Ṯidiiɽǝ ṯǝthi Yǝcu ki-ŋiɽany-na.
(Mɔrgus 16:1-10Luuga 24:1-12Yuhanna 20:1-10)1 Mǝ Sǝbiṯ tamthɔ, na mǝ ŋɔrpɔ-ŋgwa iila kwǝthi Lahad ŋɔrpana tuttuk nɔ Mǝryǝm Majḏaliiyyǝ-ŋɔ Mǝryǝm-gi kwɔthaathɔ ele ethi iisa ṯimaamɔwa. 2 Nǝ ṯǝŋw biḏaan nǝ wurǝyu riiginni tɔc; nǝ meleka kwǝthi Kweeleny dappitha-lɔ ki-leere-na, nɔŋw ṯǝrṯiɽi kiɽibini kithaay mindaŋ nɔŋw-ŋgwɔ naani-la. 3 Nɔŋw aaɽanni fɔɔri kwǝthi ṯimen, nɔ yireth yuuŋwun fiithi per-per. 4 Nǝ hɔrraas ṯeenye ṯeṯṯec nǝr ɔnḏɔthi nǝroro kaka lizi laayɔ. 5 Nǝ meleka andaci layɔ nɔŋwsaccǝŋw, “Hṯi ṯiinya mac, nyii kwilŋithi rac ethaarɔŋw ŋaaŋa linaŋna Yǝcu-ŋwɔ kwuthigrǝthir ki-ŋwuuɽi-lǝ, 6 kwiti kɔnɔŋw mac, kwɔmǝ diiɽi kaka nandisa-ŋgwɔ. Ilari-mba ese ǝzir winḏiri-ŋgwɔ-lɔ. 7 Nḏir kire-kirem-ŋgwɔ fittak, a andica ṯalaamiiza ṯuuŋwun ǝsi ǝccǝŋw, ‘Kwɔma diiɽi ki-ŋiɽany-na, nǝ ŋgwana kwɔmǝ-ŋǝsi iŋnaci keereny etheele Jǝliil; e-ta agwɔ-mǝ ese kinana-ŋw!’ kithaayinarsi ŋa ŋimǝ-ŋǝsi andaci.” 8 Nǝr ɔrlacci ṯimaamɔwa ŋwɔḏoŋw liviɽigathɔ, lithiinyanna naana tok, na nǝr nyeŋlena tok, nǝr avri ethi andica ṯalaamiiza ṯuuŋwun. 9 Nǝsi Yǝcu ruwǝthitha naana bireṯ, nɔŋwsǝccǝŋw, “Ŋaaŋa kila lisaawa.” Nǝr dɔŋgwatha naanɔ-ŋgwɔ nǝr iidǝccǝlɔ ŋwɔɽelle-na nǝr kwoccelɔ. 10 Nǝsi Yǝcu ɔccaŋw, “Ǝṯi ṯiinya mac, nḏir andica liyǝŋgǝri-ŋwɔsi ǝsi ɔccǝŋw, nḏir Jaliil ǝrnyii-gwɔ ese.”
Hɔrraas mɔŋgwɔ andasi ŋiɽaŋali ŋimǝ ǝrrini.
11 Na mǝ laaw iidǝ kithaay mareele, nǝ jesh kwokwo ŋgwa kwɔkarna timaamɔ-lɔ aaɽitha ki-mǝḏiinǝ-nǝ mindaŋ nǝr andaci rɔ-asa rǝthi kahana kwomne tatap ŋgwa kwǝrrinǝ. 12 Nǝ rɔ-asa rǝthi kahana aaɽathi dɔŋw lishiyuukh-li nǝr mɔmri ŋiɽaŋali-la, mindaŋ nǝr inḏǝthǝ jesha gwuruushǝ kwittǝzir. 13 Nǝrsi ǝccǝŋw, “Andisar aarɔŋw ṯalaamiiz ṯuuŋwun ṯimǝ iila kulŋǝ-nǝ nǝr nyiimi aŋna wuuŋwun kinaŋw ninḏiriŋa. 14 Nǝ mǝri biɽanni kǝninǝ kǝthi haakim, nyji ilŋithini ŋunduŋw ŋǝni ŋaalɔ ŋiti ŋǝthi-ŋǝŋi lɔɔma leere mac, mindaŋ meere urtutuninǝ ŋiɽaŋal-ŋi ŋeere mac.” 15 Nǝ hɔrraas aavi gwuruushǝ, mindaŋ nǝreele nǝrsi ǝrri ŋirga ŋandicarsi ethisi ǝrri. Ṯaŋw nǝṯǝ ŋiɽaŋal oro ŋɔ ŋiṯinǝlɔ ki Yahuuḏ-nǝ mindaŋ kirem kwɔmoro kimaara.
Yǝcu mɔŋgwɔ ruwǝnnici ṯalaamiiza-lɔ ṯuuŋwun.
(Mɔrgus 16:14-18Luuga 24:36-49Yuhanna 20:19-23A@maal 1:6-8)16 Nǝ ṯalaamiiz ṯir wrii-kwette ele Jǝliil nǝr allɔ ki-lundǝr-lǝ landicasi-li Yǝcu ethi-gwɔ ele. 17 Mǝr ese tǝ, nǝr kwoccelɔ, nǝ lokwo deŋgen-na nǝroro rɔgwor-na riɽǝ-riɽǝn. 18 Nǝ Yǝcu dɔŋgwatha naanir-gwɔ nɔŋwsi ǝccǝŋw, “Limǝ-nyii inḏǝthǝ sɔlta tatap kwǝthi ki-leere-naŋw, nǝ kwurǝyu-lu tok. 19 Ndir ki-lizi-nǝ tatap ǝzir naana wiric, ǝsi ruusi ṯalaamiiz ṯiinyi; mindaŋ ǝsi ǝccǝ @ammiḏa yiriny-yi yǝthi Papa nǝ yǝthi Tɔr nǝ yǝthi Ṯigɽim Ṯirllinǝlɔ ter. 20 Ǝsi ǝccǝ @allima ethisi iinyici naana tatap ŋa ŋǝllicǝ-ŋǝsi-ŋi waamira. Nǝ nyii kwɔnanni ŋaaŋa-li dok-dok, mindaŋ mǝ lɔɔmɔr iila kila linḏi ethi rimthithi.”