Yǝcu mɔŋgwɔ reethe reṯ kaayin-la.
(Mɔrgus 9:2-13Luuga 9:28-36)1 Mǝ ŋwaamin nyirlil ernene tǝ, nǝ Yǝcu mɔlo Bɔtrɔs-ŋwɔsi Ya@guub-ŋǝli nǝ Yuhanna tok lir ŋiyaŋga, nɔŋw-li allɔ kaayin-la wɔɔlala tottoc, nǝr-gwɔ naani cuk-cuk. 2 Mǝreese Yǝcu-ŋw nǝr inḏa kwɔmǝ reethe reṯ. Nǝ kiyǝnǝ kwmuŋwun aari kap-kap kaka aaŋwɔn. Nǝ yireth yuuŋwun orlle nǝr fiithi per-per. 3 Nǝ ṯalaamiiz kitha ṯir ṯoɽol ese Muusǝ-ŋwɔsi Iliiyyǝ-gi landisa Yǝcu-ŋǝli. 4 Nǝ Bɔṯrɔs ǝccǝ Yǝcu-ŋwɔ, “Kweeleny ŋɔmaami beṯṯen a-naanir kɔnɔŋw! Mǝmmini tǝ, nyii kette yǝvǝŋi ṯoɽol kɔnɔŋw, kette kɔɔŋa kette kǝthi Muusǝ, nǝ kette kǝthi Iliiyyǝ.” 5 Kinaŋw nandisaŋw tǝ kinnǝni, nǝ lebleth iila laari kap-kap nɔŋwsi kwuɽubǝthǝlɔ, nǝ ṯogɽo andisa ki-lebleth-na, nɔŋwaarɔŋw, “Tɔr ṯiinyi tir ṯǝ kira ṯiinyi wɔɽe-wɔɽeny tɔtɔpɔt, taminy-ri-na beṯ-beṯṯen, ǝṯi niŋnaci!” 6 Mǝ ṯalaamiiz neŋne ṯogɽo, nǝr ṯeenye beṯṯen nǝr iidi yǝy-yǝlɔ kwurǝyu-lu. 7 Laakin nǝ Yǝcu iila nɔŋwsi mɔmmi mindaŋ nɔŋwsǝccǝŋw, “Diiɽir ǝṯi ṯiinya mac.” 8 Mindaŋ mǝr alla ŋwɔɽa-lɔ mǝreese ǝzir nǝreere ese kwizi kweere mac illi Yǝcu ṯɔɽɔk.
9 Mǝr dappa kaayin-la, nǝsi Yǝcu icci ŋejmethi nɔŋwsǝccǝŋw, “Ǝṯi andica kwizi kweere mac kwomne ŋgwa kwiisa-ŋa, mindaŋ mǝ Tɔr ṯǝthi Kwizigwunǝŋ diiɽǝ ki-ŋiɽany-na.” 10 E-ta nǝ ṯalaamiiz uṯici Yǝcu-ŋwlɔ nǝrǝccǝŋw, “Mɔ@allimiin kwǝthi Sherii@a kwotho kwaarɔŋw, Iliiyyǝ kwǝŋgi iila kerreny?” 11 Nɔŋwsi ǝŋnici nɔŋwsǝccǝŋw, “Iliiyyǝ kwǝŋgi iila rac kerreny, mindaŋ ǝŋgwɔŋw kette kwomne-lɔ tatap cɔgwo-cɔgwop. 12 Laakin nyii kwɔŋǝsi andaci. Iliiyyǝ kwɔmǝ-pǝ iila mindaŋ nǝ lizi ere elŋe mac, laakin nǝrsi ǝrrici ŋirga ŋamɽasi ŋunduŋwsi. Nǝ ǝrisi-ṯǝ ǝrrici Tɔɔrɔ ṯǝthi Kwizigwunǝŋ ŋigii ṯǝŋw tok.” 13 E-ta nǝ ṯalaamiiz elŋe ethaarɔŋw kwandisa ŋiɽaŋali ŋǝni Yuhanna kwǝni Ma@maḏaan.
Yǝcu mɔŋgwɔ sǝwi tɔɔrɔ tǝthi ṯigɽimǝ-nǝ ṯigii.
(Mɔrgus 9:14-29Luuga 9:37-43a)14 Mǝr aaɽitha naanɔ-gwɔ dɔŋw, nǝ kwɔr kwette iila naanɔ-gwɔ Yǝcu, nɔŋw kwocce ŋwɔrgwɔ-lɔ nɔŋwɔccǝŋw, 15 “Yaa Sǝyyid ethiŋǝ-ṯǝ ṯɔgwor yatha ki-tɔr ṯiinyi! Kaka nǝṯi-gwɔ lɔɔrɔm mithǝ ǝṯɔŋw rǝri beṯṯen. Nǝ ŋwaamin ŋwuuru ǝṯɔŋw kagiṯṯɔ kiigǝ-nǝ ya ŋaaw-na tok. 16 Ninyǝvicǝ ṯalaamiiza ṯɔɔŋwa, laakin nǝreere ǝthici ŋɔma mac ethi sǝwi.” 17 Nǝ Yǝcu aŋni nɔŋwɔccǝŋw, “A lirmba lir lizi lǝthi kirem-ŋwɔ liira ṯǝmminǝ, ligii tok! Nyii kwǝthi naani ŋaaŋa-li ṯacca-ṯaccaŋ? Nyii kwɔŋǝsi-thi indinyanni naana tacca-ṯaccaŋ? Ǝvicǝ-nyii-ṯi tɔɔrɔ kɔnɔŋw!” 18 E-ta nǝ Yǝcu ǝllici ṯigɽimǝ ṯigii waamira ethi ruu kithaay ki-tɔr-na, nǝ kinaṯa kinaŋw-lɔ ṯogdo-ṯogdo nɔŋw saawanni tɔc. 19 E-ta nǝ ṯalaamiiz iila cuk-cuk naanɔ-ŋgwɔ nǝrǝccǝŋw, “Arpa ŋɔma ŋotho ŋiiraca-nyji ethi rutti kithaay?” 20 Nɔŋwsǝccǝŋw, “A lende-pǝ lǝthi ṯǝmminǝ ṯuuru, nyii kwɔŋǝsi andaci rerrem, ǝŋgǝthi ṯǝmminǝ ṯokwɔṯoc ṯir kaka lɔɔla lǝthi kwaṯṯa, ǝŋgi ǝccǝ ayinɔ wɔŋw, ‘Dɔŋgwathi kɔnɔŋw ele kinanaŋw’, ǝŋgwɔŋw-tǝ ele. A lǝthi ŋɔma ethisǝrri ŋette nyithak. [ 21 Laakin ṯaara-thi kiyiiriny nǝ ṯimthǝ ethi mithǝ armindaani ṯɔɽɔk ŋwɔthi ŋɔma ethi rutti kwomne kithaay kwir kaka ṯǝ ŋgwɔ.’]
Yǝcu mɔŋgwɔ andasi kwokwony ŋiɽaŋali ŋǝthi ŋiɽany ŋuuŋun.
(Mɔrgus 9:30-32Luuga 9:43b-45)22 Mǝ ṯalaamiiz aaɽathi dɔŋw tatap Jǝliil tǝ, nǝsi Yǝcu ǝccǝŋw, “Tɔr ṯǝthi Kwizigwunǝŋ tǝr mithǝ mindaŋ ǝri inḏǝthǝ lizi lǝthi sɔlṯa ki-rii-na reeŋen 23 ǝri ɽeenye; laakin ŋwaamin ṯoɽol ŋwɔ diiɽǝ timiithɔ.” Ŋwɔṯaŋw nǝ ṯalaamiiz ronyine beṯṯen.
Yǝcu mɔŋgwɔ kette ṯɔlba ṯǝthi Heikal.
24 Mǝ Yǝcu-ŋǝ ṯalaamiiz-thi ṯuuŋwun iila Kafranaahuum, nǝr iila lǝṯi allilla ṯɔlba ṯǝthi Heikal naanɔ-gwɔ Bɔṯrɔs nǝrǝccǝŋw, “Mɔ@allim kwaalɔ kwǝṯi kette ṯɔlba ṯǝthi Heikala?” 25 Nǝsi Bɔṯrɔs ǝŋnici nɔŋwsǝccǝŋw, “E-pa.” Mindaŋ mǝ Bɔṯrɔs ǝnḏi kiininy, nǝ Yǝcu rarmatha nɔŋwɔccǝŋw, “Sim@aan, fikir kwɔɔŋa kwaari tha? Ǝyǝŋǝ lir lǝṯi inḏǝthǝ muluuk-gǝ kwǝthi ṯurmun ṯɔlba? Lizi lir lǝthi dɔɔnɔŋw kwǝthi bǝlǝḏ ŋgway alla lǝthi fartɔŋwɔ?” 26 Nɔŋw ǝŋnici nɔŋwɔccǝŋw, “Lǝthi fartɔŋwɔ.” Nǝ Yǝcu ǝccǝŋw, “Nǝ nyɔr nyǝthi dɔɔnɔŋw kwǝthi bǝlǝḏ ŋgwa nyǝtoro-pa hɔrr. 27 Ŋwɔṯaŋw kaka ati ninaŋnarsi etheere urǝzi rɔgwori mac tǝ, ndi kǝniny ki-bahar-na a katta sinnaara, mindaŋ aava kwɔmi ŋgwa kwiŋna, mindaŋ mǝ liŋar kworo-na kwuuŋwun tǝ, a kattisa gwuruushǝ, mindaŋ ǝsi inḏǝthǝ kwǝni kwiinyi nǝ kwɔɔŋa tok.”