Ŋiɽany ŋǝthi Yuhanna kwǝni ma@maḏaan.
(Mɔrgus 6:14-29Luuga 9:7-9)1 Ki-lɔɔmɔr-la ṯǝ kila nǝ Hiiruuḏus kwir Haakim wǝthi Jǝliil-ŋwɔ neŋne ŋiɽaŋali ŋǝthi yiriny yǝthi Yǝcu yimǝ faatha ǝzir naana. 2 Nɔŋw andaci mɔwozofiina kwuuŋwun nɔŋwsǝccǝŋw, “Yuhanna kwǝni Ma@maḏaan kwundǝr-mǝ-ṯǝ ŋgwa kwɔmǝ diiɽǝ ki-ŋiɽany-na, nɔŋw-mǝ ǝrri-ri ŋilima ŋa ŋɔma-ŋi ŋɔ.”
3 Kaka nimthi-gwɔ Hiiruuḏus Yuhanna-ŋwɔ, nɔŋw kǝkki nɔŋw kaṯṯɔ ki-sijin-nǝ, sǝbǝb-gi kwǝthi Hiiruuḏiiyyǝ kwir kwaaw kwǝthi eŋgen kwǝni Fiilibbus; 4 kaka nǝccǝ-gwɔ Yuhanna-ŋw, “Ŋiṯi ŋɔvthanna mac ethi aagwɔ Hiiruuḏiiyyǝ-ŋw.” 5 Nǝ Hiiruuḏus naŋni beṯṯen ethi ɽeenye ŋunduŋw, laakin nɔŋw ṯeenye lizi lir Yahuuḏ kǝka nuruusǝr-gwɔ kwiɽii kweeŋen.
6 Ki-laamin-la lǝthi ŋelŋe ŋǝthi Hiiruuḏus, nǝ tɔr tir tiira ṯǝthi Hiiruuḏiiyyǝ iila nɔŋw irṯi kiyǝnǝ yǝthi luuvǝ linaanɔ kinaŋw. Nǝ Hiiruuḏus aamina beṯṯen. 7 Nɔŋw kittatha rerrem nɔŋwɔccǝŋw, “Nyii kwǝricǝ-ŋǝ haalifa, kwomne kweere nyithak kwǝnyii-gi uṯicǝlɔ ŋǝtǝ inḏǝthǝ!”
8 Mǝsi lǝnyin ilŋithini ŋǝthisi andasi, nɔŋwɔccǝ Hiiruuḏus-ŋwɔ, “Ndǝthǝny kiɽa kǝthi Yuhanna kwǝni Ma@maḏaan kire-kirem-ŋgwɔ ki-sahan-na.” 9 Nǝ mǝlik ronyine beṯṯen; laakin kaka mɔŋgwɔ aari haalifa kiyǝnǝ yǝthi liirin luuŋwun tok, nɔŋw alla waamira ethi inḏǝthǝ; 10 nɔŋw ɔɔsǝthi nǝr uɽuthǝ kiɽa kǝthi Yuhanna ki-sijin-nǝ. 11 Nǝr aava kiɽa ki-sahan-na, nǝr inḏǝthǝ tiira, nǝ ŋundu tǝ nɔŋw inḏǝthǝ lǝnyin. 12 Nǝ ṯalaamiiz ṯǝthi Yuhanna ele nǝr dimmǝ aŋna wuuŋwun, nǝr aanitha mindaŋ nǝreele nǝr andica Yǝcu-ŋw.
Yǝcu mɔŋgwɔ ithni lɔɔrɔ lir khamsa alf.
(Mɔrgus 6:30-44Luuga 9:10-17Yuhanna 6:1-14)13 Na mǝ Yǝcu neŋne ŋiɽaŋali ŋǝthi Yuhanna, nɔŋw ṯayya ǝzir-lɔ wa mɔrkǝb-gi, nɔŋw ruwǝthǝ-lɔ kwɔtɔpɔt. Mǝ lizi neŋne ŋiɽaŋali ŋǝni ŋundu nǝr ṯayya muḏunǝ-lɔkweeŋen nǝr rɔɔmi ŋwaara-ŋalɔ. 14 Mɔŋw ɔppathi nḏɔṯɔma kǝni, nɔŋweese lizi littǝzir mindaŋ nǝr iini ṯɔgwor-na, ŋwɔṯaŋw nɔŋwsi sǝwici lizi leeŋen luumǝ.
15 Mǝ kirakalɔ oro, nǝ ṯalaamiiz ṯuuŋwun iila naanɔ-ŋgwɔ nǝrǝccǝŋw, “Lɔɔmɔr limǝ ṯamthitha keereny, nǝ ǝzir oro wuthǝr tok. Ṯiŋathi lizi ereele ŋwilli-na ethi liṯṯa ethneya weeŋen.” 16 Nǝsi Yǝcu ǝŋnici nɔŋwsǝccǝŋw, “Ŋende ŋɔvthanna etheele; nḏǝthǝrsi-mbǝ ŋaaŋa kwomne kweere kwǝthi yee.” 17 Nǝrǝccǝŋw, “Hyiiŋǝ kɔlɔ lǝthi rǝghiivǝ ṯɔthni nǝ lɔm ndǝn.” 18 Nɔŋwsǝccǝŋw, “Ǝvicǝr-nyji-ṯi kɔnɔŋw.” 19 Nɔŋw andaci lizi ethi naanalɔ karaaw-la; e-ta nɔŋw dimmi rǝghiivǝ rir ṯɔthni lɔm-li ndǝn, nɔŋw baaŋatha leereya-la, nɔŋwɔccǝ Allah shukran. Nɔŋwsi inḏǝthǝ ṯalaamiiza, e-ta nǝsi-mǝ ṯalaamiiz kannaci lizi. 20 Ŋwɔṯaŋw nǝr ethne tatap nǝr bee. E-ta nǝ ṯalaamiiz ɔṯi ŋgwa kwǝɽinnǝ nǝr urǝzi luuvǝ wrii-kwuɽǝn. 21 Nǝ kila lithna lir lɔr nǝroro kaka khamsa alf, nǝreere ǝnyji layɔ-ŋwɔsi kwelle-gi mac.
Yǝcu ninḏi-ŋgwɔ ŋaaw-la.
(Mɔrgus 6:45-52Yuhanna 6:15-21)22 Nǝ Yǝcu ṯiŋatha ṯalaamiiza, nǝr ǝnḏi ki-mɔrkǝb-nǝ ethi iŋnaci ŋunduŋw keereny-gi etheele ki-ṯuɽumǝ ṯithaathɔ, ṯǝthi bahar mindaŋ ethi-mǝ kitta lizi kithaay. 23 Nǝ mɔŋw kitta lizi kithaay tǝ, nɔŋweele nɔŋw allɔ ki-lundǝr-lǝ kwɔtɔpɔt ethi-gwɔ aari kiyiiriny. Mǝ kilkǝlu oro, nɔŋw tǝ naani kinnǝni kwɔtɔpɔt; 24 ṯǝakin ki-lɔɔmɔr-la ṯǝ kila mɔrkǝb-tǝ nɔŋwɔni kwɔmǝ ruunǝtuk ki-bahar-na kwɔppɔthɔr naana ŋaaw-ŋi, kaka nɔgwɔɔmathisi-gwɔ kɔrɔn-na. 25 Nǝ bǝyinǝ saa@ ṯoɽol nǝ kwir nyirlil kwǝthi ŋɔrpanaŋw tuttuk, nǝ Yǝcu iila ŋaaw-la kwiilathi ṯalaamiiza naana. 26 Mindaŋ mǝreese kwinḏi ŋaaw-la, nǝr ṯeenye beṯṯen. Nǝraarɔŋw, “Kwozŋwor kwɔrɔ!” Mindaŋ nǝraa-rii lithiinya ṯeṯṯec. 27 Nǝsi Yǝcu andicanna fittak, nɔŋwsǝccǝŋw, “Mithir rɔgwori nyii kwɔrɔ-ma; ǝṯi ṯiinya mac!” 28 Nǝ Bɔṯrɔs andaci nɔŋwɔccǝŋw, “kweeleny, moro ŋa rerrem, andica-nyii nyiila ŋaaw-la naani-ŋa-gwɔ.” 29 Nǝ Yǝcu ǝŋnici nɔŋwɔccǝŋw, “Ilamba.” Ṯaŋw nǝ Bɔṯrɔs dappitha-lɔ ki-mɔrkǝb-nǝ, nɔŋw iilatha Yǝcu-ŋwɔ naana ŋaaw-la. 30 Laakin mɔŋw inḏa kɔrɔni kimǝ kettice ŋɔɔrɔ ethi-gi elena, nɔŋw teenye, nɔŋw aari ibṯǝḏi ethi ɔndatha iininyu, nɔŋw aari kwɔɔla ŋɔmmaŋi nɔŋwaarɔŋw, “Kilǝthǝnyii-mǝ Kweeleny!” 31 Nǝ Yǝcu ṯiŋanni ṯii fittak, nɔŋw mithici ṯii pup, nɔŋwɔccǝŋw, “A kwɔrɔ-mba kwǝthi ṯǝmminǝ ṯokwɔṯoc gaa! A kwende kwallathiny ṯɔgwor naana?” 32 Mǝr ǝnḏi ki-mɔrkǝb-nǝ nǝ kɔrɔn biṯǝlɔ pǝt. 33 Nǝ ṯalaamiiz tinaanɔ ki-mɔrkǝb-nǝ liŋṯalɔ buruc, mindaŋ nǝr kwoccelɔ, nǝrǝccǝŋw, “A kwir Tɔr ṯǝthi Allah rerrem.”
Yǝcu mɔŋgwɔ sǝwi lizi luumǝ Janniisaaraṯ.
(Mɔrgus 6:53-56)34 Nǝr uɽǝthǝ bahara-na nǝreele Janniisaaraṯ, 35 ne lizi ilŋithanni Yǝcu-ŋw bir. Ṯaŋw nǝr ɔɔsǝthisi kǝzir wǝthi bǝlǝḏ ŋgwa wirikanna-lɔ tatap, nǝr mɔltha lizi luumǝ nǝrleele naanɔ-gwɔ Yǝcu. 36 Nǝr tuurǝccǝlɔ mindaŋ ǝŋgi luumǝ mɔmmuci kirethi kir ṯuunyu ṯɔɽɔk; nǝ kila tatap limǝ mɔmmi nǝr saawi kimǝthi keeŋen.