Mǝthǝl kwǝthi ŋwetteṯ wrii.
1 ‘Ki-lɔɔmɔr-la ṯǝ kila, a Ŋeeleny ŋǝthi ki-leere-naŋw aaɽanni ŋiɽaŋali ŋɔ ŋinḏi. Nǝ ŋwetteṯ naani wrii ŋwɔdimmǝ ŋwombo ŋweeŋen nǝr-ŋi ruu ethi biɽitha ki-thaay kwɔr-ŋǝli kwaagithɔ. 2 Ṯɔthni deŋgen-na ŋwithii kii, nǝ ṯɔthni ŋwɔfirlli kii. 3 Nǝ ŋwa ŋwɔthii kii nǝr dimmǝ ŋwombo ŋweeŋen laakin nǝreere appi ŋiila ŋuuru mac, 4 nǝ ŋwa ŋwɔfirlli kii appanni ŋiila ŋibaalalɔ kwomne-na kwir ter ŋǝthi ŋwombo ŋweeŋen. 5 Nǝ kwɔr kwaagithɔ ɽindaŋnalɔ ethi ɔppatha, mindaŋ nǝ ŋwetteṯ nḏirathala kwɔnoŋw-kwɔnoŋw mindaŋ nǝsi ŋwaarɔ aavanni nǝr nḏiri.
6 “Mǝ kulŋǝ-nǝ oro tittir, nǝ kwɔɔla aara; ǝɽir kwɔr kwaagithɔ caŋgwala kwɔmǝ iila! Ruuthǝr ǝli kadritha ki-thaay! 7 E-ta nǝ ŋwetteṯ ŋwir wrii diiɽi nǝr daɽimatha ŋwombo ŋweeŋen. 8 Nǝ ŋwithii kii nǝrsǝccǝ ŋwɔfirlli kii-ŋw, ‘Nḏǝthǝr-nyji ŋiila ŋoko ŋaalɔ, kaka ninḏi-gwɔ ŋwombo ŋwɔri ethi ai!’ 9 Nǝsi ŋwɔfirlli kii ǝŋnici nǝrsǝccǝŋw, ‘Bǝri-mǝ! Ŋiti ŋǝthinǝsi ŋɔgbathɔ mac, ŋǝthisi inḏǝthǝ ŋaaŋwɔsi mindaŋ ethisi ǝɽicci rogɽo rǝri. Nḏir naanɔ-gwɔ kila lǝṯisi iila ǝsi licca rogɽo raalɔ!’ 10 Nǝ ŋwetteṯ ŋwithii kii ele ethi liṯṯa ŋiila; a-naanir tǝ kinnǝ par, nǝ kwɔr kwaagithɔ ɔppatha. Nǝ ŋwetteṯ ŋwa ŋwir ṯɔthni ŋwaagwɔ ǝzir nǝr ǝnḏi kwɔr-ŋǝli kwaagithɔ kǝzuumǝ-nǝ wǝthi @iris, mindaŋ nǝ ǝgwur lǝŋthǝnni.
11 “Kwaathan kwokwok tǝ nǝ nyiira nyithaathɔ ɔppatha. Nǝr urnuni nǝraarɔŋw, ‘Yaa sǝyyiḏ! Yaa sǝyyiḏ duŋgwǝcǝ-nyji nyǝnḏǝ’. 12 Nǝsi kwɔr kwaagithɔ ǝŋnici nɔŋwsǝccǝŋw, ‘Bǝri-mǝ! Nyiiti-mǝ kwilŋithi-ŋǝsi rerrem mac!’
13 “Aŋrathir kaka niti nilŋithiŋǝ-gwɔ laaminɔ alla saa@ mac.
Mǝthǝl kwǝthi kwɔr kwinḏǝthǝ yaḏaama gwuruushǝ ethi ɔraṯisi-na.
(Luuga 19:11-27)14 “Ki-lɔɔmɔr-la ṯǝ kila a Ŋeeleny ŋǝthi ki-leere-naŋw aaɽanni mǝthǝlǝ ŋgwɔ kwinḏi ethiila. Nǝ kwɔr kwette naani kwinḏi ethi ṯayyi dɔɔnɔŋw-lɔ kwuuŋwun etheele ŋiirin; nɔŋw ɔrnɔṯi yaḏaama yuuŋwun nɔŋwsi kette ki-ŋothɽor-na ŋuuŋun ethisi karnaci. 15 Nɔŋwsi kannaci leere-leere kwir-ga kwǝthicǝr ŋɔma-na; nɔŋw inḏǝthǝ kette jineya ṯɔthni, nǝ kithaathɔ jineya kwuɽǝn nǝ kir ter jineya kwette. Mindaŋ nɔŋwaari saafira. 16 Nǝ khaḏaam ŋga kaava jineya ṯɔthni ele nɔŋgi aari ṯaajira-lɔ mindaŋ nɔŋw ǝginǝ jineya ṯɔthni kwɔthaathɔ. 17 Nǝ ŋga kaava jineya kwuɽǝn nɔŋwsi-ṯǝ ruusuŋw tok, mindaŋ nɔŋwɔginǝ jineya kwuɽǝn tok kwɔthaathɔ. 18 Laakin khaḏaam ŋga kaava jineya kwette, nɔŋweele tɔc, nɔŋw kwuuruci lubuŋi mindaŋ nɔŋw lucci gwuruushǝ kwǝthi sǝyyid kwuuŋwun. 19 Mǝ ŋwɔɔmɔr ŋwuuru ernene tǝ, nǝ sǝyyid kwǝthi yaḏaam kiya aaɽa nɔŋwsi naŋni ethisi iiɽǝci ŋgwa kwɔmǝr ǝginǝ. 20 Nǝ khaḏaam iila ŋga kaava jineya ṯɔthni nɔŋw indethǝ jineya ŋgwa tok kwir ṯɔthni kwǝginǝŋw, mindaŋ nɔŋwɔccǝŋw, ‘Yaa sǝyyiḏ a kwinḏǝthǝ-nyii jineya ṯɔthni, iisamba ŋgwɔ kwir ṯɔthni kwɔmǝ-nyii ǝginǝ kwir ter’. 21 Nǝ sǝyyid kwuuŋwun ǝccǝŋw, ‘Ŋisaaw beṯṯen ŋimǝsi ǝrri, a kwir khaḏaam kirllalɔ kaka naŋricaŋa-gwɔ ŋgwa kwokwɔṯoc, ŋǝ ruusi wǝkiil wǝthi ŋgwa kwuuru, ǝnḏǝ kiininy ndi ɔɽɔmaṯṯi ki-ṯaama-na ṯiinyi’. 22 Nǝ khaḏaam iila ŋga tok kaava jineya kwuɽǝn nɔŋwɔccǝŋw, ‘Yaa sǝyyiḏ a kwinḏǝthǝ-nyii jineya kwuɽǝn. Iisamba ŋgwɔ kwuɽǝn kwokwony kwɔmǝ-nyii ǝginǝ’. 23 Nǝ sǝyyiḏ kwuuŋwun ǝccǝŋw, ‘Ŋisaaw beṯṯen! A kwir khaḏaam kirllalɔ! Kaka aŋricaŋa-gwɔ ŋgwa kwokwɔɽoc, ŋǝ ruusi wǝkiil wǝthi ŋgwa kwuuru, ǝndǝ kiininy ndi ɔrɔmaṯṯi ki-ṯaama-na ṯiinyi!’ 24 Nǝ khaḏaam ŋga kaava jineya kwette iila nɔŋwɔccǝŋw, ‘Yaa sǝyyiḏ! Nyii kwilŋica-ŋa rac a kwiti kwǝthi ŋimɽiyǝnǝ mac, a kwǝṯi ɔni kǝzir witi wǝṯi-gwɔ kwee mac, ǝṯi firṯatha kǝzir witi wǝṯi-gwɔ urnǝsi mac. 25 Ṯaŋw nǝnyii teenye ninyeele nǝnyii kwurṯǝthǝ gwuruushǝ ŋgwɔ ki-lubuŋw-nǝ. Iisamba gwuruushǝ kwɔɔŋa kwir-ṯa-pa ŋgwɔ’. 26 Nǝ sǝyyiḏ kwuuŋwun ǝccǝŋw, ‘A kwir khaḏaam kigiik kir kwɔmoso! A kwilŋica-nyii aŋgwɔrɔ kwǝṯi ɔni kǝzir witi wǝṯiny-gwɔ kwee mac, nǝ ǝṯiny firṯatha kǝzir wa witi wǝṯiny-gwɔ urnǝsi ŋwaana mac? 27 Kaan ŋɔvthanna naani-ŋa-gwɔ ǝŋgi kette gwuruushǝ kwiinyi ki-bǝŋgi-nǝ mindaŋ ǝŋginyii aavi misaaga-gi. 28 Aagathir gwuruushǝ a inḏǝthǝ ŋga kǝthi jineya wrii. 29 Kaka kweere mɔŋwɔthi kwomne kweere ǝrgwɔ kiɽǝzǝci-lǝ, mindaŋ ŋwɔthi kwuuru; laakin ŋgwa kwiti kwǝthi kwomne kweere mac mɔŋwsi kinnǝni ǝthi nyokwɽoc ǝrsi-tǝ aagatha. 30 Laakin ŋǝthi khaḏaam ŋgɔ kirtalɔŋw kǝṯṯir kirim-nǝ kaaṯathɔ ndom-ndom; ŋwɔgwɔ aarii kinanaŋw, ŋwɔgwɔ yee yiŋath-na tok!’
Hɔkwɔm wa winḏi ethiila kwaathan.
31 “Mǝ Tɔr ṯǝthi kwizigwunǝŋ iila kaka mǝlik, limeleka-li tatap, ŋwɔ naanalɔ kwɔrsi-la kwǝthi ŋinith ŋuuŋun, 32 a lizi tatap lǝthi ṯurmun raaytha dɔŋw kiyǝnǝ yuuŋwun. E-ta ŋwɔsi uṯǝthǝnǝ ŋwɔdɔŋw-na ŋwuɽǝn, kaka ǝṯi-gwɔ taaṯa ruu yaaŋal-na yiiɽɔ-yi. 33 Ŋwɔ rilli yaaŋali ki-thii ṯǝthi mɔni, nǝ yiiɽɔ ki-thii ṯǝthi ŋǝgwur. 34 E-ta ǝsi mǝlik ǝccǝ kila linaanɔ ki-thii ṯǝthi mɔniŋw, ‘Ilar ŋaaŋa kila lɔrtathisi Papa kwiinyi! Ilar aavi Ŋeelenyi ŋa ŋǝgicǝr-ŋǝsi-ŋi ǝzir kinaŋw tuk nigittar-gwɔ ṯurmunǝlɔ kwon-kwon. 35 Kinaŋw niithiny yaaŋwɔ, nǝrnyii ithni, niithiny ǝwthǝ nǝrnyji inḏǝthǝ nǝnyjii, nithimthinany-gwɔ nǝrnyii ǝnyji ki-dɔɔnɔ-na kwaalɔ. 36 A-naaninyii lɔvdɔṯṯɔ nǝrnyii kinnini; numǝny-gwɔ nǝrnyii raaŋitha’. 37 Ǝrǝŋnici kila jɔvthanna ǝrǝccǝŋw, ‘Ṯaccaŋ-tuk kwɔrɔ Kweeleny kwiisarŋa-gi kwiithi yaaŋwɔ mindaŋ nithnǝr-ŋǝ-mǝ, alla iithiŋǝ-gwɔ ǝwthǝ mindaŋ niccǝr-ŋǝsi-gwɔ? 38 Ṯaccaŋ-tuk kwɔrɔ kwiisarŋa-gi kwǝthimthina mindaŋ nǝnyjǝrŋǝ-gwɔ ki-dɔɔnɔ-na kwǝri, alla a-naaniŋa-gwɔ lɔvdɔṯṯɔ mindaŋ a kinninǝr-ŋǝ? 39 Taccaŋ-tuk kwɔrɔ kwiisarŋa-gi kwuumǝ nǝ kwɔnaanɔ ki-sijin-nǝ mindaŋ raaŋathir-ŋa-mǝ?’ 40 Ǝsi mǝlik ǝŋnici ŋwɔsǝccǝŋw, ‘Nyii kwǝccǝ-ŋǝsi-mǝ ŋwɔ rerrem, mǝsi ǝrrici kweere kwǝthi kɔlɔ liti lǝṯirsi ǝnyji ki-lɔɔɽɔ-na mac, iir liyǝŋgǝri liinyi, nǝṯǝni lǝrricǝ-nyji nyuŋwɔ tok!’ 41 E-ta ŋwɔsǝccǝ kila linaanathi ṯii-trii ṯǝthi ŋǝgwur-ŋwɔ, ‘Tuccǝr-nyii-nǝ kithaay ŋaaŋa limǝsi Allah ollo! Tuccǝr-nyii-nǝ kithaay ele kiigǝ-nǝ wǝṯi nanni dok-dok wǝgizǝr-yi Ibliis-ŋwɔsi ǝzir limeleka-li luuŋwun! 42 Kaka niithiny-gwɔ yaaŋwɔ, laakin nǝrnyeere ithni mac, nǝnyii ǝwthǝ yee, laakin nǝrnyeere icci ŋaaw mac; 43 nǝnyii ṯimethine laakin nǝrnyeere ǝnyji ki-dɔɔnɔ-na kwaalɔ mac, nǝnyii umi nǝ nǝnyii naani ki-sijin-nǝ, laakin nǝrnyeere kettice yǝy mac’. 44 E-ta ǝrǝŋnici ǝrǝccǝŋw, ‘Kweeleny, nyiiŋǝ liisaŋa ṯaccaŋ kwiithi yaaŋwɔ, alla kwiithi ǝwthǝ alla kwǝthimthina, alla kwɔnaanɔ lɔvdɔṯṯɔ, alla kwuumǝ, alla kwɔnaanɔ ki-sijin-nǝ mindaŋ niti nimǝccǝr-ŋǝ mac?’ 45 Ǝsi mǝlik ǝŋnici ŋwɔsǝccǝŋw, ‘Nyii kwǝccǝ-ŋǝsi-mǝ ŋwɔ, mǝ derne ethi mǝcci kweere kwǝthi kɔlɔ liti lǝṯirsi ǝnyji ki-lɔɔɽɔ-na mac, nǝni ṯǝ lidirna ethi mǝcci nyuŋwɔ’. 46 Ŋwɔṯaŋw ǝrsi ṯiŋatha kɔlɔ ki-turvǝ-nǝ ṯǝthi hɔkwɔm wǝṯi nannatha dok-dok, laakin kila lɔvthanna tǝ, ereele ki-ŋimiitha-na ŋǝṯi nannitha dok-dok.”