi rɔɔthɔ mɔ@allimiin kwuuru mac. Kaka nilŋithiŋǝ-gwɔ rac, inḏir-gwɔ eṯhi ǝccǝ nyuŋwsi haakima hɔkwɔm-yi wǝfirlli beṯṯen ethi lithaathɔ-la. 2 Kaka nǝṯirsi-gwɔ ṯǝ akkɔkɔ tatap pir-pir. Laakin mǝsi kwizi kweere ere akkɔ ŋeere pir mac kandisa-gi kǝṯɔŋw andasi tǝ, nɔŋworo kwette kwir min-min, nǝ kwǝthi ŋɔma tok ethoro kweeleny kwǝthi aŋna wuuŋwun tatap. 3 A kwǝṯir-pǝ ǝnyjici limɔrṯa ŋwɔjami kworo-na kweeŋen ethi iinyici nyuŋwsi naana, mindaŋ ǝṯirsi iili ǝzir-yi wette nyithak wǝṯir-gwɔ iilatha. 4 Iisar-ṯi limɔrkǝbǝ lɔppak, mindaŋ ǝṯisi kɔrɔn kifirlli tetter iili, nǝ ǝṯirsi iili ḏorgɔson-thi ṯokwɔɽoc, na ǝṯi sawaag kwǝthi mɔrkǝb iili ǝzir-yi wette nyithak wɔnaŋnaŋw-yi ethiilatha. 5 Nǝrṯoroŋw tok ŋǝthi ṯiŋla ṯokwɔɽoc, laakin ǝṯɔŋw ǝthi ŋɔma ethi ǝllini ŋiɽaŋal-ŋi ŋɔppa-ŋɔppa. Aarir-ŋi ṯi fǝkirǝ ŋǝthi wuthǝr wǝthi yaaɽi wǝṯi lɔvrɔ lokwɔɽoc kette kǝmruŋǝ kɔppa!
6 Ŋwɔṯaŋw ṯiŋla tok ṯir kaka iigǝ. Nɔŋworo kaka ṯurmun ṯuurǝnnǝ ŋikiyaŋi-na, ṯinaanɔ ki a@ḏo-na wǝthi yaŋna yǝri, mindaŋ ǝṯɔŋw ruuŋwi yaŋna tatap. Ṯǝṯi kette kǝmɽuŋǝ iigǝ-yi ki-ṯobii@a-na tatap ṯǝthi lizigwunǝŋ wa wuruuthu ki-jihannam-nǝ. 7 Kwizigwunǝŋ kwǝthi ŋɔma ethi iiɽǝzi haywaanaatha wǝthi wuthǝr, wir kaka ndǝwǝ-ŋwɔsi kwomne-gi kwǝṯi nyaŋralɔ, nǝ lɔm tok, mindaŋ nɔŋwsi iiɽǝzi, 8 laakin nǝ kwizigwunǝŋ ere kweere mac kwǝthi ŋɔma eṯhi iiɽǝzi ṯiŋla. Ṯiŋla ṯir ŋikiya ṯiti ṯǝṯi kǝkkini mac, ṯǝṯi urǝnni ŋiya-na deddep. 9 Ǝṯir-ṯhi ɔrtatha Kweelenyi nǝ Papa-ŋw, nǝ ǝṯir-thi ollollo lizi tok, kila ligittina ki-suurǝ kwǝthi Allah. 10 Ǝṯi ṯɔrtatha-ŋa yɔvɔɔlɔ-yi ruuthǝ tok kworo-na kwɔtɔpɔt. Liyǝŋgǝri liinyi, ŋiti ŋir mǝmkin ḏuṯ ethǝrrini ŋɔrtɔtɔŋw! 11 Lɔrony lɔtɔpɔt lǝṯi ruwǝ ŋaaw ŋaami nǝ ŋiɽii tok ki-lɔrony-na ṯǝ kila lette-lette-a? 12 Liyǝŋgǝri liinyi, kwɔɔtha kwǝthi ŋɔma ethi riiɽi @ineba, wala ethi kǝrǝm ǝthi ŋɔma ethi riiɽi ŋwɔɔtha? Bǝri! Wala ethi lɔrony lɔrja ŋaaw ethǝthi ŋɔma ethi irṯǝzǝ ŋaaw ŋaami.
Ṯǝthinǝ yǝnǝ ṯisaaw ṯǝthi kindala-ŋw.
13 Ǝyǝ kwɔrɔ kweere daŋgal-na kwǝthi yǝnǝ, nǝ kwilŋiṯṯi ŋiɽaŋal-na? Ethiŋwsi ruwǝzǝlɔ ŋimiitha-ŋi ŋisaaw ŋǝthi ŋothɽor ŋuuŋun, ṯǝjlinnǝ-thi nǝ ṯǝthinǝ-thi yǝna tok. 14 Laakin mǝ ǝthi ṯigiiya ŋiɽany ki-rɔgwor-na raalɔ, nǝ ṯamɽa ṯǝthi rogɽo tok, eṯeere piŋi rogɽo mac, mindaŋ ethisi ere andisasa naana ŋa ŋir rerrem mac. 15 Nǝ ṯǝthinǝ yǝnǝ ṯɔrtɔtɔŋw, ṯiti ṯɔɔɽɔ kindala-ŋgi mac, laakin nɔŋworo ṯǝthi kwurǝyulu-ŋw, nɔŋweere oro ṯǝthi Allah mac, laakin nɔŋworo ṯǝthi Shiiṯaan. 16 Kǝzir wǝṯi-gwɔ kee ŋiɽany ŋa ṯamɽa-thi ṯǝthi rogɽo naani, ǝṯi niizaam kwigii naani, nǝ ǝṯir naani ŋigii ŋirna ter-ter. 17 Ker-kerreny nǝ ṯǝthinǝ yǝnǝ ṯǝthi kindala-ŋw sɔɔɽi cɔr-cɔɽic, nɔŋwiiɽǝnni, ǝṯɔŋw thee jiɽeem, ǝṯɔŋworo ŋɔmath-ŋɔmath, ǝṯɔŋw urǝnni ŋimɽiyǝ-nǝ deddep nyɔr-nyi nyisaaw, ǝṯɔŋweere ǝthi ṯɔṯɔthisa-na mac 18 Nǝ ŋirllalɔ oro ṯɔɔnɔ ṯǝthi ŋwɔɔla ŋwa ŋwɔgwɔɔthɔna ŋiiɽǝnnǝ-ŋi ki-lizi kila lǝṯi kwee ŋiiɽǝnnǝ.