Haywaanaaṯ wuɽǝn.
1 Ninyeese haywaana wuruuthu ki-bahar-na, wǝthi rill wrii, nǝ ŋwɔɽa dɔvokwɔɽony, nǝ rill ǝthi nyaŋgiŋ-la nyeere-nyeere, nǝ ki-ŋwɔɽa-la ŋweeŋen ŋweere-ŋweere tok, nǝrǝthi yiriny yaṯhi-yi ollo Allah. 2 Na haywaan wa wiisa-nyii nɔŋwaaɽanni kiɽiyaara, nǝ yaaga yuuŋwun aaɽanni kiiraawa kǝni ḏub, nǝ kworo kwuuŋwun aaɽanni kworo kwǝthi sɔndaŋa. E-ta na kimǝw kɔppa inḏǝthǝ ŋɔma ŋuuŋun, nǝ kwɔrsi kwuuŋwun kwǝthi ŋeeleny, nǝ sɔlṯa kwɔppa tok. 3 Nǝ nda lette luuŋwun ǝthi kǝmmǝ-ŋi kǝthi ŋiɽany, laakin tǝ nɔŋw sǝwinni, nǝ ṯurmun tatap kwaathitha haywaana wa ṯiliŋɽasa-thi. 4 Nǝ lizi tatap kwocce kimǝwǝ-lɔ kɔppa, kaka mɔŋgwɔ inḏǝthǝ haywaana sɔlṯa kwuuŋwun. Mindaŋ nǝr kwocce haywaana-lɔ tok, nǝraarɔŋw, “Ǝyǝ kwɔrɔ kwaaɽinna haywaana? Nǝ ǝyǝ kwɔrɔ kwǝthi ŋɔma ethi ṯɔgthi ŋundu-gi?”
5 Nǝr duŋgwǝci haywaana ethi andasi ṯippiŋǝ-thi rogɽo, ollo-ŋgi Allah, mindaŋ nǝr ǝmminci ethǝthi sɔlṯa yǝwǝ ruɽii-riɽǝn-la kwuɽǝn. 6 Nɔŋwaari ibṯǝḏi tɔc ethi ollo yiriny yǝthi Allah, na ǝzir wǝṯɔŋgwɔ nanni, nǝ kila tatap lǝṯi nanni ki-leere-na. 7 Nǝr duŋgwǝci ethi ṯɔgthi lizi-li lǝthi Allah mindaŋ ethisi ṯiinyi, e-ta nǝr inḏǝthǝ sɔlṯa ethi mithǝ yǝbiilǝ tatap, ŋeeleny mindaŋ, riŋla mindaŋ nǝ umam tok. 8 E-ta a lizi tatap linaanɔ ki-ṯurmun-nǝ kwoccelɔ; kila liti lɔlɔɔthɔna yiriny yeeŋen niti nigittina-gwɔ ṯurmun kinnǝni mac, ethisi lo kiṯaab-na kǝthi ŋimiitha ŋǝthi Tirany kira timǝr ɽeenye.
9 “Mɔŋwɔthi kweere yǝni yǝthi-yi neŋne ethɔŋw neŋne! 10 Mǝ kweere naŋni ethi mithinni etheele ki-ŋɔwaay-na, ŋwɔtǝ ele-pa ki-ŋɔwaay-na, nǝ mɔŋw naŋni kweere ethi ɽeenye ŋunduŋw kaalala-gi, laazim ǝri ɽeenye ŋunduŋw tok kaalala-gi. Nǝṯǝ ŋiɽaŋal oro ŋɔ ŋɔrnacarsi lizi lǝthi Allah ethisi indinyanni naana ṯǝmminǝ-thi.”
11 E-ta ninyeese haywaana wɔthaathɔ kwokwony wuruuthu ki-wurǝyu-nǝ. Nɔŋwɔthi rill riɽǝn rir kaka rill rǝthi tirany, mindaŋ nɔŋw andasi kaka kimǝw kɔppa. 12 Nɔŋw ǝrri-ri sɔlṯa tatap kwɔppa kwǝthi haywaan wǝthi kerreny-ŋwɔ kiyǝnǝ yuuŋwun. Nɔŋw kwɔrmɔṯasi ṯurmunǝ tatap lizi-li-nǝ kila tatap linaanɔ-gwɔna, ethi kwocce haywaana-lɔ wǝthi kerreny-ŋwɔ, wa wǝthi kǝmmǝŋi kǝthi ŋiɽany kimǝ sǝwinni. 13 Nǝ haywaan wa wir nimrǝ kwuɽǝn ǝrri-ri ŋilima ŋɔppɔ-ŋɔppa, nɔŋw duŋgwǝcǝ iigǝŋi ethɔɔɽa ki-leere-na ki-ṯurmun-nǝ kiyǝnǝ yǝthi lizi tatap. 14 E-ta nɔŋw kǝkiɽinyji lizi-lɔ tatap ki-ṯurmun-nǝ, ŋilim-ŋi ŋa ŋǝmminicǝrsi-ŋi ethisi ǝrri kiyǝnǝ yǝthi haywaan wǝthi kerreny-ŋwɔ. Nǝsi haywaan andaci ethi daɽimatha suurǝ ethi-gi iiɽi haywaana-na wa wippinnǝ kǝmmǝŋi kaalala-gi, laakin tǝ nɔŋweere ai mac. 15 Nǝr ǝmminici haywaana wir nimrǝ kwuɽǝn ethi ṯiŋatha wǝŋ wǝthi ŋimiitha ki-suurǝ-nǝ kwǝthi haywaan wǝthi kerreny-ŋwɔ, mindaŋ mǝ suurǝ ǝthi ŋɔma ethi andasi, nǝ ethisi ɽeenye tatap kila lidirna ethi kwoccelɔ. 16 Nǝ haywaan kwɔrmɔṯasi lizi tatap, lokwɔɽony nǝ lɔppa, lɔrṯɔ nǝ lir lɔwaay-na ṯarr, nǝ lɔwaay-ŋǝ lizi-li lir hɔrr, ethisi uɽuci @alaama ki-rii rǝthi mɔni nǝ ki-yithul-lǝ yeeŋen tok. 17 Mindaŋ a kwizi ere kweere mac kwǝthi ŋɔma ethi liṯṯa wala ethiila kithaay illi mɔŋwɔthi @alaama wɔ, wir yiriny yǝthi haywaan, ya ŋwɔɔɽɔ ŋwɔnaanɔ ki-lɔɔbi lǝthi yiriny yuuŋwun. 18 Ŋiɽaŋal ŋɔ ŋǝni ŋinaŋna ṯǝthinǝ yǝnǝ. Ŋgwa kwir shaaṯir ŋwɔthi ŋɔma ethi elŋe ma@na kwǝthi ŋwɔɔɽɔ ŋwɔthi haywaan, kaka nɔrɔr-gwɔ ŋwɔthi ŋizigwunǝŋ, ŋwir suṯṯu miiyyǝ siṯṯa siṯṯiin.