1 E-ta nǝ meleka kwir nimrǝ ṯɔthni ǝrii kibooɽonya. Mindaŋ ninyeese ṯɔɔrɔmi ṯiidu kileere nɔŋwɔɔɽa ki-ṯurmun-nǝ, mindaŋ nǝr inḏǝthǝ mɔfṯaah kwǝthi ǝzir wǝthi ṯakka kizǝn kuṯṯǝlɔ lac. 2 Nǝ ṯɔɔrɔm kiṯṯi ǝzir wǝthi ṯakka kizǝn kuṯṯǝlɔ, nǝgwɔ kwuulu dallitha-na kwir kaka kwuulu kwǝthi ǝṯuun wɔppa; mindaŋ nǝ fɔɔri kwǝthi aaŋwɔn oro kirim, nǝ leere tok kwuulu-gi kwǝllithi kǝzir wǝthi ṯakka kizǝn. 3 Mindaŋ nǝ yaama ruuthǝ kwuulu-nǝ, nǝreele ki-ṯurmun-nǝ, nǝrsi inḏǝthǝ ŋɔma ŋir kaka ŋǝthisi ŋwebdeny ŋwɔthi ṯurmun-nǝ. 4 Nǝrsi andaci etheere kiirasi karawa-lɔ mac, wala yaaɽi, wala kwomne kweere kwigiithinǝ; laakin ethi kiirasi lizi-lɔ ṯɔɽɔk kila liti lǝthi yaaṯima yǝthi Allah ki-yuthul-lǝ yeeŋen mac. 5 Nareere duŋgwaci yaamaŋi ethi peenye lizi mac, laakin ethisi kǝniny biithini ṯurvǝ yǝwǝ ṯɔthni. Nǝ ṯurvǝ ṯeeŋen oro kaka ŋijma ŋǝthi lebdeny lǝṯi yee kwizi. 6 Nǝ ki-yǝwǝ-lǝ ṯǝ kiya yir ṯɔthni, a lizi naŋni ŋiɽany, laakin ǝrseere kaṯṯasi mac; ǝroro sɔɔrɔm ethi ai, laakin ǝsi ŋiɽany arṯitha-lɔ.
7 Nǝ yaama aaɽanni limɔrṯa linanyja ŋǝryǝ-lɔ cɔgwo-cɔgwop; na ki-ŋwɔɽa-lɔ ŋweeŋen nǝrǝthi kwomne kwette kwir kaka nyaŋgi nyǝthi ḏahab; nǝ kiyǝnǝ kweeŋen aaɽanni lizigwunǝŋi. 8 Nǝ ǝwɽu weeŋen aaɽanni ǝwɽu wǝthi laaw, nǝ yiŋath yeeŋen aaɽanni yiŋath yǝthi lisɔndaŋa. 9 Nǝr kenne ki-lɔrdɔm-la leeŋen kwomne kwir kaka yethre yǝthi lisarṯɔ, nǝ kwuurunnǝ kwǝthi yɔvɔɔ yeeŋen oro kaka kwuurunnǝ kwǝthi yaarrɔ yǝthi lɔmɔrṯa, lugwuɽutǝthu ethi avratha ki-ŋǝryǝ. 10 Nǝrǝthi riiya rɔn-ri rir kaka rǝthi ŋwebdeny, na nǝrǝthi ŋɔma ki-riiya reeŋen, ethi-ŋi inḏini lizi ṯurvǝ yǝwǝ ṯɔthni. 11 Nǝrǝthi mǝlik-gǝ kwimthisi, kwir mǝlika kwǝthi ǝzir kuṯṯǝlɔ wǝthi ṯǝkkizǝ kizǝn. Nǝ yiriny yuuŋwun Ŋibraaniiyyiina ǝni Abaaḏuun, nǝ Ŋiyuunaaniiyyiina, ǝni Aballiiyyuun (yǝniŋw, “Ŋgwa kwǝṯi Kiirasalɔ”).
12 Nǝ ṯurvǝ ṯamthɔ ṯir nimrǝ kwette; na nǝtǝ ṯurvǝ naani ṯiɽǝn kinnǝni ṯinḏi ethiila kwokwony.
13 E-ta nǝ meleka kwir nimrǝ nyirlil ǝrii kibooɽonya kuuŋun. Mindaŋ nenyii neŋne ṯogɽo ṯuruuthu ki-rɔkɔn rir kwaɽiŋan rǝthi ŋwɔthgwun ŋwɔthi ḏahab ŋwɔṯi naani kiyǝnǝ yǝthi Allah. 14 Nǝ ṯogɽo ǝccǝ meleka kwir nimrǝ nyirlil ŋgwa kwappa kibooɽonya-ŋwɔ, “Kǝdithi limeleka kila lir kwaɽiŋan ligǝkkinǝ ki-bahar-la kwɔppa kwǝni Alfɔraaṯ!” 15 Ŋwɔṯaŋw mindaŋ nǝ limeleka kila lir kwaɽiŋan kǝdinni, kila linanyja saa@-lɔ cɔgwo-cɔgwop, laamin tok, ǝwǝ tok, nǝ kithlǝ tok, ethi ɽeenye kithritha kette kǝthi ṯoɽol kǝthi lizi. 16 Nǝrnyii ilŋithini ŋwɔɔɽɔŋi ŋwɔthi jesh ŋwir miyǝṯein milyɔɔn (200,000,000). 17 Nǝ ki-rɔ-ɔya-na, ninyeese lɔmɔrṯa, nǝ kila lǝllithisi-gwɔlǝ: nǝr kenne yethreŋi yɔɔri kaka iigǝ, nǝ yaaguuṯ ǝzrǝg, nǝ kibriiṯ tok. Nǝ ŋwɔɽa ŋwɔthi limɔrṯa oro kaka ŋwɔthi lisɔndaŋa, nǝ iigǝ ruuthǝ kworo-na kweeŋen kwuulu-gi nǝ kibriiṯ tok. 18 Nǝ jiizǝ-gi ŋgwɔ kwir ṯoɽol, nǝr-gi ɽeenye lizi kithritha kette kǝthi ṯoɽol: kwir iigǝ-ŋǝ kwuulu-gi nǝ kibriiṯ tok, kwuruuthu kworo-na kweeŋen. 19 Kaka nǝṯi-gwɔ ŋɔma ŋǝthi lɔmɔrṯa kila naani kworo-na kweeŋen, nǝ ki-riiya reeŋen tok. Ǝṯi riiya reeŋen aaɽanni yimǝwǝ ŋwɔɽa-ŋi, ǝṯir-ri indǝthǝ lizi jiizǝ.
20 Nǝ lizi kila limǝ ǝɽinni tatap liti limǝrsi ɽeenye mac jiizǝ-gi ŋgwɔ, nǝreere ɔrlacca ŋundu-ŋǝ kwomne-ŋgwa ŋwɔdoŋw mac, kwɔdandimathir rii-ri reeŋen. Nǝreere aalitha rii ṯɔgwɔccalɔ ṯǝthi shayaaṯiin mac, wala kwomne-lɔ kwir ḏahab, wala kwir fiḏḏa, wala nɔhaas, wala kaali keere, wala ŋwuuɽi, kaka niti nǝṯɔ-ŋgwɔ iisithi mac, wala ethi neŋne, wala ethi ele, 21 wala ethi urlǝ rɔgwor-lɔ kegitte-ŋgi ḏimmiya ṯeeŋen, nǝ ki-ŋozŋor-na ŋeeŋen, nv ki-ŋiijin-nǝ ŋeeŋen, ya ŋɔɔɽam-na ŋeeŋen.